1 Tesalonisensenan

1 Esaki ta un karta di ami, Pablo, huntu ku Silvano* i Timoteo, na e kongregashon di e tesalonisensenan ku ta den union ku Dios, e Tata, i ku nos Señor Hesukristu:

Bondat inmeresí i pas sea ku boso.

2 Semper nos ta gradisí Dios ora nos ta menshoná boso tur den nos orashonnan, 3 pasobra nos no por laga di kòrda boso obra fiel, boso esfuersonan motivá pa amor i e perseveransia ku boso tin debí na boso speransa den nos Señor Hesukristu den presensia di nos Dios i Tata. 4 Pues nos sa, rumannan stimá pa Dios, ku el a skohe boso, 5 pasobra e bon notisia ku nos ta prediká no a yega serka boso ku palabra so, sino tambe ku poder, spiritu santu i konvikshon firme. I boso mes sa ki sorto di hende nos a bira pa boso mes bon. 6 Di manera ku boso a imitá nos i tambe nos Señor, pasobra ku goso ku ta bini di spiritu santu boso a aseptá e palabra di Dios meimei di hopi tribulashon, 7 i boso a bira un ehèmpel pa tur e kreyentenan na Masedonia* i na Akaya.

8 Ta un echo ku e palabra di Yehova no a resoná na Masedonia i Akaya so, ma tur kaminda hende a tende di boso fe den Dios, di manera ku nos no tin nodi di bisa nada. 9 Pasobra e hendenan mes ta sigui konta kon na prinsipio nos a drenta den kontakto ku boso i kon boso a kombertí na Dios i a bandoná boso diosnan falsu* pa bira esklabo di un Dios bibu i berdadero, 10 i pa spera binida di su Yu for di shelu, esun ku el a lanta for di morto, esta, Hesus, kende ta libra nos for di e binidero rabia di Dios.