Segun Huan
13 Tabata Pasku Hudiu.* Hesus tabata sa kaba ku e ora a yega pa e bai laga e mundu akí i bai serka e Tata. Hesus tabata stima su disipelnan.* Te na final, el a sigui stima nan. 2 Anochi, nan tabata sintá na mesa ta kome. Húdas Iskariòt, yu hòmber di Simon, tabatin plan kaba pa traishoná Hesus. Ta Diabel a hinka e idea ei den su kurason. 3 E Tata a entregá tur kos den man di Hesus, i Hesus tabata sa esei. E tabata konsiente tambe ku ta Dios a mand’é na mundu i ku e tabata bayendo bèk serka Dios. 4 P’esei, dado momento, ora ku Hesus i su disipelnan tabata komiendo, Hesus a lanta for di mesa, kita su mantel pone un banda i mara un sèrbètè na su sintura. 5 El a basha awa den un ponchera i kuminsá laba pia di e disipelnan. Anto e tabata seka nan pianan ku e sèrbètè ku e tabatin mará na su sintura. 6 Ora tabata turno pa Hesus laba pia di Simon Pedro, Simon Pedro a puntr’é: “Señor, abo ta bai laba mi pianan?” 7 Hesus a kontest’é: “Aworakí, bo no ta komprondé loke mi ta hasiendo. Despues, lo bo komprondé.” 8 Pedro a bis’é: “Mi no por laga bo laba mi pianan!” Hesus a bis’é: “Si bo no laga mi laba bo pianan, bo no por ta huntu ku mi.” 9 Simon Pedro a bis’é: “Si ta asina, Señor, laba mi mannan i mi kabes tambe, i no mi pianan so.” 10 Hesus a bis’é: “Hende ku a baña kaba tin ku laba nan pianan so, pasobra henter nan kurpa ta limpi. Boso ta limpi, pero no ta boso tur ta limpi.” 11 Hesus tabata sa ta ken tabata bai traishon’é. P’esei, el a bisa: “No ta boso tur ta limpi.”
12 Ora Hesus a kaba di laba nan pianan, Hesus a bisti su mantel i bolbe kai sinta na mesa. El a puntra nan: “Boso a komprondé loke mi a kaba di hasi? 13 Boso ta yama mi: ‘Maestro’ i ‘Señor,’ i boso tin rason, pasobra mi ta Maestro i Señor. 14 Awor, si mi ta boso Señor i Maestro i mi ta laba boso pianan, boso tambe no mester laba pia di otro?* 15 Mi a pone un ehèmpel pa boso: Hasi pa otro hende loke mi a hasi pa boso. 16 Mi ta bisa boso un bèrdat: Un esklabo no ta mas importante ku su doño, ni un mensahero no ta mas importante ku e persona ku a mand’é. 17 Awor, boso sa e kosnan akí. P’esei, si boso ta hasi e kosnan akí ku mi ta siña boso, boso lo ta felis. 18 Mi no ta papiando di boso tur. Mi a skohe boso, i mi konosé boso. Pero Skritura ta bisa: ‘Un di e personanan ku tabata kome mi pan a lanta kontra mi.’* E pasashi ei mester kumpli. 19 Mi ta bisa boso e kosnan akí adelantá pa ora nan sosodé, boso por kere ku ami ta e persona ku mi a bisa ku mi ta. 20 Mi ta bisa boso un otro bèrdat: Ken ku risibí e personanan ku mi manda ta risibiendo ami tambe. I ken ku risibí mi ta risibiendo e Persona ku a manda mi.”
21 Hesus a bira masha intrankil ora el a kaba di bisa e kosnan ei. El a bisa: “Mi ta bisa boso un otro bèrdat: Un di boso lo traishoná mi.” 22 E disipelnan a bira wak otro. Nan no por a saka afó ta di ken e tabata papiando. 23 Na mesa, tabatin un disipel ku Hesus tabata stima. E tabata sintá* banda di Hesus. 24 Simon Pedro a move su kabes i hasi seña ku e disipel ei i bis’é: “Bisa nos ta di ken e ta papia.” 25 E ora ei, e disipel a lèn riba Hesus i puntr’é: “Señor, ta ken?” 26 Hesus a kontest’é: “Ta e persona ku mi duna un pida pan ku mi dòp den e kònchi akí.” E ora ei, Hesus a kohe un pida pan, dòp e den e kònchi i duna Húdas, yu hòmber di Simon Iskariòt. 27 Húdas a tuma e pida pan, i Satanas a drenta den Húdas. Hesus a bis’é: “Bai lihé! Bai kaba di hasi loke bo ta hasiendo.” 28 Niun di e disipelnan ku tabata sintá na mesa no a komprondé dikon Hesus a bisa Húdas esei. 29 Komo ku Húdas tabata enkargá ku e kaha di plaka, algun di nan a pensa ku Hesus tabata ke pa Húdas bai kumpra loke nan tabatin mester pa e fiesta òf pa e bai duna hende pober plaka. 30 Húdas a tuma e pida pan i sali bai mesora. Tabata anochi.
31 Despues ku Húdas a bai, Hesus a bisa: “E Yu di hende ta ser glorifiká awor, i Dios ta ser glorifiká pa medio di dje. 32 Dios mes lo glorifiká e Yu di hende, i lo e glorifik’é mesora. 33 Mi yunan stimá, lo mi no keda muchu tempu mas huntu ku boso. Boso lo buska mi, pero mi ta bisa boso meskos ku mi a bisa e otro hudiunan: ‘Boso no por bini kaminda mi ta bai.’ 34 Mi ta duna boso un mandamentu nobo: Stima otro. Stima otro meskos ku ami a stima boso. 35 Si boso ta stima otro, tur hende lo sa ku boso ta mi disipelnan.”
36 Simon Pedro a puntra Hesus: “Señor, unda bo ta bai?” Hesus a kontest’é: “Aworakí, bo no por bini kaminda mi ta bai. Despues, lo bo bini.” 37 Pedro a bis’é: “Señor, dikon mi no por bai ku bo aworakí? Lo mi entregá mi bida* pa bo!” 38 Hesus a bis’é: “Bo ke entregá bo bida* pa mi? Kere mi: Promé ku gai kanta, lo bo nenga tres biaha ku bo konosé mi.”