For di Nos Lectornan

Industria di Tabaco E seri di artículo “Matando Miyones pa Gana Miyones” (¡Despertad! di 22 di mei, 1995) tabata mashá informativo i inteligente. E pintura riba e capa (“Carpachi cu Cigaria”) di Vincent van Gogh tabata spantoso! Kisas e pintura aki so lo ta suficiente pa kita algun hende for di humamentu of por lo ménos stroba algun di cuminsá.

M. B., Merca

Siendo cu mi ta traha p’e Sociedad Mericano di Cancer, mi tabata specialmente interesá pa lesa e artículonan aki. Mi a manda un copia p’e señora cu ta presidente dje organisacion local di un coalicion liber di tabaco. El a keda impresioná cu e calidad dje composicion i investigacion i a pidi 35 copia pa su coleganan.

J. O., Merca

Ami i mi esposo a bandoná humamentu casi tres luna pasá, pero ainda mi tin deseo di huma. Anto mi a lesa e artículo, i el a concientisá mi di cu algun ingrediente den cigaria ta asina venenoso cu ta ilegal pa basha nan den dump! Esaki a fortalecé mi pa odia loke ta malu.

L. T., Sur Africa

Víctima di Lupus Mashá danki p’e informacion den e artículo tocante lupus “Awor Ta Solamente Mia i Jehova.” (¡Despertad! di 22 di februari, 1995) Mi tin 18 aña di edad i ta sufri di lupus pa rond di dos aña. Ta animador pa sa con otro ruman homber i muher ta wanta sufrimentu den otro parti di mundu i pa mira con nos Creador semper ta apoyá nos amorosamente.

J. A. Y., Italia

Mayornan Dificultoso Mi a pidi den oracion pa un artículo manera “Hóbennan Sa Puntra . . . Kico Mi Por Haci si Mi Mayornan Ta Faya?” (¡Despertad! di 22 di mei, 1995) Ki tristu i ofendí mi a keda ora mi mama a ser expulsá for dje congregacion cristian! Mi casi a kita como pionero, esta, di traha como evangelisador di tempu completo. E artículo a fortalecé mi pa mi ‘traha pa mi mes salbacion cu temor i temblamentu’ en bes di preocupá mi mes demasiadamente tocante e relacion di mi mama cu Jehova Dios. (Filipensenan 2:12) Mashá, mashá danki.

J. P., Filipinas

Mi ta un cristian bautisá, pero mi ta haña cu ta mashá dificultoso pa onra mi tata cu ta yega cas burachi tur dia. Ora mi a lesa e artículo aki, mi mester a yora. Despues di a les’é, mi sintimentu i pensamentu negativo tocante mi tata a mengua basta, i mi ta sintí mi mas trankilu den mi curason.

N. M., Hapon

Ciencia Cristian E artículo “Seminario pa Mehorá Relacionnan Entre Dokter i Testigonan di Jehova” (¡Despertad! di 22 di mart, 1995) tabatin un comentario tocante e punto di bista di Ciencia Cristian di malesa. Pa establecé comprendimentu entre nos religionnan, mi kier duna siguransa na boso lector di cu maske miembro di nos religion ta dependé di curacion spiritual, nos ta apreciá i ta protehá bida humano na moda cu nos ta kere cu Cristo Jesus a mustra nos pa haci. Un registro di curacion confirmá publicá den nos literatura pa mas cu cien aña ta mustra cu adoracion di Dios, i no martirio, ta nos meta. Bienestar spiritual, moral, i físico ta e resultado consistentemente.

M. V. W., Manager, Comité di Publicacion, The First Church of Christ, Científico, Merca

Danki p’e comentarionan aki. Nos intencion di cita e palabranan di un dokter médico tabata pa enfatisá e echo cu Testigonan di Jehova sí ta aceptá tratamentu médico. Aunke nos ta respetá derecho di otro hende pa kere loke nan kier, Jesucristo realmente a bisa cu “hende salú no tin mester di dokter, pero e enfermonan sí.” (Mateo 9:12) I ora Pablo a skirbi tocante “casonan frecuente di enfermedad” di Timoteo, e no a recomendá curacion spiritual sino a sugerí tratamentu médico comun. (1 Timoteo 5:23) Pues, e punto di bista bíblico di tratamentu médico ta na conflicto cu e siñansa di Ciencia Cristian.—ED.