For di Nos Lectornan

Hende Muher di India Mi a apreciá e artículo “Hende Muher di India—Drentando den Siglo 21.” (¡Despertad! di 22 di juli, 1995) Mi semper a haña India fasinante, pasobra e tin un cultura masha diferente cu mi cultura. Boso artículo a mustra cu hende muher di India por haña berdadero liberacion solamente bou dje Reino di Dios. Mi ta spera e tempu ora tur esposo lo stima i apreciá nan esposa cu ta respetá nan.

W. S., British Columbia

Rechasá p’e Famia Mi tin 14 aña di edad, i mi ta skirbi pa gradicí boso p’e artículo “E Famia cu Berdaderamente A Stimá Mi.” (¡Despertad! di 22 di juli, 1995) E realmente a fortalecé mi fe. Udom Udoh ta un bon ehempel pa hóbennan na tur parti. E realmente a mustra cu bo por defendé e berdad na un edad masha hóben.

A. M., Merca

Mescos cu Udom, despues cu mi a cuminsá studia e Palabra di Dios, mi tabatin cu enfrentá oposicion. Mi mayornan a coré mi for di cas. Despues di hopi persecucion verbal i físico, mi a bai. Un anciano i su esposa a ricibí mi bondadosamente. Boso artículo realmente a fortalecé mi. Ta ki un goso pa ser miembro dje famia mundial único aki!

L. J., Merca

Birando Amigu di Dios Masha danki p’e artículo “Hóbennan Sa Puntra . . . Ami Realmente Por Ta un Amigu di Dios?” (¡Despertad! di 22 di juli, 1995) El a hací mi yora. Mi tin 13 aña di edad i a haci algun cosnan masha malu. Otronan a purba di animá mi, pero tog mi a haña cu tabata duru pa resa na Jehova Dios. Mi a kere cu e no a stimá mi mas pa motibu dje cantidad di eror cu mi a haci. E artículo aki a mustrá mi cu Dios sa pordoná i cu mi por haci oracion na dje.

J. D., Alemania

Mescos cu Doris cu e artículo a mencioná, mi no a kere cu mi tabata digno di ser amigu di Dios. Mi ta gradicí Jehova p’e yudansa cu el a duná mi. E artículo a yudá mi comprendé cu si mi ta repentí di mi malechonan, e ta keda dispuesto pa pordoná mi i ser mi Amigu. Mi ta spera cu boso nunca lo stop di publicá artículonan asina pa hóbennan.

B. M. A., Spaña

Menopausa Nos ta gerente di un compania farmacéutico cu ta specialisá den medicina ginecológico. Nos a haña e artículo tocante menopausa titulá “Ganamentu di un Mihó Comprendimentu” (¡Despertad! di 22 di februari, 1995) tabata sumamente interesante, i nos ta contentu cu boso a skirbi e artículo riba e tema ei. Pero, e cuadro titulá “Kico dje Terapia di Reemplaso di Estrógeno?” ta bisa cu “agregando progesterona n’e régimen di reemplaso di hormon . . . ta contrarestá efecto beneficioso di estrógeno contra malesa di curason.” Esei no ta semper cierto, specialmente tocante progestina natural.

Dr. T. W. i J. K., Alemania

Danki p’e informacion al dia. Aunke informacion mas bieu ta indicá cu progestina por reducí nivel di HDL, of “bon” colesterol, i asina aumentá e peliger di malesa di curason, investigacion mas reciente ta indicá lo contrario. Un investigacion reciente a informá den e edicion di “JAMA” di 18 di januari di 1995 cu “estrógeno so of en combinacion cu progestina ta mehorá [nivel di “bon” colesterol].” Sin duda mas investigacion mester ser hací promé cu hende ta comprendé completamente e efecto di largu plaso di tratamentu cu hormon.—ED.

Evolucion Mi a caba di lesa e seri “E Teoria cu A Sorprendé Mundu—Cua Resultado Lo Tin?” (¡Despertad! di 8 di augustus, 1995) Con mi a reaccioná? Mas cu impresioná. Mi a keda maraviyá! E artículo tabata skirbí cu tantu color, tantu comprensivo. Tur prueba a manifestá investigacion extenso. Sobre todo, e tabata iluminador en cuanto e berdadero efecto dje siñansa di evolucion riba e mente di hende. Mi no tabata sa di esei! Tin un escases den mundu pa material di calidad pa lesa, pero boso a satisfacé e necesidad.

R. H., Merca