Bo A Yega di Mira un Rayo Berde?

TA KI agradabel pa despidí di un otro dia gosando e bista di bahamentu di solo! E claridad caluroso dje solo ta percurá un variedad di color ora rayo di solo ta penetrá atmósfera dje tera. Destacando e experencia excitante aki ta un fenómeno raro yamá rayo berde. Si e condicionnan ta bon, tal rayo di ripiente di color esmeralda ta sosodé n’e último momento di bahamentu di solo. Un suceso asta mas raro ta ser yamá rayo blou i hende ta bisa cu esei ta asta mas bunita.

Kico ta causa rayonan di color asina? Pakico nan ta dura pa un momento so? I pakico nan ta asina raro? Pa contestá e preguntanan aki, inicialmente nos mester tin un comprendimentu básico dje reaccion di rayo di solo riba atmósfera dje tera.

Rayo di solo bahando riba e tera ta contené tur color di regenboog. Ora e lus aki penetrá atmósfera dje tera, e atmósfera tin hopi parecido di un prisma gigante i ta separá rayo for di otro. Sin embargo, e grado dje separacion ta dependé di longitud di su onda.

Onda di lus blou tin longitud di onda mas corticu i ta ser plamá leu den atmósfera. P’esei shelu ta mustra blou ora cu e solo ta hopi mas haltu cu e horizonte ora shelu ta cla. Pero ora e solo ta cerca e horizonte—manera ora solo baha—e rayonan di solo tin cu pasa dor di mas dje atmósfera pa yega nos wowo. Como resultado, rayo blou, hopi plamá, no ta yega nos bista. En cambio, onda mas largu, tal como corá, por penetrá mas fácilmente den e atmósfera denso. Esei ta duna bahamentu di solo su color conocí, esta, corá of oranje.a

Sin embargo, den cierto circunstancia, bo por mira un rayo berde of un rayo blou ora solo ta baha. Con esei ta sosodé? Ora e último rand dje solo ta baha tras di horizonte, rayonan di solo ta parti den un spectrum manera regenboog. Rayonan corá ta presentá n’e parti mas abou dje spectrum, i rayonan blou n’e parti mas haltu. Miéntras cu e solo ta sigui baha, e parti corá dje spectrum ta baha bou di horizonte i e parti blou generalmente ta ser plamá den e atmósfera. Ta n’e instante ei e último rayonan di lus visibel ta mustra berde. Pero, pakico nan ta berde? Pasobra berde ta e otro color primario den lus.

Ora shelu tin hopi contaminacion, rara bes hende por mira rayo berde, i rayo blou ta presentá solamente ora e atmósfera ta excepcionalmente limpi i suficiente rayo blou ta penetrá e atmósfera pa causa aparencia di rayo briyante.

[Nota]

[Plachi Rekonosementu na página 24]

Bahada di solo: ©Pekka Parviainen/SPL/Photo Researchers