Un Futuro Maraviyoso p’e Planeta Tera

“INVESTIGACION ta mustra cu e Tera ta mas cayente awor cu den 600 aña,” segun e corant Globe and Mail di Toronto. Na 1995 un ola di calor den central di Merca a mata mas cu 500 hende na Chicago. Un calor extremo similar a sosodé na India i Australia, miéntras cu Inglatera a experenciá “e zomer di mas secu den 200 aña.”

Kico ta e causa di tur esei? Henry Hengeveld, un experto di clima dje Departamento di Medio Ambiente federal di Cánada, ta bisa: “Mayoria evidencia ta indicá cu tin un influencia humano dicernibel riba e clima mundial.” Segun e informe di Globe and Mail, “e clima straño ta consistente cu modelonan di computer imitando e efectonan di aumento di temperatura dje planeta, cu nan ta kere ta causá principalmente p’e kimamentu di combustibel fosil.”

Existencia di aumento di temperatura dje planeta ta ser debatí ainda den círculo científico. No obstante, The New Encyclopædia Britannica ta bisa: “Humanidad ta haci abusu dje medio ambiente atmosférico mas lihé cu e ta comprendé esei.”

Felismente, e Bijbel ta bisa nos cu e tera lo “permanecé te na tempu indefiní.” (Eclesiástes 1:4) Ta asina pasobra e Creador, Jehova Dios, lo no permití ni hende ni ningun forsa natural destruí e planeta. Al contrario, Jehova Dios “lo causa e ruina di esnan cu ta ruiná e tera.”—Revelacion 11:17, 18.

Ademas, e Bijbel ta duna nos e siguransa di cu Jehova Dios tin un futuro maraviyoso prepará pa nos planeta, e Tera, i pa tur humanidad obediente. “E mansunan mes lo poseé e tera, i nan berdaderamente lo haña nan deleite exkisito den e abundancia di pas.” Ki contentu nos por ta cu e futuro dje planeta ta den man di Dios, i no den man di hende!—Salmo 37:11; 72:16; Isaías 65:17-25; 2 Pedro 3:13.

Si bo kier ricibí e revista Spierta! den futuro, por fabor, tuma contacto cu Testigonan di Jehova den bo becindario of skirbi n’e direccion mas cumbiniente den e lista na página 5.

[Plachi na página 32]

NASA photo