Koumentu Cu Ta Hiba Nan Na Sufrimentu

DJE CORESPONSAL DI SPIERTA! NA INDIA

DJINGELNAN contagioso na radio ta animá hende pa us’é. Artistanan di cine ta promocion’é den propagandanan di television, di revista i di corantnan como algu cu ta hiba na un moda di biba excitante i prestigioso. Pero e letternan chikitu ta spierta cu e uso dje producto lo por ta perhudicial pa bo salú. Kico e ta? Un substancia adictivo i dañino conocí como siri [na hindi, pan].

Siri ta ser usá na Asia—masha extensamente na India. Den su forma tradicional, e ta consistí di un mescla di betelnoot of pinangnoot machicá, tabaco i otro ingredientenan cu ta lanta e smak. E tabaco i e betelnoot ta haci e siri adictivo. Ta pone esakinan riba un blachi dje mata pica di betel cu a ser huntá cu e pastanan di un substancia pegahoso mineral i catechu, un producto vegetal astringente. Ta dobla e blachi pa cera e contenido, i despues ta hinca henter e pakete den boca. Un forma popular ta pan masala, un mescla di e mésun ingredientenan den forma secu i empaketá den sakitunan chikitu cu por ser hibá fácilmente i usá na cualkier ora.

Ta tarda basta hopi pa kou e siri i e ta producí hopi scupi, locual mester scupi afó tempu-tempu. Mayoria cas caminda ta usa siri hopi tin un baki di scupi, pero pafó di cas, un camind’i cana of un muraya ta haña e scupi. Esaki ta e causa di e manchanan color maron cu bo por mira riba trapinan i den gangnan di hopi edificio na India.

Segun un estudio dje Instituto di Investigacion Fundamental Tata, 10 porciento di casonan nobo di cancer na India tur aña ta cancer di boca—rond di dos biaha mas tantu cu e promedio mundial. Dr. R. Gunaseelan, un ciruhano oral i maxilofacial, huntu cu otro ciruhanonan na tur parti di India, ta pone e culpa principalmente riba e koumentu di siri. E ta declará den Indian Express: “Tur forma di siri ta dañino pa boca.” El a remarcá cu siri “definitivamente por hiba na cancer di boca” i cu “kou riba dje ta mescos cu pidi pa deformidad di cara.” Pues, e uso di siri lo por nificá un koumentu cu ta hibá bo na sufrimentu.

[Plachi na página 31]

Dies porciento di casonan nobo di cancer na India, ta cancer di boca

[Rekonosementu]

WHO photo by Eric Schwab