For di Nos Lectornan

Protehá Bo Yunan Mi a topa un señora hóben cu tabata tuma den su cas algun mucha cu a ser abusá sexualmente. Mi a ofrec’é e edicion di 8 di october, 1993 [na spañó], cu e seri “Protehá Bo Yunan!” Ora mi a bolbe bishit’é, el a bisa: “E artículonan a yudá mi trata cu e situacion nobo aki. Mi a bai cu e revista ora mi tabatin un cita na corte hubenil i a mustr’é n’e fiscal. E, como tambe e hues, a keda impresioná cu e artículonan i tabata kier a distribuí nan entre e otro abogadonan.” E señora hóben aki a pidi pa mas literatura i awor ta studiando Bijbel cu nos.

E. T. V., Brazil

Crucigrama Poco dia pasá, ami cu mi nieta tabata blader dor dje edicion dje ¡Despertad! di 8 di december, 1995, ora nos a topa e crucigrama. El a grita, “Mi ta gusta crucigrama!” Di manera cu nos a busca e textonan huntu, i mi a laga e mes haña e contestanan. Nos a pasa un mei ora asina masha dushi huntu. Sigui asina! Nos ta spera cu anhelo e próximo crucigrama.

M. G., Cánada

Mi tin nuebe aña di edad. Mi stima boso revista, pero mas cu tur cos mi gusta e crucigramanan, pasobra nan ta yudá mi corda suceso i personahenan den Bijbel. Masha masha danki pa e rasgo aki.

J. M. T., Brazil

Malesanan cu Ta Mata Danki pa e seri extenso, cla i exacto tocante “Malesanan cu Ta Mata—E Guera Entre Hende i Microbio.” (¡Despertad! di 22 di februari, 1996) Nunca mi a realisá con inmensamente complicá microbio ta i cuantu daño físico e por causa.

C. L., Merca

E revista a yega net na ora, ya cu mi a haña un pulmonia i mester a tuma antibiótica. E artículonan a yudá mi comprendé pakico mi a sinti mas malu en bes di mas mihó ora mi a cuminsá tuma e remedi. Mi ta gradicidu pa e informacion aki, cu a ser presentá den un manera asina fácil pa comprendé.

I. W., Alemania

Etiopia Despues di a lesa e artículo “Etiopia Fasinante” (8 di mart, 1996), mi curason a yena cu gratitud. Mi tin hopi famia etiopio cu no ta Testigo di Jehova. E artículo aki tabata asina bunita cu mi tin sigur cu lo e lanta nan interes pa siña tocante nos gran Dios, Jehova.

J. R., Luxemburgo

E Tabata un Geisha Mi a keda profundamente conmoví cu e artículo “E Yu di un Dori.” (8 di mart, 1996) Debí n’e influencia di mi mama, mi a studia balet clásico for di tempu cu mi tabata masha chikitu. Ora mi a bira un Testigo di Jehova, mi a dicidí di laga balet, maske mi tabata stim’é mashá. E artículo aki a animá mi. El a yudá mi wak cu tin otro cristiannan cu a haci sacrificionan similar. Mi ta gradicí boso cu henter mi curason.

Y. S., Hapon

Mi wowonan no por a stop di basha lágrima ora mi a wak e potret di Sawako Takahashi cu su felis famia teocrático. Pa hopi tempu e sufrimentunan cu mi a pasa aden a dominá mi bida, i un sintimentu di a ser hací un víctima a poné mi sufri hopi. Sabiendo cu Jehova lo pordoná mi faltanan di pasado a duná mi e curashi pa haci esfuerso pa bira un cristian bautisá.

M. K., Hapon

E tabata un dje relatonan di mas informativo i agradabel cu mi a yega di lesa. Tambe el a yudá mi comprendé loke adoracion di antepasadonan ta encerá. Nunca mi por a comprendé e forma di adoracion aki, te cu mi a lesa e autobiografia aki.

P. Y., Merca