Lo Keda Un Religion

IMAGINA con lo ta si tur hende riba tera tabata uní den un solo religion, den un solo adoracion puru dje único Dios berdadero. Ki un fuente di unidad esei lo ta! Lo no tin pleitu religioso mas, ni bringamentu, ni guera. Esaki ta solamente un soño? No. E vision di apostel Juan dje destruccion dje muher di mala bida, e imperio mundial di religion falsu, ta indicá cu un forma di adoracion lo keda despues dje destruccion dje muher di mala bida. Cua?

E bos cu Juan a tende for di shelu ta duna nos un clave: “Sali for di dje, mi pueblo, si boso no kier participá cuné den su picánan, i si boso no kier ricibí parti di su plaganan.” (Revelacion 18:4) Ta evidente cu Dios mes ta papiando aki cu su pueblo. Tuma nota cu e no ta manda su pueblo pa mescla cu e muher di mala bida den un esfuerso ecuménico pa salb’é dor di yud’é transformá su bida na unu decente. No, no por haci nada p’e. P’esei, Dios ta manda nan pa sali for di dje i keda leu di dje afin di evitá di bira contaminá dor di su condicion gravemente pecaminoso i pa evitá cu al final nan lo ser husgá i destruí huntu cuné.

E mandamentu celestial pa “sali for di dje” tambe ta yuda buscadornan sincero dje berdad pa identificá e pueblo di Dios. Nan por puntra nan mes, ‘Cua pueblo na tera awe a sigui e mandamentu aki dor di bandoná cualkier religion, organisacion of grupo di adoradornan cu ta conectá cu “Babilonia e Grandi”? (Revelacion 18:2) Cua pueblo riba tera awe a libra nan mes dje manera ei for di tur doctrina, creencia, práctica i tradicionnan babilónico?’ Ken otro e pueblo ei por ta cu no ta Testigonan di Jehova? Entre e mas cu 5,2 miyon Testigonan den mas cu 230 pais, tur cu tabata asociá cu un of otro religion babilónico, sea for di nacementu of dor di combertimentu, a bandon’é deliberadamente—tin biaha apesar di protesta i oposicion di famia, amigu i lidernan religioso.

Un ehempel ta Henry, un homber surafricano, kende tabata e tesorero di su iglesia i cu tabata fuertemente pegá na dje. Pero e tabata buscando e berdad, i un dia el a aceptá un studio di Bijbel grátis na cas cu Testigonan di Jehova. Cu tempu, ora el a dicidí di bira un Testigo, el a conta su pastor, kende tabata su bisiña pegá tambe, cu e kier a bandoná e iglesia.

E pastor a haña esei un escándalo i mas despues a hiba e funcionario presidente dje iglesia i otro miembronan huntu cuné pa bishitá Henry. Nan a puntr’é pakico el a laga nan iglesia pa bira miembro di un religion cu, segun nan, no tin Dios su spiritu santu. “Na promé instante, mi tabatin miedu di contestá nan,” Henry a bisa, “pasobra nan tabatin semper hopi influencia riba mi. Pero mi a haci oracion na Jehova pa yudansa, i el a capacitá mi pa haci e defensa aki: ‘Di tur religion internacional, cua ta e único cu ta usa e nomber di Dios, Jehova, regularmente? No ta Testigonan di Jehova? Boso ta kere cu Dios lo a permití nan carga su nomber anto no duna nan su spiritu santu tambe?’” E funcionarionan di iglesia no por a refutá e razonamentu aki, i Henry ta awor un Testigo di Jehova.

Pues, ora e bos for di shelu ta manda: “Sali for di dje,” tin un caminda pa bai. (Revelacion 18:4) Tin hendenan, adoradornan dje Dios berdadero, Jehova, na ken bo por hui bai. Miyones a hui. Conocí como Testigonan di Jehova, nan ta consistí di un hermandad cristian internacional, organisá den mas cu 78.600 congregacion, i awor ta experenciando e crecementu di mas grandi den nan historia. Nan a bautisá mas cu 1.200.000 hende den e último cuater añanan! Promé cu bautismo, tur esakinan a completá un curso di studio bíblico spiritualmente stimulante, locual a capacitá nan pa tuma un decision personal i bon fundá pa bandoná tur coneccion anterior cu cualkier otro religion.—Sofonías 2:2, 3.

Si ainda bo no a asistí na un reunion di Testigonan di Jehova na un di nan Salonnan di Reino, pakico no haci esei e siman aki? A lo mehor lo bo keda agradablemente impresioná cu loke bo ta mira i tende. I si bo kier comprendé e Bijbel, pakico no puntra un Testigo di Jehova pa studia cu bo, manera miyones di otronan a haci? Si ta bo oracion pa haña e berdadero comprendimentu dje Palabra di Dios huntu cu un estilo di bida cu ta na armonia cu e Palabra ei, lo bo haña e contesta pa bo oracion.

[Plachinan na página 9]

Miyones di hende ta acudiendo n’e adoracion di Jehova Dios