For di Nos Lectornan

Desempleo Masha, masha danki mes pa e seri “Desempleo—Tin un Solucion.” (8 di mart, 1996) El a bin na un momento ora mi tabata buscando trabou, pero mi no por a haña ningun. Mi a purba crea un trabou na cas, manera boso a mencioná na página 11, i pa mi el a resultá bon. Danki na Jehova pa loke boso ta haci!

J. M., Guyana Frances

E artículonan a describí e situacion cu mi a hañá mi aden recientemente. Pa algun luna, mi mester a adaptá mi mes na haci “tur sorto di trabou,” net manera un artículo a bisa. Pero mi no a desanimá. Mi a purba di tin un punto di bista positivo, i finalmente mi a haña un trabou vast. Durante e periodo ei, mi tabatin e yudansa di mi esposa, kende tabata masha zuinig ora di haci compra. Un bes mas, danki pa informacion cu ta yuda nos aplicá principionan bíblico den situacionnan difícil.

U. C., Italia

Mi a gusta specialmente boso cuadro “Creando Trabou na Cas.” Mi ta un pionero regular, un evangelisador di tempu completo, i pa dos aña mi a manehá un kresh na cas, pa cua mi tabatin vergunning. Mi tabata cuida mucha promé i despues di scol i tabatin un bon entrada. Esei a permití mi predicá merdia, i mi a traha solamente cuater ora pa dia. Hopi mayor tabata gradicidu, pasobra cuido di calidad no ta fácil pa haña. Mi ta spera cu otronan tambe por haña empleo cu lo yuda nan sirbi Jehova.

T. K. L., Merca

Boso a sugerí cu hende sin trabou lo por cuminsá un negoshi privá di fura muebel, di barberia, trabou di mantencion, etcétera. Tambe boso a bisa cu bou di cierto circunstancianan nan por haci propaganda grátis of na costo abou pa nan servicionan. Esaki no ta ilegal na Alemania?

R. T., Alemania

Leynan ta diferenciá di pais pa pais, i kisas e sugerencianan aki lo ta ilegal den algun pais. Ta p’esei nos a señalá na página 9 n’e necesidad pa conocé i respetá leynan fiscal i di belasting promé cu cuminsá cu un empresa asina. Cristiannan ta obligá pa obedecé e leynan dje pais den cua nan ta biba. (Romanonan 13:1)—RED.

Parke di Bestia Berdaderamente mi a disfrutá dje artículo “Studiando e Bijbel—Den Parke di Bestia!” (¡Despertad! di 8 di mart, 1996) Mi a gusta mashá e informacion tocante e animalnan mencioná den Bijbel. Nunca mi tabata sa cu Bijbel ta mencioná zebra. Tambe mi a gusta e paragraf tocante vruminga mashá. E artículo a animá mi pa investigá un animal diferente tur luna.

M. F., Merca

Mi Estimada Amiga Mi kier a expresá mi sincero aprecio pa e artículo encantador, “Mi Estimada Amiga.” (8 di mart, 1996) Tabata dushi pa lesa cu un amistad asina bunita tabata existí apesar di un diferencia asina grandi den edad. E ta mustra cu no ta esencial pa hóbennan tin como nan amigunan mas íntimo solamente esnan di nan mes edad. Tin hopi hende di mas edad cu tin hopi pa ofrecé pa loke ta experencia, sabiduria i humor.

S. T., Inglatera

E artículo a duna prueba cu hóben i bieu por bai bon cu otro i cu hende yong por beneficiá dje experencia ricu dje generacion mas bieu. Ami mes a pasa hopi ora interesante i placentero cu un amigu mas bieu. El a yudá mi hopi pa trata cu problemanan manera presion di muchanan di mi edad.

W. S., Austria

Te cu awor nunca mi a purba siña di hende di mas edad. Danki na e artículo aki, mi ta comprendé awor kico ta e cosnan cu mi por siña di nan. Mi tin masha hopi gana di bira un amigu íntimo di algun di esnan di mas edad cu ta ricu den sabiduria.

R. K., Hapon