“Un Sinfonia di Coordinacion Exkisito”

DJE CORESPONSAL DI SPIERTA! NA SUR AFRICA

NOS facultad di abla ta un maraviya. Rond di 100 músculo den pechu, garganta, kakumbein, lenga i lipnan huntu ta producí un sinfin di diferente zonido. Cada músculo ta un bulto di cientos te cu miles di fibra. Tin mas neuron den e celebro cu ta controlá e fibranan muscular aki, cu ta necesario pa impulsá e músculonan di pia di un atleta. Un cel di nervio ta suficiente pa impulsá tur e 2.000 fibranan muscular dje batat’i pia. Na contraste cu esei, celnan di nervio cu ta controlá e cahita di bos, of laringe, lo por ta conectá cu solamente dos of tres fibra muscular.

Cada palabra of frase corticu cu bo producí tin su mes patronchi di movementu muscular. Tur e informacion necesario pa ripití un frase manera “Con ta bai cu bo?” ta wardá den e parti di bo celebro cu ta controlá abla. Acaso esaki ta nificá cu bo celebro ta usa un solo programa muscular inflexibel cu ta bai paso a paso pa ripití cada palabra of frase? No. E facultad di abla ta muchu mas impresionante cu esei. Por ehempel, si bo tin un herida den bo boca cu ta hacié difícil pa bo pronunciá palabranan manera abo sa hacié, e celebro ta adaptá, sin control conciente, e movementu di músculonan di abla pa asina bo por articulá e palabranan mas cerca posibel di bo manera normal di papia. Esaki ta hiba nos na un otro echo maraviyoso.

Un simpel saludo manera “Con bai?” por comunicá un cantidad di nificacion. E tono di bos por mustra si esun na palabra ta contentu, excitá, fadá, purá, sará, tristu of spantá, i por revelá e diferente grado dje estadonan emocional ei. Sí, e nificacion di un solo expresion por cambia dependiendo dje accion i e coordinacion rapidísimo di hopi diferente músculo.

Dr. William H. Perkins ta splica den su buki Stuttering Prevented (Con pa Prevení Gagamentu): “Na un paso confortabel, nos ta saca rond di 14 zonido pa seconde. Esei ta dos biaha mas lihé cu nos por controlá nos lenga, lipnan, kakumbein of cualkier otro parti di nos mecanismo di abla si nos move nan separá for di otro. Pero, pone nan tur huntu pa papia anto nan ta funcioná mescos cu e dedenan di un tipista experto of un pianista di concierto. Nan movementunan ta armonisá cu otro den un sinfonia di coordinacion exkisito.”

Na un grado limitá, algun para por imitá zonidonan di abla humano. Pero ningun animal tin un celebro programá pa reproducí abla mescos cu hende. P’esei no ta un sorpresa cu científiconan no tabatin éxito den nan intento pa siña macacunan pronunciá palabranan cla. Segun e neurobiólogo Ronald Netsell, e abilidad rekerí pa papia por ser compará cu esun di “e persona extraordinario cu ta toca piano solamente ‘riba oido.’” Of manera e lexicógrafo Ludwig Koehler a concluí: “Abla humano ta un secreto; e ta un don divino, un milager.”