Variedadnan Di Mata Ta Disparciendo Di Con?

NA China, nan tabata cultivá casi 10.000 variedad di trigu na 1949. Sin embargo, ya pa añanan ’70, tabatin solamente 1.000 cu ainda tabata ser cultivá. Na Merca, dje 7.098 variedadnan di apel cu segun informe tabata ser cultivá entre 1804 i 1904, rond di 86 porciento a bai perdí. Ademas, segun e Report on the State of the World’s Plant Genetic Resources for Food and Agriculture, “aparentemente 95 porciento dje variedadnan di kolo, 91 porciento di esnan di maishi di cunucu, 94 porciento di esnan di pitipuá i 81 porciento di esnan di tomati no ta existí mas.” Paisnan rond mundu ta raportá cifranan similar. Pakico un caida repentino asina? Algun hende ta bisa cu un dje causanan principal ta e aumento den agricultura comercial moderno, cu a pone cu e cunucu chikitu di famia a caba na nada, loke a hiba n’e desaparicion dje variedadnan di cultivo tradicional i hopi variá.

E desaparicion di variedad den mata por pone cu e cultivo tin mas chens di fracasá. Por ehempel, considerá e gran scarcedad di batata na Irlanda entre 1845 i 1849, durante cua un 750.000 hende a muri di hamber ora un malesa di mata a destruí mayoria dje cultivo di batata. Cua tabata e causa biológico pa e tragedia aki? Un informe di Nacionnan Uní ta bisa: “Uniformidad genético.”

Rond mundu nan a construí durante añanan ’70 i ’80 mas di 1.000 banco genético pa acumulá i conserbá fuentenan genético di mata. Pero un cantidad dje banconan genético aki ta bayendo atras lihé, i ya caba algun a cera nan porta. Segun informe, rond di 30 pais so tin awor facilidadnan apropiado pa sigurá almacenahe i conserbacion di simia di mata pa tempu largu.

Bijbel ta primintí cu bou dje gobernacion di Cristo su Reino, Jehova “siguramente lo prepará pa tur pueblo . . . un bankete di plato cu hopi zeta, un bankete di biña mantené riba kachi-kachi, di plato cu hopi zeta yená cu tuti di wesu.” (Isaías 25:6) Ki gradicidu nos por ta cu Jehova Dios, “Esun cu ta duna cuminda na tur carni” i e Creador di diversidad genético, lo satisfacé tur necesidad di hende pa cuminda!—Salmo 136:25; Génesis 1:29.