Hóbennan Sa Puntra . . .

Con Mi Por Evitá di Ser Sofocá dor di Mi Amigu?

“Mi amiga tabata haci manera mi tabata su posesion. E no tabata duná mi ni un chens di hala rosea.”—Hollie.

“TA EXISTI un amigu cu ta mas pegá cu un ruman,” un proverbio sabí ta bisa. (Proverbionan 18:24) I si bo tin un amigu cu tin e mésun conviccionnan, sentido di humor i interesnan cu bo, ta masha normal cu boso kier ta huntu. Un hóben cu yama Caroline ta bisa: “Mi tin un amistad masha cerá cu algun hende den e congregacion cristian, dor cu nos ta haci cos huntu.” Como un Testigo di Jehova, Caroline a apartá un luna den cua el a planea pa dedicá 60 ora den e trabou di evangelisá. Su amigunan a ahustá nan programa pa asina apoy’é den e trabou aki!

Pero aunke tin beneficio pa tene un relacion cerá cu otro, tin biaha e por parce di mas. Hollie, citá na cuminsamentu, ta sintié sofocá dor di un di su amiganan. I e no ta e único cu ta sinti asina. Hollie ta comentá: “Parce cu esaki ta sosodé cu otro muchanan tambe. Nan ta casi biba den otro su sacu, te ora sosodé un gran explosion. Anto e ora ei pa simannan largu nan no ta papia cu otro.”

E problema ta cu no ta fácil pa bisa un amigu cu bo ta sintí bo sofocá i cu bo kier mas privacidad. Kisas bo tin miedu cu lo bo ofendé bo amigu. Kisas bo tin miedu tambe di daña boso relacion. Sin embargo, ora tin suficiente espacio den un amistad, esei lo yuda mas bien cu ofendé.

Ata aki un ilustracion: Den un hardin público na Sydney, Australia, nan mester a pone un heki di cadena rond di un palu grandi. Di con? Pasobra batayonnan di bishitante tabata près e tera poco-poco i tabata sofocá e raisnan. Si nan a keda sin protehá e palu, lo el a muri. Mescos por ta cierto di berdadero amistad. Si boso ta muchu hopi huntu, boso por sofocá e relacion. Rey Sálomon a skirbi: “Haci bo pia scars n’e cas di bo próhimo, p’e no fada di bo i ciertamente odiá bo.”—Proverbionan 25:17.

E Necesidad pa Privacidad i Tempu pa Bo Mes

Pakico Sálomon a bisa esaki? Pa cuminsá, nos tur tin mester di privacidad i un poco tempu pa nos mes. Asta Jesucristo tabatin e necesidad aki. Aunke e tabata hopi cerá cu su disipelnan, de bes en cuando e tabata bai un caminda “su so pa haci oracion.” (Mateo 14:23; Marco 1:35) Isaac, un homber temeroso di Dios, tambe a busca tempu pa ta su so. (Génesis 24:63) Abo tambe mester di un cierto cantidad di tempu pa bo mes pa haci cosnan manera huiswerk, tareanan di cas i bo studio personal di Bijbel. I si bo amigunan ta mustra un falta di consideracion ignorando bo necesidadnan den e sentido aki, tin hopi chens cu sintimentunan di rencor lo por lanta.

P’esei, no tene miedu di laga un amigu sa ora bo tin mester di tempu pa bo mes. Ya cu amor cristian “no ta busca su mes interes,” por lo general un berdadero amigu lo trata na comprendé. (1 Corintionan 13:4, 5; Proverbionan 17:17) “Durante e tempu promé cu mi eindexamen,” un hóben ta skirbi, “mi amiganan tabata comprensivo i un gran apoyo. Mi no tabatin miedu di pidi nan pa bai ora mi tabatin mester di tempu pa siña. Ta fácil pa mi ta onesto cu mi amiganan; nan sa cu nos tur tin responsabilidad.”

Claro, e Regla di Oro ta rekerí pa bo mustra e mésun consideracion na bo amigunan. (Mateo 7:12) Un hóben cu yama Tamara ta skirbi: “E echo cu mi tin hopi responsabilidad di berdad a hací mi mas conciente di mi amiga su necesidad p’e tin tempu pa su mes.” Anto, ora Tamara tin tareanan di cumpli cuné na cas, su amiganan no ta pur’é of bis’é p’e laga nan pa mas despues. Al contrario. Tamara ta bisa: “Generalmente nan ta yudá mi cu mi trabou pa asina nos por bai haci cosnan huntu despues.” Esta un tesoro amigunan inegoista asina ta, i ki bon nan ta usa nan tempu huntu!

“Hancha Boso Mes”

Tin un otro motibu mas pakico ta sabí pa dos amigu duna otro espacio. Ora nos ta invertí tur nos tempu i emocion den un amigu so, nos lo por neglishá otro relacionnan importante, manera nos relacion cu nos mayornan i nos rumannan carnal, i cu otro cristiannan. Tambe nos ta limitá nos progreso emocional i spiritual masha hopi. Bijbel ta bisa: “Heru cu heru mes ta haci otro skerpi. Asina un hende ta haci e cara di un otro skerpi.” (Proverbionan 27:17) Ta bisto cu tin un límite n’e cantidad di ‘slijpmentu’ cu bo por ricibí dor di asociá cu un persona so, anto foral si esun ei ta bo pareu.

P’esei Bijbel ta animá nos pa evitá di asociá i di ta amigu di algun hende so. E ta urgi nos pa ‘hancha nos mes.’ (2 Corintionan 6:13) E buki Moods and Feelings ta consehá: “Asta si bo tin un amigu special, ta importante pa bo traha tempu pa ta cu otro amigunan tambe.”

No ta semper fácil pa aplicá e conseho ei. Un hóben cristian cu yama Michael ta bisa: “Ami cu Troy tabata haci tur cos huntu, tantu den congregacion como socialmente. Nos tabata inseparabel. Despues un otro hóben Testigo a muda bin nos congregacion. Ami cuné kier a sirbi huntu como evangelisadó di tempu completo, di manera cu nos a cuminsá pasa tempu huntu.” E resultado? “Troy a stop di papia cu mi,” Michael ta bisa, “i despues di haci algun intento en bano pa drecha cos, ami tambe a stop di papia cuné. Cosnan a sigui asina pa un aña.” E ta describí nan relacion como unu “posesivo pa motibu di yaluzí.”

Pero den un relacion saludabel, amigunan no ta trata otro manera posesion. P’esei, si un amigu no kier pa bo extendé bo amistad na otro hende, bo tin cu papia franco cuné. Kisas e único cos cu bo amigu tin mester ta e siguransa cu ainda bo ta considerá su amistad como di gran balor. Lagu’é comprendé cu boso lo sigui haci cos huntu.

Nos ta admití cu kisas lo pasa un poco tempu promé cu bo amigu custumbrá cu e idea. Por ehempel, Zaneta di dieseis aña, a sintié un tiki yalurs ora su amiga íntimo a cuminsá pasa tempu cu otronan. Pero Zaneta ta bisa cu el a vence e sintimentunan aki, “cu oracion i studio personal di Bijbel.” Asina e por a mantené un relacion cerá cu su amiga. Michael su amigu Troy tambe a pasa over di e yaluzí cu e tabatin promé, i nan a bira bon amigu atrobe. Kisas bo amigu tambe lo haci mescos. Sí, a lo largu, tur hende concerní ta beneficiá dor di hancha nan mes. Debbie di dieshete aña ta ripará cu ora su amiganan haña amiga nobo, “hopi bes nan ta bira mi amiganan tambe.”

Pero, kico si bo amigu ta nenga di aceptá e cambionan aki den boso relacion? Kisas boso no tin otro opcion cu separá for di otro. Sin embargo, promé cu yega n’e conclusion cu no por haci nada mas, pakico no puntra bo mayornan kico nan ta pensa? Al fin i al cabo, eigenlijk bo amigunan mas íntimo ta bo mayornan temeroso di Dios. I nan lo por tin algun sugerencia práctico cu por yudá bo salba e amistad sin comprometé bo necesidad di privacidad.

Pasa Tempu cu Bon Amigu

Un palabra di cautela: Hancha bo mes no ta nificá cu bo no mester wak bon cua amigunan bo ta scoge. Un buki riba amistad ta bisa: “Ta natural cu bo ta bira mescos cu e hendenan cu ken bo ta pasa hopi tempu cuné. Tin biaha esaki por sosodé sin cu bo sa. Lo bo por cuminsá pensa i haci manera bo pareunan, maske ki bo sintimentunan ta. Asina, bo por ta bou dje control di bo pareunan.” Bijbel a señalá e mésun punto aki miles di aña pasá ora el a bisa: “Esun cu ta cana cu hende sabí lo bira sabí, pero esun cu tin trato cu hende estúpido lo bai malu cuné.”—Proverbionan 13:20.

Ora bo ta na scol of na trabou, lo bo mester pasa tempu cu hende cu no ta interesá pa sirbi Jehova. Pero ora di scoge compañeronan íntimo, corda e conseho di Bijbel: “Mal compañero ta daña bon caracter.”—1 Corintionan 15:33, Today’s English Version.

Corda tambe cu e amistad mas importante cu tur amistad humano ta bo amistad cu nos Creador, Jehova Dios. Debbie, citá anteriormente, tin vários bon amigu. Tog e ta consehá pa “haci sigur cu Jehova semper ta bini na promé lugá.” Fiel Abraham di antigwedad a haci esei, i Jehova a yam’é specialmente “mi amigu.” (Isaías 41:8) I pensa esaki: Jehova no ta contra pa bo pasa tempu cu bo amigunan cu tambe ta stim’é; e ta asta animá bo pa haci esei. Esta un berdadero Amigu e ta!

[Plachi na página 18]

Berdadero amigu ta reconocé cu cada un tin mester di tempu pa nan mes