Erornan Comun Tocante Colebra
Dje Coresponsal Di Spierta! Na India
E cobra lebelebe a lastra bai cerca e mucha muher, atraí pa e holó di flor di hasmin den su cabei. Su curpa largu tabata ondulá manera ola di laman. E mucha muher a mira algu manera un hoya briyante na frenta dje cobra, miéntras e tabata hipnotisá e mucha muher cu su mirada. Di ripiente, el a bula den laira i a morde e mucha muher na su brasa.
ECHO of mito? Henter e cuadro pintá aki ta un cuenta falsu. E ta basá riba malcomprendimentunan comun. Considerá algun dje conceptonan robes aki.
1. Hasmin, sandelhout i otro holónan ta atraé colebra. FALSU. E holó ta atraé insecto, e insectonan ta atraé sapu, i e sapunan, cu ta parti dje dieta di colebra, ta atraé colebra.
2. Colebra ta move dor di ondulá su curpa verticalmente. FALSU. Bo ta haña e impresion aki ora colebra pasa riba barancanan grandi. E movementu normal di cobra i otro colebra di tera ta horizontal, den un liña stret. E ta sea rek e parti dilanti di su curpa promé i despues ta hala e parti patras, of cu yudansa di cualkier cos riba suela, e ta pusha di banda bai dilanti, loke ta hacié parce e letter S.
3. Tin colebra cu tin un piedra precioso den nan cabes. FALSU. Un mito. Tambe ta falsu cu cobra tabata protehá hombernan importante di antiguo India.
4. Cobra ta hipnotisá su víctima. FALSU. Por lo general e colebra ta keda wak un caminda ora e tin miedu, di manera cu hende cu topa cu un colebra por haña e impresion cu e tin un mirada fihá i hipnótico. Sin embargo, esaki no ta un di su métodonan pa atrapá su víctima.
5. Cobra ta bula bai riba su víctima. FALSU. Cobra ta tira e parti dilanti di su curpa padilanti pa atacá su víctima, pero mayor parti di su curpa ta keda riba suela unda e ta ancra su curpa. Mas cu e por lanta ta un tercer parti di su curpa pa atacá.
6. E cueru di colebra, incluyendo cobra, ta lebelebe i semper friu. FALSU. E cueru di colebra, cu su scamanan, ta secu i ora ful’é e ta manera cueru suave. Colebra ta bestia sanger friu; e temperatura di su curpa ta cambia segun e temperatura externo.
7. Cobra ta surdu. FALSU. Un concepto robes di hopi hende. Nan ta kere cu e único cos cu e colebra ta tende ta vibracion den suela cu su curpa ta capta. Bijbel ta implicá corectamente na Salmo 58:4, 5, cu cobra no ta surdu. Investigacion recien a mustra cu cobra por tende zonido den aire i cu e ta respondé na e música dje encantadó di colebra.—Mira tambe e ¡Despertad! di 22 di juli 1993, página 31.
[Plachi Rekonosementu na página 15]
Colebra ariba: Animals/Jim Harter/Dover Publications, Inc.