For Di Nos Lectornan

Atake Celebral E seri “Con pa Trata cu Atake Celebral” (8 di februari 1998) tabata un contesta riba mi oracion. Un par di aña pasá, ami cu mi esposo tabata na un congreso cristian, ora el a haña un atake celebral. Ora e tabata purbando pa skirbi un nota pa mi, su man a hala bai riba e papel; henter su banda drechi a keda afectá. E artículo a haci mas pa mi cu lo mi por expresá. Ta maraviyoso pa sa cu Jehova no a lubidá nos.

F. S. H., Merca

Un par di ora promé cu mi a ricibí e revista aki, mi tabata purba, sin éxito, na splica mi esposa con mi tabata sintí mi, pero mi no por a expresá mi mes manera lo mi tabata kier debí cu mi a haña un atake celebral. Mi a lesa e revista aki tres biaha caba. Mi esposa tambe a les’é.

R. Z., Italia

Mi tata, un fiel sirbidó di Jehova pa hopi aña, a muri aña pasá di un atake celebral. E artículo a yudá mi comprendé su comportacion promé cu el a fayecé. E splicacion tocante cambionan emocional, i tambe pakico un víctima di atake celebral lo por tin dificultad pa comunicá, a yudá mi comprendé un tiki mas mihó kico mi tata tabata pasando aden.

V. C., Merca

Mi a sufri un atake celebral un aña pasá i ainda mi ta lucha cu e debilidad na mi banda robes. E artículonan aki lo kita un tiki dje misterio i miedu relacioná cu atake celebral. Ta un mito cu ta hende bieu so ta haña atake celebral. Ami tabatin 47 aña so ora ami a hañ’é.

A. A., Inglatera

E artículo a yudá mi masha hopi pa comprendé mi yu muher Lucia kende a haña un lesion hopi serio na su cabes den un accidente di auto tempu e tabatin dos luna. E no por expresá su sintimentunan. Pero, e artículo a yudá mi comprendé di con no.

N. K., Slovakia

Mi ta un verpleegster diplomá, specialisá den rehabilitacion i tin hopi experencia cu víctimanan di atake celebral. Loke mi a apreciá asina tantu dje artículo aki ta e manera berdaderamente comprensivo cu el a describí loke famianan dje víctimanan di atake celebral ta pasa aden.

L. C., Merca

Mi mama a haña un TIA. For di un punto di bista físico, el a recuperá casi completamente. Pero el a keda cu heridanan sicológico profundo. E tabata un persona fuerte i sigur di su mes, pero awor e ta sumamente frágil. Danki pa resaltá e impacto sicológico dje malesa aki.

R. C., Italia

Dos aña pasá mi mama a haña dos atake celebral. E promé a pon’é perde su memoria, i e di dos a lagu’é paralisá na su banda drechi. Tin biaha mi ta perde pacenshi cuné i ta bisa cos cu ta hacié tristu. Boso artículo a animá mi pa ta mas comprensivo.

R. T. S., Brazil

Variedad Cristian Un danki sincero pa e artículo “E Punto di Bista Bíblico: Unidad Cristian Ta Permití Variedad?” (8 di februari 1998) Mas mi conocé Jehova, mas contentu mi ta di ta pertenecé na su organisacion, den cua nos ta disfrutá di un gran variedad di personalidad.

I. P., Slovenia

Mi tin 15 aña di edad i mi ta lesa Spierta! regularmente. Mi a gusta foral e artículo aki masha hopi. Un seccion a papia tocante e Paradijs i con lo e ta. Mi tabata puntra mi mes con hende perfecto lo ta i si nos tur lo ta mescos den aparencia i pensamentu. Awor mi ta comprendé cu lo tin un gran variedad den tantu hende como bestia.

J. C., Merca