‘Con Boso Obra Ta Beneficiá Comunidad?’
ESAKI ta loke Chandrakant Patel, un periodista di India, a puntra un miembro di staf dje sede mundial di Testigonan di Jehova, na Brooklyn, New York. Sr. Patel a bini pa haña un tour n’e facilidadnan i a keda asina impresioná cu loke el a mira i tende, cu asina el a yega India, el a skirbi un artículo pa un korant n’e idioma gujarati.
Sr. Patel a mustra e contraste entre algun dje creencianan di Testigonan di Jehova i esnan di iglesianan na India. El a skirbi cu Testigonan di Jehova ta kere den e Dios todopoderoso, Jehova, i no den e doctrina di Trinidad cu iglesianan en general ta siña. Tambe nan no ta usa imágen den nan adoracion. El a comentá cu Testigonan di Jehova tin principionan haltu, pasobra nan ta tene firmemente na e normanan cristian definí den Bijbel relacioná cu adulterio, aborto i odia of mata bo próhimo. El a describí e Testigonan como hende pacífico, amoroso, cu hopi pacenshi i cla pa sirbi otro hende. Tambe el a bisa cu nan ta intrépido i celoso den plama e mensahe di Bijbel na otronan.
Ki contesta e periodista a haña riba su pregunta: ‘Con boso obra ta beneficiá comunidad?’ El a skirbi: ‘E contesta tabata cu un educacion bíblico ta beneficioso den tur área di bida.’ Sr. Patel tabata kier a haña sa specíficamente en cuanto cuido médico i empleo. Citando partinan dje splicacion cu el a haña, el a skirbi: ‘Si un hende sigui e conseho bíblico pa evitá substancianan dañino manera tabaco i droga i ta hiba un bida limpi, tin vários malesa cu e por evitá di haña. I hende onrado i trahadó cu ta hiba un bida limpi, tin mas chens di haña trabou. Ademas, si bo por resolvé problemanan den un manera bondadoso i amoroso, lo bo tin bon relacion cu otro hende. Di manera cu siña hende loke Bijbel ta bisa ta beneficiá comunidad.’
E periodista aki a mira siñansanan bíblico den accion na e sede mundial di Testigonan di Jehova. Su artículo a elogiá con limpi i contentu e trahadónan boluntario dedicá ta n’e centro di actividad spiritual aki. Abo tambe por beneficiá di siñansanan bíblico. Gustosamente Testigonan di Jehova lo mustra bo con.
[Plachi Rekonosementu na página 31]
Korant den fondo: Cortesia di Naya Padkar, Gujarati Daily publicá na Anand, India