Transfusion di Sanger Ta Egt Necesario?

NOVEMBER pasá a plantia e pregunta aki den un artículo di korant skirbí pa dr. Ciril Godec, presidente dje departamento di urologia na Long Island College Hospital, Brooklyn, New York. El a skirbi: “Awe probablemente lo no a aprobá sanger como remedi, pasobra lo e no a cumpli cu e reglanan di siguridad dje Administracion di Alimento i Remedi. Sanger ta un órgano, i transfusion di sanger no ta nada ménos cu un transplante di órgano.”

Dr. Godec a remarcá: “Transplante di órgano ta e último opcion di tratamentu cu ta ofrecé pashentnan. Debí na e posibel efectonan secundario hopi serio, ta informá pashentnan cabalmente di tur e posibel alternativanan promé cu efectuá un transplante.” Relacioná cu transfusion di sanger, el a yega na e conclusion aki: “E beneficio di dje ta asina cuestionabel cu hopi ciruhano a adoptá un filosofia di ‘evitá transfusion,’ no solamente pa motibunan médico, sino tambe pa motibunan legal.”

Un problema grandi di transfusion di sanger ta cu miles di hende a ser infectá cu malesanan mortífero, manera AIDS. Aunke na hopi lugá a mehorá e métodonan di ‘screen’ sanger, dr. Godec a señalá: “Ta existí un posibel peliger ora e donante di sanger ta infectá, pero ainda no a desaroyá anticurpa cu lo por ser detectá cu testnan di screening.”

Concluyendo su artículo, dr. Godec a trata e pregunta mencioná ariba: “Segun cu dokter i ciruhanonan ta desaroyá un mihó comprendimentu dje manera cu sanger ta transportá oxígeno i ta reconocé cu nivelnan di hemoglobina no tin cu ta mes haltu cu nan a pensa ántes, casi semper ta posibel pa haña alternativanan pa transfusion. Apénas un aña pasá e operacionnan pisá di transplante di curason i higra tabata bai acompañá cu asina tantu perdementu di sanger, cu semper nan tabata obligá na usa cantidadnan masha grandi di sanger pa reemplasá e pérdida. Awor, a logra efectuá tur dos procedura sin tin cu recurí na transfusion.

E probabilidad ta hopi grandi cu den un futuro masha cercano lo eliminá transfusion completamente. . . . Transfusion no ta solamente caru, sino tambe peligroso; e nó ta e mihó cuido cu pashentnan ta merecé.”