Un Epidemia Mundial di Odio

TIN un monster ta cana los, un monster cu yama odio. I e ta tur caminda na mundu.

Den paisnan di Balkan tin un provincia cu ainda ta sufri dje dolornan di un reciente campaña di purificacion étnico. Enemistadnan di siglonan bieu a hiba na ehecucionnan masal, violacion, expulsion, kimamentu i plundermentu di cas i pueblitonan, destruccion di cosecha i tou di bestia, i hamber. Ainda tin masha hopi mina di tera.

Den Oost Timor, Zuidoost Asia, 700.000 hende tur spantá tabatin cu hui dje teror di matansa, sutamentu, tiramentu pa loco i mudansa forsá. Nan a bai laga un paisahe destrosá dor di asaltantenan semi-militar. “Mi ta sinti mi manera un bestia cu nan ta yag riba dje,” un dje víctimanan a sclama.

Un inmenso explosion di un bom terorista a destruí un edificio di flet na Moscú. Curpa di 94 hende inocente—algun di nan mucha—a keda plamá tur caminda dor dje explosion. Mas cu 150 hende a ser heridá. Despues di tal horor, hende ta puntra: ‘Ken lo sigui?’

Na Los Angeles, California, un homber racista a tira riba un grupo di mucha chikitu hudiu i despues a tira un partidó di carta filipino mata.

Por bien describí odio como un epidemia mundial. Casi tur dia, informenan di noticia ta revelá loke ta sosodé ora enemistad racial, étnico of religioso djoin cu falta di respet pa ley. Nos ta mira nacion i comunidad i famianan tur dividí. Nos ta mira paisnan enbolbí den genocidio masal. Nos ta mira actonan inhumano horibel ser cometé djis pasobra algun hende ta “otro.”

Pa un dia por encarcelá e monster cu yama odio, nos tin cu comprendé e causa di tal violencia yen di odio. Odio ta implantá den gene humano? E ta un actitud cu bo ta siña? Ta posibel kibra e ciclo di odio?

[Rekonosementu pa Potrèt na página 3]

Kemal Jufri/Sipa Press