Di Guerero pa Hasidó di Pas

E Spièrta! na spañó di 8 di desèmber 2002 tabatin e eksperensia di Toshiaki Niwa, un eks-piloto hapones ku a ser entrená pa mishonnan suisida durante Segundo Guera Mundial. Niwa a konta ku na ougùstùs 1945, e tabata na un base serka di Kyoto wardando riba e órden pa efektuá un atake suisida kontra barkunan di marina merikano. E órden ei no a yega nunka pasobra djis un par di dia despues, e guera a terminá. Añanan despues Niwa a kuminsá studia Beibel ku Testigunan di Yehova. El a siña ku hende ku ta agradá Dios no ta partisipá den guera. Nan realmente ta respetá nan próhimo, sin importá na unda nan ta biba òf di ki nashon nan ta. (1 Pedro 2:17) Niwa, un eks-guerero, awor ta un hasidó di pas ku ta kompartí ku otro hende e mensahe unifikador di e Palabra di Dios.

E relato di Niwa, a konmové Russell Werts di Merka, pasobra e tambe a bringa den e mesun guera, pero na e otro banda. Werts a skirbi den un karta pa Niwa: “Bo a konta ku na ougùstùs 1945 bo tabata serka di Kyoto wardando riba e binidero invashon. Na e mesun tempu ei, ami tabata den e etapanan final di training pa e invashon ei. Si e guera no a terminá na e tempu ei, probablemente nos tur dos lo a muri na un banda di e bataya ei. Meskos ku abo ku bo famia, ami ku mi kasá a bira Testigu di Yehova despues. Ta masha dushi pa sa ku nos, ku un tempu tabata enemigu di otro, desididu pa mata otro, awor no solamente ta amigu sino ruman!”

Meskos ku Toshiaki Niwa i Russell Werts, tin hopi hende ku un tempu tabata enemigu mortal di otro ma ku awor ta biba den pas i unidat debí ku nan a studia i apliká Dios su Palabra, Beibel. Entre Testigunan di Yehova tin hudiu ku arabir, armenio ku turko, aleman ku ruso, hutu ku tutsi, kendenan ta demostrá ku nan ta berdadero kristiannan. De echo, Hesus a bisa: “Na esaki tur hende lo sa ku boso ta mi disipel, si boso tin amor un pa otro.”—Juan 13:35.

[Plachinan na página 14]

Toshiaki Niwa i Russell Werts durante Segundo Guera Mundial