Un Bishita na Spaña

SPAÑA tin diferente tipo di paisahe i hende di diferente rasa i kultura. Rònt Spaña tin kunuku di maishi, wendrùif i mata di oleifi. I solamente rònt di 14 kilometer di laman ta separá e parti zùit di Spaña for di Afrika.

Tin hopi hende ku a bai biba na e skina zùitwèst akí di Europa, entre otro, hende di Fenisia, Gresia i Cartago. Den siglo 3 promé ku Kristu, ora e romanonan a konkistá e teritorio ei, nan a yam’é Hispania. Despues e visigodonan i moronan a okupá e teritorio ei; nan tur a laga nan marka riba e kultura di Spaña.

Na aña 2015, mas ku 68 mion turista a bishitá Spaña. Mayoria di nan ta bai Spaña pa disfrutá di solo i di e playanan bunita, i tambe di e obranan di arte, ophetonan ku tin balor históriko i monumentonan. E kumindanan krioyo di Spaña ku ta bon konosí rònt mundu tambe ta atraé hopi turista. Esaki ta inkluí kuminda di laman, ham kurtí, stobánan sabroso, salada, i bèrdura sea kushiná òf sasoná ku zeta di oleifi, tortiya di batata, paella i tapas.

E hendenan di Spaña ta amigabel i masha habrí. Mayoria di nan ta katóliko, pero masha poko di nan ta bai misa. E último añanan hopi hende di Afrika, Asia i Latinoamérika a muda bai Spaña. Hopi di nan ta gusta papia tokante nan kreensianan i kustumbernan religioso. Testigunan di Yehova tabatin kòmbersashonnan produktivo ku nan i a yuda nan haña sa loke Beibel ta siña tokante vários tópiko.

Na aña 2015, mas ku 10.500 Testigu boluntariamente a yuda konstruí òf renobá 70 Salòn di Reino (lugánan kaminda nan ta reuní). Gobièrnu a duna nan tereno pa algun di e proyektonan ei. Pa yuda e estranheronan ku a muda bai Spaña, Testigunan di Yehova tin reunionnan den mas ku 30 idioma. Na 2016, mas ku 186.000 hende a asistí na e Sena di Señor pa rekordá e morto di Hesukristu.