E Propósito dje Foyeto Aki

E FILOSOFO hulandes Spinoza a skirbi: “Mi a trata pa no hari accionnan humano, pa no lamentá nan, ni pa odia nan, sino pa comprendé nan.” Como educador, bo ta enfrentá e desafio di trata di comprendé e punto di bista, antecedencia i creencianan dje alumnonan cu bo tin na bo encargo, incluyendo esnan cu ta yunan di Testigonan di Jehova. Tin biaha, e alumnonan ei por tuma loke ta parce di ta un posicion inconvencional en cuanto cierto cuestionnan. Pero ora tal accionnan claramente ta resultá for dje creencianan religioso i moral dje alumno, nan ta merecé bo atencion. E foyeto aki a ser producí dor di Watch Tower Bible and Tract Society (e agencia editorial di Testigonan di Jehova) i ta diseñá pa yudá bo comprendé mihó e alumnonan Testigo. Nos ta spera cu lo bo tuma e tempu pa les’é cuidadosamente.

Pa comprendé e creencianan religioso di un otro persona no ta necesario pa bo aceptá nan of sigui nan i informá no ta nificá combertí hende. E foyeto aki no kier trata di imponé e punto di bista religioso dje Testigonan riba bo of riba bo alumnonan. Nos deseo ta simplemente pa informá bo en cuanto e principionan i creencianan cu algun di bo alumnonan ta siña di nan mayornan di manera cu lo ta mas fácil pa bo comprendé e yunan di Testigo i tambe pa cooperá cu nan. Naturalmente, loke muchanan ta ser siñá no semper ta cuadra cu loke nan ta haci, ya cu cada mucha ta siña desaroyá su propio concenshi.

Mescos cu mayoria tata i mama, Testigonan di Jehova kier pa nan yunan saca e mayor probecho for di nan educacion. P’e motibu ei, nan ta siña nan yunan pa cooperá cu nan maestronan. En buelta, mayornan Testigo i nan yunan ta apreciá ora educadornan ta trata nan cu comprension i respet.

Testigonan di Jehova ta cristiannan cu ta conocí na tur parti di mundu. Sin embargo, tin biaha nan ta ser comprendé robes. P’esei, nos ta spera cu e foyeto aki lo yudá bo comprendé mihó e yunan di Testigo cu bo tin na bo encargo. Specialmente, nos ta spera cu lo bo comprendé pakico, den cierto situacionnan specífico, nan lo por reclamá nan derecho pa ta diferente.

[Plachi Rekonosementu na página 2]

KAFT: Fárao: The Complete Encyclopedia of Illustration/J. G. Heck. KAFT PATRAS: Piramid: For dje buki The Pictorial History of the World; Barbulet: The Complete Encyclopedia of Illustration/J. G. Heck