Lès 6

Kico Ta e Reino di Dios?

Na unda e Reino di Dios ta situá? (1)

Ken ta su Rey? (2)

Otronan ta participá den goberná cu e Rey? Si ta asina, cuantu? (3)

Kico ta mustra cu nos ta bibando den e último dianan? (4)

Kico e Reino di Dios lo haci pa humanidad den futuro? (5-7)

1. Ora Jesus tabata riba tera, el a siña su siguidornan pa pidi pa e Reino di Dios den oracion. Un reino ta un gobiernu cu tin un rey na mando. E Reino di Dios ta un gobiernu special. E ta establecí den shelu i lo goberná e tera aki. Lo e santificá, of haci santu, e nomber di Dios. Lo e haci cu Dios su boluntad lo tuma lugá riba tera mescos cu den shelu.—Mateo 6:9, 10.

2. Dios a primintí cu Jesus lo bira e Rey di Su Reino. (Lucas 1:30-33) Ora Jesus tabata riba tera, el a duna prueba cu lo e ta un Gobernante bondadoso, hustu i perfecto. Ora el a bolbe na shelu, e no a ser entronisá di biaha como Rey dje Reino di Dios. (Hebreonan 10:12, 13) Na 1914, Jehova a duna Jesus e autoridad cu El a primintié. Desde e tempu ei, Jesus a goberná den shelu como Dios su Rey nombrá.—Daniel 7:13, 14.

3. Tambe Jehova a scoge algun homber i muher fiel for di tera pa bai shelu. Nan lo goberná huntu cu Jesus como rey, hues i sacerdote riba humanidad. (Lucas 22:28-30; Revelacion 5:9, 10) Jesus a yama e personanan aki cu lo ta co-gobernante den su Reino un “trupa chikitu.” Nan ta 144.000 na cantidad.—Lucas 12:32; Revelacion 14:1-3.

4. Asina cu Jesus a bira Rey, el a tira Satanas i su angelnan malbado for di shelu i a benta nan n’e localidad dje tera. Ta p’esei cosnan a bira asina malu aki riba tera desde 1914. (Revelacion 12:9, 12) Guera, hamber, pest, aumento di maldad—tur esakinan ta parti di un “señal” cu ta indicá cu Jesus ta gobernando i cu e sistema aki ta den su último dianan.—Mateo 24:3, 7, 8, 12; Lucas 21:10, 11; 2 Timoteo 3:1-5.

5. Pronto Jesus lo husga hende, separando nan manera un wardador ta separá carné for di cabritu. E “carnénan” ta esnan cu lo a duna prueba di ta súbditonan leal di dje. Nan lo ricibí bida eterno riba tera. E “cabritunan” ta esnan cu lo a rechasá e Reino di Dios. (Mateo 25:31-34, 46) Den e futuro cercano, Jesus lo destruí tur esnan semehante di cabritu. (2 Tesalonicensenan 1:6-9) Si bo kier ta un di Jesus su “carnénan,” bo mester scucha n’e mensahe di Reino i actua di acuerdo cu loke bo ta siña.—Mateo 24:14.

6. E tera ta dividí awor den hopi pais. Cada un tin su mes gobiernu. Hopi biaha e nacionnan aki ta bringa cu otro. Pero e Reino di Dios lo reemplasá tur gobiernu humano. Lo e goberná como e único gobiernu riba henter e tera. (Daniel 2:44) E ora ei lo no tin guera, crímen ni violencia mas. Tur hende lo biba huntu den pas i unidad.—Mikéas 4:3, 4.

7. Durante e Reinado di Mil Aña di Jesus, hende fiel lo bira perfecto i henter e tera lo bira un paradijs. Na fin dje mil aña, Jesus lo a haci tur loke Dios a pidié haci. E ora ei lo e entregá e Reino bek na su Tata. (1 Corintionan 15:24) Pakico no conta bo amigunan i stimánan tocante loke e Reino di Dios lo haci?

[Plachi na página 13]

Bou dje reinado di Jesus, lo no tin odio ni prehuicio mas