Capítulo Dieshete

“Babilonia A Cai!”

Isaías 21:1-17

1, 2. (a) Kico ta e tema general di Bijbel, pero ki tema secundario importante ta aparecé den Isaías? (b) Con Bijbel ta desaroyá e tema dje caida di Babilonia?

BIJBEL por ser compará cu un gran obra musical cu tin un tema dominante, i na cua ta agregá temanan menor cu ta haci e totalidad masha único. Den un manera similar, Bijbel tin un tema principal: vindicacion di Jehova su soberania mediante e gobiernu dje Reino Mesiánico. Tambe e tin otro temanan importante cu ta keda bini bek. Un di esakinan ta e caida di Babilonia.

² E tema ei ta ser introducí den Isaías capítulo 13 i 14. E ta bolbe aparecé den capítulo 21 i atrobe den capítulo 44 i 45. Un siglo despues, Jeremías ta elaborá riba e mésun tema, i e buki di Revelacion ta hib’é na un conclusion extraordinario. (Jeremías 51:60-64; Revelacion 18:1–19:4) Tur studiante serio di Bijbel mester ta interesá den e tema secundario importante aki dje Palabra di Dios. Isaías capítulo 21 ta yuda den esaki, pasobra e ta suministrá detayenan fasinante tocante e caida profetisá dje gran potencia mundial ei. Despues, nos lo mira cu Isaías capítulo 21 ta enfatisá un otro tema bíblico importante, unu cu ta yuda nos evaluá nos vigilancia como cristian awe.

“Un Vision Duru”

3. Di con Bijbel ta yama Babilonia “e desierto di laman,” i kico e título aki ta indicá relacioná cu su futuro?

³ Isaías capítulo 21 ta habri cu palabranan cu ta pinta scur: “E declaracion formal contra e desierto di laman: Manera bientunan di tempestad den zuid cu ta move padilanti, for di desierto e ta bini, for di un tera inspirador di temor.” (Isaías 21:1) Babilonia ta situá na tur dos banda di riu Eufrátes, cu su parti oost den e region entre e dos riunan grandi Eufrátes i Tígris. E ta basta leu for di laman mes. Di con anto e ta ser yamá “e desierto di laman”? Debí cu tur aña e region di Babilonia sa inundá, creando un inmenso “laman” di lodo. Sin embargo, e babilonionan a dominá e desierto di laman aki dor di crea un sistema complicá di dijk, sluis i canal. Den un forma ingenioso nan ta usa e awanan aki como parti dje sistema di defensa dje stad. Pero tog niun obra humano lo spar Babilonia di huicio divino. Ántes e tabata un desierto, i lo e bolbe bira un desierto. Calamidad ta biniendo den su direccion, formando manera un dje tormentanan feros cu tin biaha sa pasa riba Israel biniendo for dje desierto spantoso cu tin den zuid.—Compará cu Zacarías 9:14.

4. Con e vision di Revelacion tocante “Babilonia e Grandi” ta incluí e elementonan di “awa” i “un desierto,” i kico e “awa” ta nificá?

⁴ Manera nos a siña den Capítulo 14 dje buki aki, antiguo Babilonia tin un ekivalente moderno: “Babilonia e Grandi,” e imperio mundial di religion falsu. Den Revelacion tambe Babilonia e Grandi ta ser describí en coneccion cu “un desierto” i “awa.” Apostel Juan ta ser hibá na un desierto p’e mira Babilonia e Grandi. E angel ta bis’é cu Babilonia ta “sinta riba hopi awa” i ta representá “pueblo i multitud i nacion i lenga.” (Revelacion 17:1-3, 5, 15) Apoyo popular tabata semper e clave cu a contribuí na sobrebibencia di religion falsu, pero na final e ‘awanan’ ei lo no proteh’é. Mescos cu su antiguo ekivalente, lo e terminá bashí, neglishá i desolá.

5. Con Babilonia ta gana e reputacion di ta “traidor” i unu “cu ta plunder cu violencia”?

⁵ Den tempu di Isaías, Babilonia no ta un potencia mundial dominante ainda, pero Jehova a premirá caba cu ora su tempu yega, lo e malusá su poder. Isaías ta sigui bisa: “Ami a ser informá di un vision duru: E traidor ta trata cu traicion, i esun cu ta plunder cu violencia ta plunder cu violencia.” (Isaías 21:2a) En berdad Babilonia lo plunder violentamente e nacionnan cu e conkistá i lo trata nan cu traicion, incluyendo Huda. E babilonionan lo sakea Jerusalem, plunder su tempel i hiba su pueblo prezu na Babilonia. Einan, e prezunan indefenso aki lo ser tratá cu traicion, ridiculisá pa nan fe i lo no ofrecé nan ningun speransa di regresá nan patria.—2 Crónicanan 36:17-21; Salmo 137:1-4.

6. (a) Jehova lo pone un fin na ki suspiro? (b) Segun e profecia, cua ta e nacionnan cu lo atacá Babilonia i con esaki ta cumpli?

⁶ Sí, Babilonia ta merecé e “vision duru” aki, cu lo nificá tempu duru p’e. Isaías ta sigui bisa: “Subi, o Elam! Siti’é, o Media! Mi a stop tur suspiro pa su causa.” (Isaías 21:2b) Esnan oprimí dor dje imperio aki cu ta trata cu traicion, lo haña alivio. Por fin nan lo stop di suspirá! (Salmo 79:11, 12) Kico lo trece e alivio aki? Isaías ta mencioná dos nacion cu lo atacá Babilonia: Elam i Media. Dos siglo despues, na aña 539 P.E.C., Ciro e perso ta dirigí un ehército combiná di perso i medo contra Babilonia. Pa loke ta Elam, monarcanan perso lo tin por lo ménos un parti dje tera ei den nan posesion promé cu aña 539 P.E.C.a Pues e ehército perso lo incluí habitantenan di Elam.

7. Con e vision di Isaías ta afect’é, i kico esei ta nificá?

⁷ Tuma nota con Isaías ta describí e efecto cu e vision aki tin riba dje: “Ta p’esei mi heupnan ta yen di dolor fuerte. Sí, kram a poderá di mi, manera kram di un muher cu ta duna lus. Mi a confundí di manera cu mi no ta tende; mi a perturbá di manera cu mi no ta mira. Mi curason a cana dual; sí, un temblamentu mes a spanta mi. Ceramentu di anochi, pa cua mi tabatin un apego, a bira algu di tembla pa mi.” (Isaías 21:3, 4) Parce cu e profeta ta gusta ora anochi ta cerando, un bon ora pa meditá den tur trankilidad. Pero awor ceramentu di anochi a perde su encanto, i en bes di esei ta trece solamente miedu, dolor i temblamentu. E ta sufri di kram manera di un muher cu ta duna lus, i su curason “a cana dual.” Un erudito ta traducí e frase aki cu “mi curason a bati pa loco,” comentando cu e expresion ta referí na “un pulso agitá i iregular.” Pakico tantu angustia? Evidentemente, Isaías su sintimentunan ta profético. Durante e anochi di 5 pa 6 di october 539 P.E.C., e babilonionan lo experenciá un teror similar.

8. Manera a ser profetisá, con e babilonionan ta actua maske nan enemigunan ta pafó di muraya dje stad?

⁸ Segun cu ta bira scur e anochi decisivo ei, teror ta e último cos cu e babilonionan ta pensa ariba. Rond di dos siglo di antemano Isaías ta profetisá: “Laga drecha mesa, regla e camindanan di sinta, un comementu, un bebementu!” (Isaías 21:5a) Sí, e rey arogante Bélsasar ta organisá un bankete. Tin asiento prepará pa mil di su noblenan, i tambe pa hopi esposa i concubina. (Daniel 5:1, 2) E paranderonan sa cu tin un ehército pafó di muraya, pero nan ta kere cu nan stad ta invencibel. Su murayanan masivo i e canal hundu rond di dje ta laga parce cu ta imposibel pa captur’é; e hopi diosnan cu e tin ta haci su captura impensabel. Pues, laga tin “un comementu, un bebementu!” Bélsasar ta bira burachi, i probablemente no ta e so. E siguiente palabranan profético di Isaías cu ta bisa cu mester lanta e alto funcionarionan, ta sugerí cu kisas nan tambe ta tur zonzá.

9. Di con ta bira necesario pa “ungi e escudo”?

⁹ “Lanta ariba, prinsnan, ungi e escudo.” (Isaías 21:5b) Di ripiente, fiesta a caba. E prinsnan tin cu lanta ariba! Nan a manda yama e profeta di edad Daniel, i e ta mira con Jehova ta hinca e rey babilonio Bélsasar den un estado di teror similar na loke Isaías a describí. E noblenan dje rey ta keda tur confundí segun cu e ehércitonan combiná di medo, perso i elamita ta pasa dor dje defensanan dje stad. Babilonia ta cai lihé! Sin embargo, kico kier men “ungi e escudo”? Tin biaha Bijbel ta referí na rey di un nacion como su escudo pasobra e ta e defensor i protector dje pais.b (Salmo 89:18) Pues e versículo aki di Isaías probablemente ta predicí cu lo bai tin mester di un rey nobo. Di con? Pasobra Bélsasar ta ser matá “e anochi ei mes.” Pues mester “ungi e escudo,” esta, nombra un rey nobo.—Daniel 5:1-9, 30.

10. Ki consuelo adoradónan di Jehova por saca for dje cumplimentu dje profecia di Isaías relacioná cu e traidor cu ta trata cu traicion?

¹⁰ Tur amante di adoracion berdadero ta saca consuelo for dje relato aki. Babilonia moderno—esta Babilonia e Grandi—mescos cu su ekivalente di antiguo, ta un traidor i unu cu ta plunder cu violencia. Te cu awe lidernan religioso ta conspirá pa prohibí Testigonan di Jehova, persiguí nan of cobra nan belasting exageradamente haltu. Pero manera e profecia aki ta recordá nos, Jehova ta mira tur e tipo di tratonan traicionero ei, i lo e no laga nan sin castigu. Lo e pone fin na tur religion cu ta malrepresent’é i cu ta maltratá su pueblo. (Revelacion 18:8) Un cos asina ta posibel? Pa edificá nos fe, nos tin cu djis mira con su spiertamentunan relacioná cu e caida di tantu antiguo Babilonia como di su ekivalente moderno ya a cumpli caba.

“El A Cai!”

11. (a) Kico ta e responsabilidad di un vigilante, i ken ta activo como vigilante awe? (b) Kico e garoshinan di guera di buricu i di camel ta representá?

¹¹ Awor Jehova ta papia cu e profeta. Isaías ta informá: “Esaki ta loke Jehova a bisa mi: ‘Bai, pone un vigilante pa e por bisa precis kico e ta mira.’” (Isaías 21:6) E palabranan aki ta introducí un otro tema importante dje capítulo aki: e tema dje vigilante. Esaki ta interesá tur cristian berdadero awe, pasobra Jesus a urgi su siguidónan pa “sigui vigilá.” “E esclabo fiel i discreto” nunca a stop di anunciá kico e ta mira relacioná cu con cerca Dios su dia di huicio ta i tocante e peligernan dje mundu corupto aki. (Mateo 24:42, 45-47) Kico e vigilante dje vision di Isaías ta mira? “El a mira un garoshi di guera cu un par di cabai, un garoshi di guera di buricu, un garoshi di guera di camel. I el a paga bon tinu, cu un disposicion hopi atento.” (Isaías 21:7) Cada un dje garoshinan di guera aki probablemente ta representá fila di garoshi cu ta avansá den formacion di bataya cu e velocidad di cabai entrená. E garoshinan di guera di buricu i esnan di camel apropiadamente ta representá e dos potencianan, Media i Persia, cu lo uni pa lansa e atake aki. Ademas, historia ta confirmá cu e ehército perso a usa tantu buricu como camel den guera.

12. Ki cualidadnan e vigilante dje vision di Isaías ta desplegá, i ken tin mester dje cualidadnan aki awe?

¹² Anto e vigilante ta hañ’é obligá di duna un informe. “I el a grita manera un leon: ‘Riba e toren di vigilancia, o Jehova, mi ta pará constantemente di dia, i na mi puesto di warda mi ta stacioná tur anochi. I awor, wak, aki ta bini un garoshi di guera di hombernan, cu un par di cabai!’” (Isaías 21:8, 9a) E vigilante dje vision ta grita cu curashi, “manera un leon.” Bo mester di curashi pa anunciá na bos haltu un mensahe di huicio contra un nacion asina formidabel manera Babilonia. Mester di un cos mas tambe: awante. E vigilante ta keda na su puesto di dia i anochi, i nunca ta laga su vigilancia mengua. Di igual manera, e clase di vigilante den e último dianan aki tin mester di curashi i awante. (Revelacion 14:12) Tur cristian berdadero tin mester dje cualidadnan aki.

13, 14. (a) Kico ta sosodé cu antiguo Babilonia, i den ki sentido su ídolonan ta ser kibrá na werki? (b) Con i na ki tempu Babilonia e Grandi a sufri un caida similar?

¹³ E vigilante dje vision di Isaías ta mira un garoshi di guera avansá. Kico ta e noticia? “El a cuminsá papia i bisa: ‘El a cai! Babilonia a cai, i tur e imágennan grabá di su diosnan el a kibra na werki riba tera!’” (Isaías 21:9b) Esta un informe emocionante! Por fin, e traidor aki cu a plunder Dios su pueblo cu violencia, a cai!c Pero den ki sentido ta kibra Babilonia su imágennan i ídolonan grabá? Ta e invasornan medo-perso lo marcha drenta e tempelnan di Babilonia i destrosá e cantidad incontabel di ídolo cu tin? No, e tipo di cosnan ei no ta necesario. E ídolonan di Babilonia lo ser kibrá na werki den e sentido cu ta saca na cla cu nan no por haci nada pa protehá e stad. I Babilonia lo experenciá un caida ora cu e no por sigui oprimí Dios su pueblo mas.

¹⁴ Kico di Babilonia e Grandi? Dor di conspirá pa oprimí e pueblo di Dios durante Promé Guera Mundial, en berdad el a tene nan den exilio pa un tempu. Casi a para nan trabou di predicá. Nan a encarcelá e presidente i otro funcionarionan prominente di Sociedad Watch Tower a base di acusacionnan falsu. Pero na aña 1919 a bini un cambio asombroso. E funcionarionan a ser liberá, a bolbe habri e sede principal i a start di nobo cu e trabou di predicá. Pues, Babilonia e Grandi a cai den e sentido cu a kibra e gara cu e tabatin riba e pueblo di Dios.d Na Revelacion, un angel ta proclamá e caida aki dos biaha, usando e palabranan dje anuncio na Isaías 21:9.—Revelacion 14:8; 18:2.

15, 16. Den ki sentido e pueblo di Isaías ta ‘esnan batí,’ i kico nos por siña di Isaías su actitud pa cu nan?

¹⁵ Isaías ta concluí e mensahe profético aki cu palabranan di compasion pa cu su propio pueblo. E ta bisa: “O, mi pueblo batí i e yu di mi plenchi di bati cosecha, loke mi a tende di Jehova di ehércitonan, e Dios di Israel, mi a informá boso.” (Isaías 21:10) Den Bijbel, bati cosecha cu frecuencia ta simbolisá disipliná i refiná Dios su pueblo. E pueblo cu tin un pacto cu Dios lo bira ‘yunan dje plenchi di bati cosecha,’ caminda ta cu forsa ta separá trigu for di bagas, lagando solamente e granonan refiná i deseabel. Isaías no ta alegrá riba e disiplina aki. Mas bien, e tin compasion pa e futuro ‘yunan dje plenchi di bati cosecha,’ di cua algun di nan lo pasa henter nan bida como prezu den un pais stranhero.

¹⁶ Esaki por sirbi como un recordatorio práctico pa nos tur. Den e congregacion cristian awe, algun persona kisas ta incliná na no sinti compasion pa malechor. I esnan cu ricibí disiplina hopi bes ta cla pa rabia. Sin embargo, si nos tene na mente cu Jehova ta disipliná su pueblo afin di refin’é, nos lo no despreciá e disiplina ni esnan cu ta acept’é cu humildad ni tampoco nos lo resistié ora e ta dirigí na nos. Laga nos aceptá Dios su disiplina como un expresion di su amor.—Hebreonan 12:6.

Puntrando e Vigilante

17. Di con Edom ta ricibí e nomber apropiado “Duma”?

¹⁷ E di dos mensahe profético di Isaías capítulo 21 ta duna mas prominencia na e personahe dje vigilante. E ta cuminsá: “E declaracion formal contra Duma: Tin un persona ta grita mi for di Seir: ‘Vigilante, kico dje anochi? Vigilante, kico dje anochi?’” (Isaías 21:11) Unda e Duma aki ta keda? Evidentemente tabatin vários pueblo cu e nomber ei den tempu bíblico, pero aki e no ta referí na niun di nan. No tin Duma den Seir, cu ta un otro nomber pa Edom. Sin embargo, “Duma” ta nificá “Silencio.” Pues ta parce cu ta duna e region un nomber cu ta indicá algu di su futuro, mescos cu tabata e caso cu e declaracion formal anterior. Edom, cu pa hopi tempu tabata un enemigu vengativo di Dios su pueblo, lo terminá den silencio, e silencio di morto. Pero promé cu esei sosodé, lo tin algun hende ta puntra ansiosamente tocante e futuro.

18. Con e declaracion formal: “Mainta tin cu bini, i anochi tambe,” a cumpli riba antiguo Edom?

¹⁸ N’e tempu dje skirbimentu di Isaías, Edom ta den caminda dje poderoso ehército asirio. Tin hende den Edom ta anhelá pa sa na ki tempu e anochi di opresion lo terminá pa nan. E contesta? “E vigilante a bisa: ‘Mainta tin cu bini, i anochi tambe.’” (Isaías 21:12a) Cos no ta pinta bon pa Edom. Un rayo di mainta lo briya na horizonte, pero lo e ta pa un momento, manera un ilusion. Anochi—un otro periodo scur di opresion—lo sigui djis despues dje mainta. Ki un bon representacion dje futuro di Edom! E opresion asirio lo terminá, pero Babilonia lo sigui Asiria como potencia mundial i lo caba cu Edom. (Jeremías 25:17, 21; 27:2-8) Anto e ciclo aki lo bolbe ripití su mes. Despues di opresion babilónico lo sigui opresion perso i despues griego. Anto lo tin un periodo breve di “mainta” durante e temporada romano, ora cu famia Herodes—di orígen edomita—ta subi na poder na Jerusalem. Pero e “mainta” ei lo no dura. Finalmente, Edom lo baha permanentemente den silencio, disparciendo for di historia. Por fin e nomber Duma lo cuadra bon cuné.

19. Kico e vigilante kisas kier men ora e ta bisa: “Si boso kier puntra, puntra. Bini atrobe!”?

¹⁹ E vigilante ta concluí su mensahe breve cu e palabranan: “Si boso kier puntra, puntra. Bini atrobe!” (Isaías 21:12b) E expresion “Bini atrobe!” kisas ta referí na e cantidad sinfin di ‘anochi’ cu ta warda Edom. Of como cu por traducí e expresion ei tambe como “bolbe bek,” e profeta kisas ta sugerí cu cualkier edomita cu kier scapa e condenacion dje nacion mester repentí i “bolbe bek” na Jehova. Den ámbos caso, e vigilante ta invitá pa haci mas pregunta.

20. Di con e declaracion formal registrá na Isaías 21:11 i 12 ta importante pa Jehova su pueblo awe?

²⁰ E declaracion formal corticu aki a nificá hopi pa Jehova su pueblo den nos tempu.e Nos ta comprendé cu humanidad ta leu den e anochi scur di cieguedad spiritual i alehá di Dios, loke lo hiba na destruccion dje sistema di cosnan aki. (Romanonan 13:12; 2 Corintionan 4:4) Durante e anochi aki, cualkier rayo di speransa cu por tin, cu humanidad di un manera of otro lo por trece pas i siguridad, ta manera e rayonan engañoso di aurora cu ta ser siguí pa un tempu mas scur ainda. E berdadero aurora of mainta ta acercando, e mainta di Cristo su Reinado di Mil Aña riba e tera aki. Pero tanten cu ta anochi, nos tin cu sigui e guia dje clase di vigilante dor di keda spiritualmente alerto i anunciá cu curashi con cerca e fin dje sistema di cosnan corupto aki ta.—1 Tesalonicensenan 5:6.

Ta Bira Anochi Riba e Yanura di Desierto

21. (a) Kico por ta e intencion dje wega di palabra den e frase “e declaracion formal contra e yanura di desierto”? (b) Kico ta e caravananan di hombernan di Dedan?

²¹ E declaracion formal final di Isaías capítulo 21 ta dirigí contra e “yanura di desierto.” E ta cuminsá: “E declaracion formal contra e yanura di desierto: Den mondi den e yanura di desierto boso lo pasa anochi, o caravananan di hombernan di Dedan.” (Isaías 21:13) E yanura di desierto ta referí evidentemente na Arabia, pasobra e declaracion ta ser dirigí na vários tribu arabir. E palabra pa “yanura di desierto” tin biaha ta ser traducí como “anochi,” cu na hebreo ta un palabra hopi similar. Tin hende ta kere cu esaki ta un wega di palabra, como si fuera un anochi scur—un tempu di problema—ta a punto di bini riba e region aki. E declaracion formal ta cuminsá cu un esena nocturno presentando caravananan di hombernan di Dedan, un tribu arabir prominente. Normalmente e caravananan ei ta sigui rutanan comercial for di un oásis pa otro, cargando specerei, perla i otro tesoronan. Pero aki nos ta mira con anochi nan ta ser obligá di bandoná nan rutanan hopi usá pa bai sconde. Di con?

22, 23. (a) Ki carga aplastante ta a punto di bini riba e tribunan arabir, i ki efecto esei lo tin riba nan? (b) Con lihé e desaster ei lo bini, i na ken su man?

²² Isaías ta splica: “Pa sali contra esnan cu tin sed, trece awa. O habitantenan dje tera di Tema, presentá dilanti esun cu ta hui cu pan p’e. Pasobra debí n’e spadanan nan a hui bai, debí n’e spada sacá, i debí n’e boog di span i debí n’e peso di guera.” (Isaías 21:14, 15) Sí, e carga aplastante di guera lo cai riba e tribunan arabir aki. Tema, situá na un dje oásisnan cu mas hopi awa den e region, ta ser obligá na trece awa cu pan pa e refugiadonan desampará di guera. Na ki tempu nan lo haña nan den e pertá aki?

²³ Isaías ta sigui bisa: “Esaki ta loke Jehova a bisa mi: ‘Denter di un aña mas, segun e añanan di un trahadó pa salario, asta tur e gloria di Kedar tin cu caba. I esnan cu sobra dje cantidad di hombernan cu ta usa boog, e hombernan poderoso dje yunan di Kedar, lo bira tiki, pasobra Jehova mes, e Dios di Israel, a papi’é.’” (Isaías 21:16, 17) Kedar ta un tribu asina prominente cu tin biaha e ta ser usá pa representá henter Arabia. Jehova a determiná cu e hombernan cu ta usa boog i hombernan poderoso dje tribu aki lo bira tiki, lo keda un resto so. Na ki tempu? “Denter di un aña,” no mas, mescos cu un trahadó pa salario no ta traha mas cu e cantidad di tempu pa cua ta pagu’é. No ta sigur den ki manera tur esaki a cumpli. Dos gobernante asirio—Sargon II i Senákerib—ta bisa cu ta nan a conkistá Arabia. Por ta masha bon cu ta un di nan a caba cu e tribunan arabir orguyoso aki, manera a ser profetisá.

24. Di con nos por tin sigur cu e profecia di Isaías contra Arabia lo cumpli?

²⁴ Sin embargo, nos por tin sigur cu e profecia aki a cumpli ‘al pie de la letra.’ Nada no por haci e punto ei mas convincente cu e palabranan di conclusion dje declaracion formal: “Jehova mes, e Dios di Israel, a papi’é.” Kisas p’e contemporáneonan di Isaías ta parce improbabel cu Babilonia lo subi mas haltu cu Asiria i despues cai for di poder durante un solo anochi di paranda desenfrená. Asina tambe por parce mes improbabel cu poderoso Edom lo bin terminá den silencio di morto of cu un anochi di opresion i miseria lo bini riba e tribunan arabir ricu. Pero manera Jehova bisa, asina ta pasa. Awe, Jehova ta bisa nos cu e imperio mundial di religion falsu lo caba na nada. Esaki no ta djis un posibilidad; ta cos sigur. Jehova mes a papi’é!

25. Con nos lo por imitá e ehempel dje vigilante?

²⁵ Pues anto, laga nos ta manera e vigilante. Laga nos keda alerta, como si fuera stacioná riba un toren di vigilancia haltu, controlando horizonte pa wak si tin cualkier señal di peliger na caminda. Laga nos uni nos mes estrechamente cu e clase fiel di vigilante, e resto di cristiannan ungí riba tera awe. Laga nos djoin nan den declará cu curashi precis loke nos ta mira: e evidencia abrumador cu Cristo ta gobernando den shelu; cu pronto lo e trece un fin na e anochi scur i largu cu humanidad tin alehá for di Dios; i cu despues di esei lo e introducí e berdadero mainta, e Reino di Mil Aña riba un tera transformá den paradijs!

[Nota]

[Plachi na página 219]

‘Laga tin un comementu, un bebementu!’

[Plachi na página 220]

E vigilante “a grita manera un leon”

[Plachi na página 222]

“Mi ta pará constantemente di dia, i . . . tur anochi”