Desaroyo Lógiko di e Informashon

PROMÉ ku bo por organisá bo informashon den un manera lógiko, bo mester sa kiko ta bo meta. Bo kier djis informá hende tokante un tema spesífiko, manera por ehèmpel un kreensia, un aktitut, un kualidat, un tipo di kondukta òf un estilo di bida? Bo intenshon ta pa proba ku un sierto idea ta bèrdat òf ku e ta robes? Bo propósito ta pa kultivá apresio pa algu òf motivá hende pa aktua? Sea ku bo ta bai presentá bo informashon na un persona òf na un públiko grandi, pa bo por hasié na un manera ku ta surti e efekto deseá, bo tin ku tene kuenta ku lokual nan sa kaba di e tema i kiko ta nan aktitut pa kuné. Despues di hasi esei, bo por organisá bo informashon den un manera ku lo yuda bo logra bo meta.

Relashoná ku Saulo (Pablo) su sirbishi na Damasko, Echonan 9:22 ta informá nos ku e “tabata konfundí e hudiunan ku tabata biba na Damasko dor di proba ku e Hesus aki ta e Kristu.” Ki prueba lógiko Pablo a duna? Manera e relato ta sigui konta di su sirbishi mas despues na Antiokia i Tesalónika, Pablo tabata basa su kòmbersashon promé riba e echo ku e hudiunan a aseptá e Skritura Hebreo i ku nan a afirmá di ta kere loke e ta bisa tokante e Mesias. Anto for e Skritura Hebreo, Pablo tabata skohe pasashinan ku a trata di e bida i sirbishi di e Mesias. E tabata sita e tekstonan aki i kompará nan ku loke Hesus a eksperensiá. Por último, e tabata saka e konklushon ku tabata opvio, esta, ku Hesus ta e Kristu òf Mesias. (Echo. 13:16-41; 17:2, 3) Si abo tambe presentá e bèrdat di Beibel na un manera lógiko, e por konvensé otro hende.

Kon pa Organisá e Presentashon. Bo por organisá e informashon den vários manera ku ta lógiko. Asta bo por usa un kombinashon di método si bo ta haña ku esei ta mas bentahoso. At’akí algun posibilidat.

Organisá segun tema. Ordená bo informashon den vários sekshon, di manera ku kada un ta yuda bo yega bo meta. E sekshonnan por ta e puntonan prinsipal ku ta importante pa komprondé bo tema, òf e diferente argumentunan ku ta sea proba algu òf mustra ku e ta robes. Tin sierto puntonan ku bo por agregá òf kita, ounke nan ta relashoná ku e tema, pero esei ta dependé di bo ouditorio òf di bo meta.

Konsiderá un ehèmpel kon pa organisá un presentashon segun tema. Un parti kòrtiku tokante e nòmber di Dios lo por inkluí: (1) pakiko ta importante pa konosé e nòmber di Dios, (2) kiko ta su nòmber i (3) kon nos por onra e nòmber ei.

E publikashonnan ku “e esklabo fiel i prudente” ta prepará pa kondusí studio di Beibel por siña bo bon kon pa organisá informashon segun tema. (Mat. 24:45) Por lo general e publikashonnan aki tin vários tema ku por yuda e studiante haña un bista general di bèrdatnan básiko di Beibel. Den publikashonnan mas ekstenso kada kapítulo ta ser partí den suptema. Kada tema ta prepará e studiante pa e informashon ku lo sigui i ta kontribuí na e kuadro general di e asuntu.

Kousa i efekto. Esaki ta un otro método di presentá informashon den un manera lógiko.

E método aki ta bon pa ora bo ta papia ku un grupo òf ku un persona ku tin ku haña un mihó idea di e resultado di algu ku e ta hasiendo òf ku e tin pensá di hasi. Proverbionan kapítulo 7 ta duna un ekselente ehèmpel di esaki. E ta deskribí na un manera bibu kon un hóben sin eksperensia i ku “falta komprondementu” (e kousa) ta kai den trampa di un prostituta i ta sufri e konsekuensianan amargo (e efekto).—Pro. 7:7.

Pa pone mas énfasis, lo bo por mustra di un banda kiko ta e mal konsekuensianan pa esnan ku no ta kana den e kaminda di Yehova, i di otro banda, kiko ta e bon resultadonan pa esnan ku sí ta skucha Yehova. Motivá pa Yehova su spiritu, Moises a mustra e nashon di Israel e kontraste ei ora el a papia ku nan promé ku nan a drenta e Tera Primintí.—Deu., kap. 28.

Tin biaha ta mihó bo kuminsá bo diskurso refiriendo na e situashon (e efekto) anto kaba presentá e faktornan ku a kontribuí na esei (e kousa). Hopi bes un presentashon asina ta den forma di un problema i su solushon.

Problema i solushon. Den sirbishi di vèlt, bo tin mas chèns ku un persona lo skucha bo si bo papia di un problema ku ta preokupá hende anto kaba mustra ku tin un solushon satisfaktorio. Kisas bo mes ta menshoná e problema òf e por ta algu ku e persona ta trese padilanti.

Por ehèmpel, e problema ei por ta e echo ku hende ta bira bieu i muri, e oumento di kriminalidat òf e inhustisia ku ta reina tur kaminda. Bo no tin nodi bisa hopi kos pa mustra ku e problemanan aki ta eksistí, pasobra nan ta bisto. Djis kuminsá dor di menshoná e problema, anto kaba presentá e solushon ku Beibel ta duna.

Di otro banda, e problema por ta un asuntu di karakter mas personal, kisas e retonan di kria yu sin un kasá, e desanimashon ku malesa grave ta kousa òf e sufrimentu kousá pa un trato sin amor. Pa bo logra mihó resultado, bo mester skucha e persona bon promé. Beibel ta duna informashon balioso riba tur e problemanan aki, pero mester usa nan ku bon huisio. Pa e persona por saka berdadero benefisio di bo kòmbersashon, bo mester ta realístiko. Lag’é komprondé bon kla ku bo ta papiando sea di un solushon permanente, di un alivio temporal òf simplemente kon pa soportá un situashon ku no ta bai kambia den e sistema di kosnan aki. Ku otro palabra, hasi sigur ku e rasonamentu bíbliko ku bo ta ofresé ta sufisiente pa apoyá e konklushonnan ku bo ta saka for di dje. Sino e solushon ku bo ta presentá kisas no ta parse niun tiki lógiko pa e persona.

Organisá segun e órden di tempu. Ta bon pa presentá sierto temanan segun e órden di tempu, es desir, segun kronologia. Por ehèmpel, den e buki di Éksodo, e Dies Plaganan ta wòrdu presentá den e órden ku nan a tuma lugá. Na Hebreonan kapítulo 11, apòstel Pablo ta menshoná un lista di hòmber i muhé ku tabatin fe ehemplar, i e ta hasié den forma kronológiko.

Si bo relatá susesonan di pasado den e órden di e tempu ku nan a tuma lugá, esaki lo por yuda bo ouditorio komprondé kon sierto sirkunstansianan a desaroyá. Esaki ta konta tantu pa historia moderno komo pa susesonan di tempu bíbliko. Tambe bo por kombiná órden kronológiko ku rasonamentu basá riba kousa i efekto. Si bo tin pensá di deskribí e susesonan ku Beibel ta mustra ku mester tuma lugá den futuro, un presentashon kronológiko probablemente lo ta esun mas fásil pa bo ouditorio komprondé i kòrda.

Usando e método di bai segun e órden di tempu no kier men ku semper bo tin ku kuminsá na prinsipio. Den algun kaso, talbes ta mas efikas pa kuminsá konta un relato na un punto dramátiko di e historia. Por ehèmpel, ora di konta un eksperensia, bo por kuminsá konta di un okashon ku un persona su integridat na Dios a ser poné na prueba. Unabes bo a lanta e interes, bo por bai konta e detayenan ku a hiba na esaki den e órden ku nan a tuma lugá.

Usa Solamente Informashon al Kaso. No ta importá ki método bo usa pa organisá bo informashon, basta bo hasi sigur di usa solamente loke ta al kaso. E tema di bo diskurso mester yuda bo determiná kiko bo ta skohe. Tambe bo mester konsiderá ta ken ta forma bo ouditorio. Pa un tipo di públiko un sierto punto ta importante, miéntras ku pa un otro e ta di mas. Tambe bo mester tin sigur ku tur bo informashon lo yuda bo logra bo meta. Sino por sosodé ku maske bo presentashon ta interesante, lo e no tin e efekto deseá.

Kisas ora di hasi investigashon bo ta haña masha hopi informashon interesante ku tin di haber ku bo tema. Pero kuantu di e informashon ei bo tin ku usa? Si bo duna bo ouditorio demasiado informashon, lo bo no logra bo meta. Ta mas fásil pa hende kòrda un par di idea prinsipal bon desaroyá ku kòrda un kantidat di idea presentá muchu lihé. Esaki no kier men ku nunka bo no por inkluí detayenan òf susesonan interesante. Pero bo no mester laga nan desviá bo for di bo meta. Wak kon den Beibel nan a inkluí diskretamente algun detaye asina na Marko 7:3 i 4 i Huan 4:1-3, 7-9.

Ora bo ta pasa di un punto pa e siguiente, tene kuidou pa bo no hasié asina di gòlpi ku bo ouditorio no por sigui bo liña di argumentu mas. Pa e ideanan por drenta otro na un manera efikas bo tin ku pone un konekshon, un brùg, entre e ideanan. E brùg ei por ta un pida frase (tussenzin) òf e por ta un frase kompleto ku ta mustra e relashon ku tin entre e ideanan. Den hopi idioma, bo por usa palabranan òf frasenan simpel di transishon pa konektá e idea nobo ku esun ku bo a kaba di splika.

Lo bo por alkansá bo meta solamente si bo usa informashon al kaso i organis’é den órden lógiko.