Animá i Fortalesé e Ouditorio

E KONGREGASHON kristian mester ta un refugio kaminda sirbidónan di Dios ta haña animashon, sin importá e problemanan ku nan ta konfrontá. Pa logra esei, foral e ansianonan mester sòru duna diskurso i konseho ku ta animá e ouditorio, i asina demostrá ku nan ta “manera un refugio kontra bientu, i un protekshon kontra tempestat, manera koridanan di awa den un tera seku, manera sombra di un baranka masha grandi mes den un tera ku tin set di awa.”—Isa. 32:2.

Si bo ta un ansiano, bo diskursonan ta duna estímulo i konsuelo? Nan ta duna ánimo na esnan ku ta hasi esfuerso pa sirbi Yehova fielmente? Nan ta fortalesé e ouditorio su determinashon pa sigui hasi e boluntat di Dios apesar di oposishon òf apesar ku mayoria hende no ta interesá? Kiko si entre esnan presente tin hende deprimí, hende ku problemanan ekonómiko serio òf hende ku ta sufri di un malesa grave pa kua no tin kura? Abo por ‘fortalesé nan ku bo boka.’—Jòb 16:5.

Usa e okashonnan ku bo ta duna diskurso pa yuda bo rumannan haña speransa i fortalesa for di Yehova i for di tur loke el a perkurá pa nan benefisio.—Rom. 15:13; Efe. 6:10.

Rekordá e Ouditorio di Loke Yehova A Hasi. Un manera importante pa animá bo oyentenan ta dor di mustra nan kon Yehova a yuda su pueblo den pasado ora ku nan tabata pasa den difikultat.—Rom. 15:4.

Yehova a bisa Moises pa ‘enkurashá’ i ‘fortalesé’ Hosué promé ku Israel a drenta e Tera Primintí, ku e tempu ei tabata okupá pa nashonnan enemigu. Kon Moises a hasi esei? Den presensia di Hosué el a rekordá henter e nashon di e kosnan ku Yehova a hasi pa nan for di ora nan a bandoná Egipto. (Deu. 3:28; 7:18) Tambe Moises a menshoná e viktorianan ku Yehova a duna e nashon riba e amoreonan. Despues el a bisa Hosué: “Sea fuerte i tene kurashi.” (Deu. 31:1-8) Ora abo ta purba animá i fortalesé bo rumannan, bo ta yuda nan kòrda riba loke Yehova a hasi pa nan kaba?

Tin biaha hende sa sinti nan asina abatí dor di problema ku nan ta puntra nan mes si un dia nan lo disfrutá di e bendishonnan di e Reino. Rekordá nan ku e promesanan di Yehova ta konfiabel.—Hos. 23:14.

Den algun pais nos rumannan ta haña nan ku dekretonan gubernamental ku ta prohibí nan di prediká e bon nobo. Den kasonan asina ansianonan amoroso por fortalesé e rumannan dor di usa e eksperensianan di e apòstelnan di Hesukristu. (Echo. 4:1–5:42) Un kos mas ku sigur lo duna e rumannan ánimo ta di enfatisá e manera ku Dios a dirigí e asuntunan menshoná den e buki di Èster.

Sa tin hende ta asistí na reunionnan di kongregashon, pero nan no ta hasi ningun progreso mas. Kisas nan ta kere ku hamas Dios lo pordoná nan pa e bida malu ku nan a hiba ántes. Den tal kaso, papia ku nan tokante e manera miserikordioso ku Yehova a trata Rei Mánases. (2 Kró. 33:1-16) Òf bo por konta nan tokante e habitantenan di antiguo Korinto ku a kambia nan bida i bira kristian, i a ser deklará hustu dor di Dios.—1 Kor. 6:9-11.

Akaso algun presente ta pensa ku nan problemanan ta indiká ku nan a pèrdè Dios su aprobashon? Lo bo por rekordá nan di e pruebanan ku Jòb a pasa aden i di e bendishonnan ku el a risibí na abundansia pasobra el a warda su integridat na Yehova. (Jòb 1:1-22; 10:1; 42:12, 13; Sal. 34:19) Jòb su konsoladónan falsu a pretendé ku Jòb mester a kometé un piká. (Jòb 4:7, 8; 8:5, 6) Na kontraste ku nan, Pablo i Bárnabas a fortalesé e disipelnan, “enkurashando nan pa permanesé den fe,” bisando: “Dor di hopi tribulashon nos mester drenta e reino di Dios.” (Echo. 14:21, 22) Awe tambe ta meskos, nos por fortalesé esnan ku ta pasa den prueba dor di mustra ku tur kristian mester perseverá bou di tribulashon i ku den bista di Dios tal perseveransia ta di gran balor.—Pro. 27:11; Mat. 24:13; Rom. 5:3, 4; 2 Tim. 3:12.

Animá bo oyentenan pa pensa riba maneranan ku Yehova a kumpli ku su promesanan den nan kaso. Ku un tiki yudansa, kisas nan ta mira ku Yehova a aktua kaba na nan fabor, manera el a primintí. Nos ta lesa na Salmo 32:8: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.” Dor di yuda bo oyentenan kòrda riba e momentunan ku Yehova a guia nan i fortalesé nan, lo ta posibel pa nan haña e konvikshon personal ku Yehova ta perkurá pa nan i ku realmente lo e yuda nan pasa dor di tur e pruebanan ku nan ta konfrontá aktualmente.—Isa. 41:10, 13; 1 Ped. 5:7.

Ekspresá Bo Goso pa Loke Dios Ta Hasi Awor. Ora bo ta purba animá bo rumannan, hala atenshon na loke Yehova ta hasi aworakí na fabor di su sirbidónan. Papia di e kosnan aki den un manera ku ta transmití e goso ku bo ta sinti, i asina bo oyentenan tambe lo sinti e mesun goso.

Pensa riba e manera ku Yehova ta yuda nos wanta i trata ku e preshonnan di bida diario. E ta siña nos e mihó manera di biba. (Isa. 30:21) E ta splika nos e motibu pakiko tin kriminalidat, inhustisia, pobresa, malesa i morto, i kon lo e pone fin na tur e kosnan aki. E ta duna nos un hermandat amoroso i e privilegio presioso di por hasi orashon. El a konfia nos ku e privilegio di ser su Testigunan. E ta habri nos wowo pa mira ku ya kaba Kristu tin poder komo Rei den shelu i ku e último dianan di e sistema bieu aki ta aserkando nan fin rápidamente.—Rev. 12:1-12.

Agregá na tur e bendishonnan aki nos reunionnan di kongregashon, asambleanan i kongresonan. Si abo ta ekspresá bo apresio sinsero pa e perkurashonnan aki, lo bo hasi bo ouditorio mas determiná pa no keda sin reuní ku nan rumannan.—Heb. 10:23-25.

Informenan ku ta duna prueba ku Yehova ta bendishoná nos labor den sirbishi di vèlt tambe ta un fuente di estímulo. Den promé siglo ora Pablo ku Bárnabas tabata riba kaminda pa Yerúsalèm, nan a trese “gran goso na tur e rumannan” dor di konta nan detayadamente tokante e kombertimentu di e paganunan. (Echo. 15:3) Bo tambe por duna e rumannan goso dor di konta eksperensianan edifikante.

E oyentenan lo risibí mas animashon si bo yuda nan mira e balor di loke nan ta hasi. Elogiá nan pa nan partisipashon den sirbishi di vèlt. Elogiá esnan ku ta hopi limitá den loke nan por hasi debí na behes òf malesa, pero ku tòg ta perseverá fielmente. Kòrda nan ku Yehova no ta lubidá e amor ku nan a mustra pa su nòmber. (Heb. 6:10) Mester rekordá nos rumannan bes tras bes ku un fe ku a pasa den prueba ta un poseshon balioso.—1 Ped. 1:6, 7.

Papia ku Sintimentu Tokante Nos Speransa. E promesanan inspirá di bendishon ku lo bini den futuro ta un gran fuente di animashon pa tur hende ku stima Dios. Mayoria di esnan presente lo a yega di tende di nan na vários okashon. Sin embargo, si abo ta papia ku apresio tokante e promesanan aki, lo bo hasi nan bibu, lo bo duna bo ouditorio konfiansa ku nan lo kumpli i pone nan kurason yena ku gratitut. Dor di pone na práktika loke bo a siña den e Skol di Ministerio Teokrátiko, bo por logra e meta ei.

Ounke Yehova ta Esun ku prinsipalmente ta duna ánimo i fortalesa, bo por koperá kuné den esei. Probechá di e oportunidat pa duna ánimo i fortalesa ora bo ta papia ku e kongregashon.