Na Unda e Mundu Aki Ta Bai?

Rònt mundu, problemanan serio i susesonan spantoso a bira notisia di tur dia! Kiko esaki ta nifiká?

SIGURIDAT PERSONAL: Bòmnan ta eksplotá den plasa. Dosente- i alumnonan tirá na skol. Beibinan sekuestrá manera mayornan bira nan lomba. Hòmbernan di edat i hende muhé atraká di dia kla.

E SITUASHON RELIGIOSO: Iglesianan ta apoyá partidonan den guera. Klero akusá di genosidio. Pastornan ta abusá seksualmente di hóbennan; iglesia ta tapa kos. Asistensia na misa ta baha; misanan ta na benta.

MEDIO AMBIENTE: Hende ta kaba ku selvanan pa traha lugá pa proyektonan komersial. Pobernan ta rosa mondi pa haña kombustibel. Awa den tera ta kontaminá, e no ta safe pa bebe. Desperdisio industrial i algun métodonan moderno ta ruiná piskamentu. Aire sofokante debí na polushon.

E PAN DI KADA DIA: Segun informe, entrada pa kabes na paisnan afrikano ku ta keda zùit di Sahara ta rònt di 480 dòler pa aña. Golosidat di direktornan di empresa ta pone negoshinan bai fayit, lagando míles di hende sin trabou. Froude ta pone invershonistanan pèrdè e plaka ku nan a spar henter nan bida.

SKARSEDAT DI KUMINDA: Rònt di 800.000.000 hende na mundu ta bai drumi regularmente ku hamber.

GUERA: Mas ku 100.000.000 hende a pèrdè nan bida dor di guera den siglo 20. Tin sufisiente arma nuklear na stòk ku por destruí henter humanidat vários biaha. Gueranan sivil. Terorismo a plama rònt mundu.

PESTILENSIA I OTRO MALESA: E grip spañó (malu di kabouter), ku a kuminsá na 1918, a mata 21.000.000 hende. Awor AIDS a bira “e epidemia mas ekstenso i destruktivo den historia humano.” Kanser i malesa di kurason ta kousa tristesa rònt mundu.

Wak e notisianan komo un totalidat. E susesonan aki ta kasonan isolá? Òf nan ta susesonan ku ta forma parti di un patronchi mundial ku tin berdadero nifikashon?

[Kuadro/Plachi na página 5]

Dios Ta Realmente Interesá den Nos?

Angustiá pa susesonan spantoso òf pa motibu di tragedia personal, hopi hende ta puntra nan mes dikon Dios no ta intervení pa evitá e tipo di kosnan ei.

Dios ta interesá den nos. E ta perkurá guia konfiabel i berdadero alivio awor. (Mateo 11:28-30; 2 Timoteo 3:16, 17) El a hasi areglo pa pone un fin permanente na violensia, malesa i morto. E perkurashonnan ku el a hasi ta duna prueba ku e ta interesá, no solamente den hende di un nashon sino den hende di tur nashon, tribu i lenga.—Echonan 10:34, 35.

Kuantu nos ta interesá den Dios? Abo sa ken ta e Kreadó di shelu i tera? Kon su nòmber ta? Kiko ta su propósito? E ta kontestá e preguntanan aki den Beibel. Einan e ta konta nos kiko ta e pasonan ku e ta tumando pa pone un fin na violensia i tambe na malesa i morto. Pa nos por benefisiá, kiko nos mester hasi? Nos tin ku siña tokante Dios i tokante su propósito. Kon nos por spera di benefisiá di su perkurashonnan a ménos ku nos mustra fe den dje? (Juan 3:16; Hebreonan 11:6) Tambe ta nesesario pa nos obedesé su rekisitonan. (1 Juan 5:3) Abo ta interesá sufisientemente den Dios pa hasi esei?

Pa nos por komprondé dikon Dios ta permití e situashon aktual, nos tin ku komprondé un kuestion importante. Beibel ta splik’é. Na página 15 di e publikashon aki, bo por haña sa kiko e kuestion aki ta.