Prólogo

Na Tur Hende Ku Ta Stima Yehova,

Hesus a bisa: “Boso lo konosé e bèrdat, i e bèrdat lo hasi boso liber.” (Huan 8:32) E palabranan ei ta masha alentador! Sí, nos por siña konosé e bèrdat asta den e “último dianan” krítiko akí den kua ta reina falsedat i mentira. (2 Timoteo 3:1) Bo ta kòrda kon emoshoná bo a keda ora bo a siña e bèrdat ku e Palabra di Dios ta splika? Ki un eksperensia maravioso!

Sinembargo, maske kon importante ta pa nos tin konosementu eksakto di e bèrdat i pa kompartié regularmente ku otro hende, nos mester biba tambe na armonia ku e bèrdat. Pa por hasi esei, nos tin ku keda den e amor di Dios. Kiko esaki ta enserá? Loke Hesus a bisa e anochi promé ku su morto ta kontestá e pregunta akí. El a bisa su fiel apòstelnan: “Si boso ta kumpli ku mi mandamentunan, boso lo keda den mi amor, meskos ku ami a kumpli ku e mandamentunan di mi Tata i ta keda den su amor.”—Huan 15:10.

Tuma nota ku Hesus a keda den e amor di Dios pasobra el a obedesé e mandamentunan di su Tata. Esaki ta konta pa nos tambe. Pa nos keda den e amor di Dios, nos tin ku apliká e bèrdat den tur loke nos ta hasi. E mesun anochi ei Hesus a bisa: “Ya ku boso sa e kosnan akí, boso lo ta felis si boso hasi nan.”—Huan 13:17.

Nos ta spera sinseramente ku e buki akí lo yuda bo sigui apliká e bèrdat den bo bida i asina “keda den e amor di Dios . . . ku bida eterno na bista.”—Hudas 21.