Ken Tabata E Yu di Hende?

Hesus i su disipelnan a yega Bètsaida. E hendenan a trese un hòmber siegu i a supliká Hesus pa e mishi ku e hòmber i kur’é.

Hesus a kohe e hòmber siegu na su man i hib’é pafó di e pueblito. Despues di a skupi riba e hòmber su wowonan, Hesus a puntr’é: “Bo ta mira algu?” E hòmber a bis’é: “Mi kier sa ku mi ta mira hende, pasobra mi ta mira algun kos ku ta parse palu, ma nan ta kana rònt.” (Marko 8:23, 24) Hesus a bolbe pone su man riba wowo di e hòmber, i e hòmber a rekuperá su bista i tabata por a mira tur kos kla kla. Hesus a bisa e hòmber pa bai kas i pa e no drenta e pueblito.

Despues, Hesus i su disipelnan a kue direkshon nort pa bai Sesarea di Filipo. E biahe ei a enserá un subida di mas o menós 40 kilometer pasobra Sesarea di Filipo tabata situá riba un seru na un haltura di 350 meter riba nivel di laman. Nortost di e pueblo, bo por a mira Seru Hermon ku su tòp tur na sneu. Probablemente, nan biahe a dura dos dia òf mas.

Dado momento, durante e biahe, Hesus a bai un kaminda su so pa hasi orashon. Tabata un nuebe pa dies luna promé ku su morto i e tabata preokupá pa su disipelnan. Un poko promé, hopi di su disipelnan a bandon’é, i otronan aparentemente tabata konfundí òf desepshoná. Podisé nan tabata puntra nan mes dikon e no a laga e hendenan hasié rei òf dikon e no a hasi un milager pa mustra bon kla ken e tabata.

Ora e disipelnan a bai serka dje kaminda e tabata hasi orashon, el a puntra nan: “Ken e hendenan ta bisa ku e Yu di hende ta?” Nan a bis’é: “Tin ta bisa Huan Boutista, otro ta bisa Elías, i algun otro ta bisa Yeremías òf un di e profetanan.” Sí, algun hende tabata kere ku Hesus tabata un di e hòmbernan ei, kende a lanta for di morto. Anto pa haña sa kiko su disipelnan mes tabata kere, Hesus a puntra nan: “Ma boso, ken boso ta bisa ku mi ta?” Pedro a bula respondé: “Abo ta Kristu, Yu di e Dios bibu.”—Mateo 16:13-16.

Hesus a bisa ku Pedro ta un persona bendishoná pasobra ta Dios a revelá e informashon ei na Pedro. El a sigui bisa Pedro: “Mi ta bisa bo: Abo ta Pedro, i riba e baranka akí lo mi lanta mi kongregashon, i e portanan di Graf lo no domin’é.” Hesus tabata ke men ku e mes lo a edifiká e kongregashon kristian i ku ni Graf lo no tene e miembronan di su kongregashon prezu si nan keda fiel te na morto. I el a primintí Pedro: “Lo mi duna bo e yabinan di e Reino di shelu.”—Mateo 16:18, 19.

Esaki no tabata ke men ku Hesus a halsa Pedro riba e otro apòstelnan ni ku el a hasié e fundeshi di e kongregashon kristian. Hesus mes ta e Baranka riba kua e kongregashon kristian lo a ser edifiká. (1 Korintionan 3:11; Efesionan 2:20) No opstante, Pedro lo a risibí tres yabi. É lo tabatin e privilegio di, na moda di papia, habri oportunidat pa hende drenta e Reino di shelu.

Pedro lo a usa e promé yabi na Pentekòste di aña 33 di promé siglo pa mustra e hudiunan i e prosélitonan ku a arepentí kiko nan mester a hasi pa haña salbashon. E di dos yabi lo el a usa pa duna e samaritanonan ku a bira kreyente oportunidat di drenta e Reino di Dios. I na aña 36 di promé siglo, Pedro lo a usa e di tres yabi pa duna e oportunidat ei na hende di e nashonnan, kuminsando ku Kornelio.—Echonan 2:37, 38; 8:14-17; 10:44-48.

Durante e kòmbersashon akí ku Hesus tabatin ku su apòstelnan, el a papia tambe di su sufrimentu i su morto ku lo e tabatin ku enfrentá na Herúsalèm. E apòstelnan a keda masha preokupá. Pedro, kende no a komprondé ku Hesus lo a ser resusitá pa biba den shelu, a hala Hesus un banda i a kuminsá skual e, bisando: “Sea bondadoso ku bo mes, Señor; esei sigur lo no pasa ku bo.” Pero Hesus a bira lomba p’e i a bis’é: “Kita for di mi dilanti, Satanas! Bo ta un piedra di trompeká pa mi, pasobra bo no tin e pensamentu di Dios, sino di hende.”—Mateo 16:22, 23.

Awor, Hesus a yama algun hende mas bini serka dje i a splika nan i e apòstelnan ku lo no ta fásil pa ta su siguidó. El a bisa: “Si un hende ke sigui mi, lag’é nenga su mes, kue su staka di tormento i sigui mi kontinuamente. Pues, ken ku ke salba su alma lo pèrd’é, ma ken ku pèrdè su alma pa mi motibu i pa motibu di e bon notisia lo salb’é.”—Marko 8:34, 35.

Pues, pa un siguidó di Hesus por ta digno di risibí Hesus su aprobashon, e mester ta un persona ku ta kla pa hasi sakrifisio i ku tin kurashi. Hesus a bisa: “Ken ku tin bèrgwensa di mi i di mi palabranan den e generashon infiel na Dios i pekaminoso akí, e Yu di hende tambe lo tin bèrgwensa di dje ora e yega den e gloria di su Tata huntu ku e angelnan santu.” (Marko 8:38) Sí, ora Hesus bini, “lo e rekompensá kada hende segun nan komportashon.”—Mateo 16:27.