Apèndiks

Un Mensahe pa Mayornan Kristian:

Komo mayor bo ta deseá di yuda bo yunan presioso siña stima Yehova i dediká nan mes na dje. Kiko bo por hasi pa yuda nan prepará pa boutismo? Na ki momento nan lo ta kla pa dal e paso importante ei?

Hesus a instruí su siguidónan: “Hasi hende di tur nashon mi disipel, i batisá nan.” (Mat. 28:19) Pues, pa un persona por kualifiká pa boutismo e mester ta un disipel di Kristu, esta, un persona ku no solamente ta komprondé i kere e siñansanan di Kristu, pero ku ta biba di akuerdo ku nan tambe. Esaki ta algu ku asta un hóben ku ta relativamente yòn por hasi.

Sea un bon ehèmpel pa bo yunan i inkulká e siñansanan di Yehova den nan kurason. (Deu. 6:6-9) Esaki ta enserá usa e bukinan Kiko Beibel Ta Siña Realmente? i “Keda den e Amor di Dios” pa siña nan e bèrdatnan básiko di Beibel i yuda nan rasoná riba e prinsipionan di Beibel i biba di akuerdo ku nan. Siña bo yu splika su kreensianan ku su mes palabra. (1 Ped. 3:15) E konosementu i animashon ku nan ta haña serka bo i for di nan estudio personal, adorashon di famia, reunion di kongregashon i bon kompania lo yuda nan progresá te na boutismo i asta despues di esei. Sigui yuda nan pone meta spiritual.

Proverbionan 20:11 ta bisa: “Te asta un mucha ta konosí pa su echonan, si su kondukta ta puru i rekto.” Na kiko asina bo por mira si bo yu ta kla pa bira un disipel batisá di Hesukristu?

Un yu ku ta progresá pa yega na boutismo mester ta obedesidu na su mayor(nan). (Echo. 5:29; Kol. 3:20) Ora Hesus tabatin 12 aña di edat, Beibel ta bisa ku “el a keda sumiso na [su mayornan].” (Luk. 2:51) Naturalmente, bo no por spera pa bo yu ta perfekto. Pero ora un yu ke batisá, e ta hasi esfuerso pa imitá Hesus, i bira konosí komo un yu ku ta sumiso na su mayornan.

Ademas, e yu mester mustra ku e ke siña konosé e bèrdatnan di Beibel. (Luk. 2:46) Bo yu ta bai reunion ku smak i ta partisipá den esaki? (Sal. 122:1) E ta gusta lesa Beibel i hasi su estudio personal regularmente?—Mat. 4:4.

Un yu ku ke yega na boutismo ta hasi esfuerso pa pone interes di Reino na promé lugá. (Mat. 6:33) E ta konsiente di su responsabilidat di papia di su fe ku otro hende. E ta partisipá den vários forma di e sirbishi di vèlt i no tin bèrgwensa pa bisa su maestronan i kompañeronan di skol ku e ta un Testigu di Yehova. Ademas, e ta prepará bon pa su asignashonnan den e reunion di Nos Bida i Sirbishi Kristian.

E ta hasi esfuerso tambe pa keda moralmente limpi i evitá mal kompania. (Pro. 13:20; 1 Kor. 15:33) E ta wak bon ora e ta skohe músika, pelíkula, programa di televishon, wega di vidio òf ta usa Internet.

Hopi hóben a desaroyá amor pa e bèrdat ku yudansa diligente di nan mayornan, i a kualifiká pa boutismo na edat basta yòn. Nos ta pidi Yehova pa e sigui bendishoná boso ku ta mayor segun ku boso ta yuda boso yunan alkansá e meta importante akí.

Mensahe pa Publikadó No-Batisá:

Ta un privilegio pa sirbi den kongregashon komo un publikadó no-batisá. Nos ta elogiá bo pa e progreso spiritual ku bo a hasi kaba den bo sirbishi na Dios. Bo estudio di Beibel a yuda bo siña konosé Dios i pone fe den su promesanan.—Huan 17:3; Heb. 11:6.

Promé ku bo a kuminsá studia ku Testigunan di Yehova, kisas bo tabata pertenesé na un otro religion òf bo no tabata interesá den religion mes. Podisé bo a yega di partisipá den aktividat ku Beibel ta kondená. Pero awor bo a demostrá bo fe i a arepentí, esta, bo a sinti un duele profundo pa bo kondukta robes di ántes. Tambe bo a kombertí, esta, bo a rechasá bo mal kurso di pasado i ta determiná di hasi loke ta bon den bista di Dios.—Echo. 3:19.

Di otro banda, kisas bo konosé e skrituranan santu for di tempu bo tabata chikitu. Esei a yuda bo mantené bon kondukta i evitá mal echo serio. (2 Tim. 3:15) Bo a siña resistí preshon di bo pareunan i tendensia ku ta robes den bista di Yehova. Bo a demostrá bo fe i ta defendé adorashon berdadero i kompartí bo kreensia ku otro hende. Bo a risibí entrenamentu den sirbishi di vèlt. Anto awor, bo a tuma e desishon personal di sirbi Yehova komo un publikadó no-batisá.

Sea ku bo a siña konosé Yehova despues den bida òf for di infansia, awor kisas bo ta pensando seriamente riba dos paso importante den bo progreso spiritual, esta, dedikashon i boutismo. Bo ta dediká bo mes na Yehova ora bo lag’é sa den orashon di bo desishon personal pa adorá e so pa semper. (Mat. 16:24) Despues bo ta simbolisá bo dedikashon mediante boutismo. (Mat. 28:19, 20) Ku bo dedikashon i boutismo bo ta bira un sirbidó di Yehova Dios. Ki un privilegio maravioso esei ta!

Pero, manera bo a siña kaba den bo estudio di Beibel, lo bo konfrontá vários prueba. Kòrda ku djis despues di Hesus su boutismo, “e spiritu a hiba Hesus den desierto, i Diabel a purba di hink’é den tentashon.” (Mat. 4:1) Despues di bo boutismo komo disipel di Kristu, bo tambe por spera mas prueba. (Huan 15:20) E pruebanan akí lo bini den vários forma. Kisas lo bo enfrentá oposishon di famia. (Mat. 10:36) Hende manera bo kompañero di skol, kolega di trabou i amigunan ku bo tabatin den mundu lo hasi bofon di bo. Kòrda semper riba e palabranan di Hesus na Marko 10:29 i 30: “Di bèrdat mi ta bisa boso: Ningun hende ku a bandoná kas, ruman hòmber, ruman muhé, tata, mama, yu òf kunuku pa mi motibu i pa motibu di e bon notisia, lo no keda sin haña awor, den e tempu akí, 100 biaha mas tantu kas, ruman hòmber, ruman muhé, mama, yu i kunuku—huntu ku persekushon—i den e era ku ta bini, bida eterno.” P’esei, sigui traha duru pa keda serka Yehova i biba di akuerdo ku su normanan hustu.

Ora bo ke batisá, laga e koordinadó di e kuerpo di ansiano sa esei. E preguntanan ku tin despues di e mensahe akí lo sirbi komo base pa e ansianonan determiná si bo ta kualifiká pa boutismo. Bo por kuminsá repasá e preguntanan ei den privá komo parti di bo programa regular di estudio personal.

Ora bo ta prepará pa e konsiderashon akí, tuma tempu pa lesa i reflekshoná riba e tekstonan menshoná. Sinti bo liber pa hasi nota personal por ehèmpel den e buki akí mes. Bo mag usa e notanan ei i tene bo buki habrí ora e ansianonan ta repasá e preguntanan ku bo. Si bo no ta komprondé un pregunta bon, bo por pidi esun ku ta studia ku bo òf e ansianonan pa yuda bo.

Durante e reunion ku e ansianonan, no tin nodi duna kontesta largu i kompliká. Un kontesta simpel i direkto den bo mes palabra lo ta mihó. Pa hopi di e preguntanan, lo ta bon tambe pa menshoná un òf dos teksto ku ta mustra e base bíbliko pa bo kontesta.

Si e ansianonan mira ku ainda bo no tin sufisiente konosementu básiko di e siñansanan di Beibel, nan lo sòru pa bo risibí e yudansa nesesario di manera ku bo por komprondé i splika Beibel ku bo mes palabra i asina kualifiká pa batisá mas despues.

[Nota na ansiano di kongregashon: E instrukshonnan tokante kon pa trata e preguntanan di boutismo ku e kandidatonan ta na página 208-212.]