Yákòb A Haña un Herensia

Ísak tabatin 40 aña ora el a kasa ku Rebeka. Ísak tabata stima Rebeka masha hopi mes. Ku tempu, nan a haña dos yu hòmber oochi.

E yu mayó tabata yama Esou, i e yu mas chikitu tabata yama Yákòb. Esou tabata gusta pasa su tempu pafó. E tabata un bon yagdó. Yákòb tabata gusta ta na kas.

Hopi tempu pasá, ora un hòmber muri, su yunan tabata haña su plaka i su terenonan komo herensia, pero e yu hòmbernan mayó tabata keda ku mayoria di tereno i mas tantu plaka di nan tata ora nan tata muri. Pero Ísak su famia a haña algu mas komo herensia. Ísak su yunan lo por a disfrutá di tur e promesanan ku Yehova a hasi na Ábraham. Pero Esou no tabata wòri ku e promesanan ei. Yákòb sí tabata haña e promesanan ei masha importante.

Un dia, despues ku Esou a pasa henter dia ta yag, el a yega kas morto kansá. El a sinti holó di e dushi kuminda ku Yákòb tabata kushiná. Esou a bisa: ‘Mi tin hopi hamber! Duna mi un poko di e stobá kòrá ei!’ Yákòb a bis’é: ‘Ta bon. Pero promé, primintí mi ku mi por haña bo herensia.’ Esou a bis’é: ‘Bo por keda kuné. Mi no ta interesá den e herensia ei. Aworakí, ta kome mi ke kome.’ Tabata bon loke Esou a hasi? Nò, esei no tabata algu sabí pa hasi. Esou a rechasá un herensia presioso pa un tayó di kuminda.

Ora Ísak a bira bieu, Ísak mester a bendishoná su yu hòmber mayó. Pero Rebeka a yuda Yákòb, ku tabata e yu hòmber mas chikitu, pa Yákòb ser bendishoná. Ora Esou a haña sa esei, el a rabia masha pisá. Asta e tabata ke mata su ruman oochi. Ísak i Rebeka tabata ke protehá Yákòb. P’esei, nan a bisa Yákòb: ‘Bai serka bo tio Lában te ora ku Esou kalma.’ Yákòb a sigui e konseho di su mayornan, i el a hui bai pa skapa su bida.