Yèfta Su Promesa

Atrobe, e israelitanan a stòp di sirbi Yehova, i nan a bai adorá dios falsu. Pero ora e amonitanan a bin bringa kontra e israelitanan, e diosnan falsu ei no a yuda nan. Pa hopi tempu, kos tabata bai malu pa e israelitanan. Pero un dia, e israelitanan a bisa Yehova: ‘Nos a hasi malu. Por fabor, yuda nos.’ E israelitanan a kibra e imágennan di nan diosnan falsu, i nan a kuminsá sirbi Yehova atrobe. P’esei Yehova a yuda nan.

Pa yuda e israelitanan gana e guera kontra e amonitanan, Yehova a skohe un sòldá ku yama Yèfta komo lider. Yèfta a bisa Yehova: ‘Si Yehova yuda nos gana e bataya, mi ta primintí ku lo mi duna Yehova e promé persona ku sali for di mi kas.’ Yehova a skucha Yèfta su orashon, i el a yuda Yèfta gana e bataya.

Ora Yèfta a yega kas, e promé persona ku a sali for di su kas tabata su yu muhé, su úniko yu. E tabata bailando i tokando tamburein. Kiko Yèfta a hasi e ora ei? Wèl, el a kòrda loke el a primintí Yehova, i el a bisa: ‘Ai nò, mi yu! Bo a kibra mi kurason. Mi a duna Yehova mi palabra. Pa mi hasi loke mi a bisa Yehova, mi mester manda bo Silo pa bo traha pa Yehova den e tabernakel.’ Pero su yu muhé a bis’é: ‘Si Papi a bisa Yehova esei, Papi mester hasi loke Papi a primintí. Pero promé ku mi bai, e úniko kos ku mi ta pidi ta pa mi pasa dos luna den e serunan ku mi amiganan.’ E yu muhé di Yèfta a traha den e tabernakel henter su bida. Anto tur aña, su amiganan tabata bishit’é.