Yehova A Defendé Yehósafat

Yehósafat, Rei di Huda, a destruí e altarnan di Baal i e imágennan den e pais. E tabata ke pa su pueblo sa e leinan di Yehova. P’esei, el a manda su alto funshonarionan i e levitanan den henter Huda pa siña e pueblo e leinan di Yehova.

E nashonnan rònt di nan tabatin miedu di ataká Huda, pasobra nan tabata sa ku Yehova lo a protehá su pueblo. Nan a asta hiba regalo pa Rei Yehósafat. Pero despues, e moabitanan, e amonitanan i e hendenan den e region di Seir a bai bringa kontra Huda. Yehósafat tabata sa ku e tabatin mester di Yehova su yudansa. Pues, el a laga tur hende hòmber, hende muhé i mucha reuní na Herúsalèm. El a bai para nan dilanti, i resa: ‘Yehova, sin bo, nos no por gana e guera. Por fabor, bisa nos loke nos tin ku hasi.’

Yehova a skucha e orashon i bisa: ‘No tene miedu. Lo mi yuda boso. Para kla i mira kon lo mi salba boso.’ Kon Yehova a salba nan?

E siguiente mainta, Yehósafat a skohe algun kantante, i el a bisa nan ku nan tabatin ku kana dilanti di e ehérsito. Nan a kana di Herúsalèm pa Tekoa, kaminda e bataya lo a tuma lugá.

Segun ku e kantantenan tabata alabá Yehova ku goso i ku stèm fuerte, Yehova tabata bringa pa su pueblo. Pues, el a bruha e amonitanan i e moabitanan asina tantu ku nan a kuminsá ataká otro. Nan tur a muri. Pero, Yehova a protehá e pueblo di Huda, e sòldánan i e saserdotenan. Tur e nashonnan bisiña a tende loke Yehova a hasi. Nan a komprondé ku Yehova ainda tabata defendé su pueblo. Kon Yehova ta salba su pueblo? Na diferente manera. E no mester di yudansa di hende.