Karta di Kuerpo Gobernante

Kerido Ruman:

Amor pa Dios i amor pa hende ta motivá nos pa ‘bai, i hasi hende di tur nashon disipel, i batisá nan.’ (Mat. 28:​19, 20; Mar. 12:​28-31) Amor inegoista tin hopi poder. Amor inegoista por konmové kurason di un persona ku ta “dispuesto pa aseptá e bèrdat ku ta hiba na bida eterno.”—Echo. 13:48.

Ántes, nos tabata purba di memorisá nos presentashonnan i nos enfoke tabata pa laga literatura. Awor, nos ke hasi esfuerso pa mehorá nos manera di kòmbersá ku hende. Nos ke pa e hendenan sa ku nos ta stima nan. P’esei, nos ke papia tokante tópiko ku nan ta interesá den dje. Esei ke men ku nos mester ta fleksibel i ku nos mester buska pa sa kiko ta e kosnan ku ta preokupá un persona i kiko ta e kosnan ku e persona ta interesá den dje. Kon e foyeto akí por yuda nos den esei?

E foyeto akí tin 12 lès. E lèsnan ta trata diferente kualidat ku nos mester kultivá pa nos por mustra amor i yuda hende bira disipel. Kada lès ta basá riba un relato bíbliko. Kada lès ta enfoká riba un kualidat spesífiko ku Hesus òf un otro predikadó di promé siglo a desplegá den nan sirbishi na Dios. Nos meta no ta pa memorisá un presentashon. Nò, nos ke buska manera pa mustra amor na hende. Maske tur kualidat ta importante, den e foyeto akí, nos lo enfoká riba e kualidatnan ku nos mester tin ora di kuminsá un kòmbersashon, ora di hasi rebishita i ora di dirigí estudio di Beibel.

Ora bo ta trata un lès, pensa kon bo por desplegá e kualidat ku e lès ta enfoká riba dje. Pensa kon bo por desplegá e kualidat ora bo ta papia ku e hendenan den bo teritorio. Hasi esfuerso pa bo siña stima Yehova i hende mas i mas. Amor, mas ku kualke otro método spesífiko ku bo por siña, lo yuda bo alkansá bo meta di yuda hende bira disipel.

Nos ta masha kontentu ku nos tin e gran privilegio di traha huntu ku bo, skouder ku skouder. (Sof. 3:9) Yehova bendishoná bo rikamente i yuda bo sigui stima hende i yuda hende bira disipel!