Demasiado Balor na Transfusion di Sanger?

Transfusion di sanger ta comun den medicina moderno, pero e ta mes bon cu su reputacion? Kico bo ta pensa?

Den The American Journal of Medicine (februari 1993), Dr. Craig S. Kitchens a puntra: “Hende ta Duna Demasiado Balor na Transfusion di Sanger?” El a nota cu dokternan hopi biaha ta considerá cuidadosamente si e beneficio di un terapia ta mas cu e rísico cu e por trece. Kico di transfusion?

Kitchens a repasá evidencia reciente di hopi rísico ligá cu transfusion, manera hepatítis, sistema inmuno debilitá, fayo den sistema orgánico i reaccion di alergia ora e curpa ta ricibí un transplante. Un estudio cu a resumí “numeroso complicacion” for di transfusion di sanger “a concluí cu cada caso di transfusion tin un conhunto di 20% chens pa algun reaccion adverso, di cua algun por ta menor pero otronan perhudicial,” asta fatal.

Sin embargo, e supuesto beneficionan ta hustificá corementu di tal rísiconan?

Dr. Kitchens a repasá 16 estudio raportá enbolbiendo 1.404 operacion riba Testigonan di Jehova, kendenan ta rechasá transfusion debí n’e mandamentu bíblico pa ‘abstené for di sanger.’—Echo 15:28, 29.

E resultado? “E decision di pashentnan Testigo di Jehova pa evitá transfusion pa operacion grandi ta parce di agregá 0,5% pa 1,5% di mortalidad n’e rísico general di operacion. Ménos claro ta cuantu malesa i mortalidad ta ser evitá dor dje práctica aki, pero nan probablemente ta surpasá e rísico di no tuma transfusion.” (Letter cursivo ta di nos.) Su punto? Cualkier rísico médico di rechasá sanger ta probablemente ménos cu e rísico enbolbí den aceptá transfusion di sanger.

P’esei, Kitchens su pregunta razonabel ta: “Si e Testigonan di Jehova cu no ta tuma transfusion realmente ta resultá den poco malesa agudo i mortalidad adicional i ta evitá un cantidad significativo di costo i complicacion crónico, pashentnan mester ricibí ménos transfusion?”

Esnan cu ta rechasá transfusion rib’e base di tal evidencia lo ta actuando tambe na armonia cu e guia di nos Creador.