E Nomber di Dios

“Amenos cu Jehova mes ta traha e cas, constructor ta traha en bano.” Esei ta loke e inscripcion latino ta bisa. E palabra ta basá riba Salmo 127:1 den e Bijbel, i ta contene un berdad profundo: Cualkier esfuerzo cu no tin e bendicion di Jehova lo ser en bano finalmente.

E inscripcion cu e fecha 1780 EC, ta pará skirbí riba un edificio den Colombo, Sri Lanka, i ta notable pasobra e ta contene Jehova, e nomber di Dios. (Mira foto.) Den siglonan di antes su nomber tabata usá na tur parti. Hopi bez e tabata inscribi riba edificio seglar, misa, i asta placa. Misionero a usa e nomber di Dios ora nan a hiba e Bijbel na tera leu, locual indudablemente ta e splicacion dje inscripcion den Sri Lanka.

Ki diferente cosnan tá awe! Poco hende cu ta yama nan mes cristian ta interesá den e nomber di Dios. Algun escolástico asta ta critica Testigo di Jehova pasobra nan ta duna énfasis na dje. Pakico? Segun algun hende, pa motibo cu nan no sa con pa bisé exactamente na hebreo. Pero, cuanto hende sa con pa bisa e nomber di Jesús na hebreo original? Sin embargo, nan ta usa i ta respeta su nomber na tur parti.

E nomber di Dios tabata vitalmente importante pa Jesús. El a síñanos reza: “Santificá sea bo nomber.” (Mateo 6:9) I net promé cu su morto, el a bisa Dios: “Mi a manifesta bo nomber na hende cu bo a dunámi for di mundo.” (Juan 17:6) Cristian berdadero ta sigidor dje pasonan di Jesús. Nan també no mester ‘manifesta e nomber di Dios’? Testigo di Jehova ta haci esei, i Jehova Dios ta bendiciona nan “cas” ricamente. Pa nan, e salmo ta cierto: “Feliz ta e pueblo kende nan Dios ta Jehova!”—Salmo 144:15.