“Testigonan di Jehova A Protehá Mi!”

DURANTE e último dianan aki, hopi hende a resultá di ta “feros, sin amor pa loke ta bon.” (2 Timoteo 3:​1, 3) Isaac, un minister boluntario na un oficina di sucursal dje Sociedad Watch Tower na West Africa, a haña cu esaki ta cierto. E ta conta:

“Na januari 1992, mi tabata biahando riba un caminda largu bandoná den un taxi cu cincu pasahero mas. Mi a cuminsá un combersacion cu e muher sintá band’i mi, i el a aceptá gustosamente un foyeto bíblico fo’i mi.

“Di ripiente, rond di cuat’or di atardi, un auto nobo sin plachi di number a corta nos dilanti i nos auto a lastra un brek i para. Tres homber recio, cada un cu un rifel, a bula sali for dje otro auto i a ranca nos portanan habri. ‘Boso tur, sali pafó,’ un di nan a grita.

“Un otro homber a gara mi tas di buki. Ora el a mira cu e tabata contené solamente literatura bíblico, el a tira e tas un banda. ‘Kico mas bo tin?’ el a puntra, dirigiendo su skopet riba mi. Mi a dun’é unbes e placa den mi potmoni. ‘Esaki ta tur?’ el a puntra. Mi a bis’é cu mi ta un Testigo di Jehova i cu e Testigonan no sa gaña. El a ranca mi potmoni fo’i mi, a mira mi tarheta di identificacion di Watch Tower i a bisa e ora ei, ‘Ok, Watchtower. Para’ki banda.’

“Despues, el a bira n’e muher cu mi a combersá cuné den e taxi. Purá el a kita su cadena di garganta i a dun’é e placa den su cartera. Ora e bandidu a mira e foyeto den su man temblando, el a asumí cu nos tabata huntu, i pues a indik’é p’e para huntu cu mi.

“Miéntras tantu, e otro bandidunan armá a atacá nos otro co-pasaheronan ferosmente. Nan a bati i horta e chofer i e otro homber cu tabata biaha cu nos. Un atracador a gara e cadena di garganta dje di dos muher. Ora el a resistí, nan a dal’e brutalmente riba su cabes i pechu cu cabo di rifel te ora el a muri. Nan a lastra e di tres muher saca for dje vehículo i tir’é den pechu. Ta di lamentá cu e tambe a muri. Solamente ami cu e muher yong huntu cu mi a ser lagá completamente ileso.

“Ora nos a haña un cabe’i boto cerca un auto cu a pasa ei banda, e muher spantá a keda ripití, ‘Testigonan di Jehova a protehá mi!’ ”

[Caption on page 32]

Lo Bo Deseá un Bishita?

Asta den e mundu aki yen di dificultad, bo por haña felicidad for di conocimentu bíblico exacto di Dios, su Reino i su propósito maraviyoso pa humanidad. Si bo ta deseá mas informacion of bo kier pa un hende bishitá bo pa conducí un studio di Bijbel grátis cu bo na cas, por fabor, skirbi Watchtower, P.O. Box 4708, Curaçao, N.A., of n’e adres apropiado mencioná na página 2.