“Boso Tin Mester di Awante”

NOS “tin mester di awante,” pa nos por ricibí “e cumplimentu dje promesa.” (Hebreonan 10:36) Un escolástico bíblico ta splica cu e palabra griego pa “awante” cu apostel Pablo a usa den e texto aki tin biaha ta sirbi pa describí “e abilidad di un mata pa biba bou di circunstancianan difícil i desfaborabel.”

Den e cerunan di Europa, tin un mata asina ta crece. Pa straño cu por parce, e ta ser yamá biba-pa-semper. Naturalmente, e mata alpino aki no ta biba pa semper, pero e ta perseverá aña den aña afó, produciendo flornan exkisito tur zomer. The New Encyclopædia Britannica ta splica cu e nomber biba-pa-semper a ser duná n’e mata debí na su “resistencia i durabilidad.” (E nomber científico pa e matanan aki dje tipo Sempervivum tambe ta nificá “biba-pa-semper.”)

Loke ta haci e mata resistente aki remarcabel ta cu e ta crece den e sitionan di mas inhospitalario. Bo por hañ’é te ariba den bandanan di ceru batí pa bientu, caminda temperaturanan por baha cu 35° Celsio den solamente 24 ora. E por saca rais den un gleuf di baranca cu masha tiki tera. Cua ta algun dje secretonan di su awante den tal condicionnan severo?

E biba-pa-semper tin blachinan diki, cu cuidadosamente ta acumulá awa. Esaki ta capacit’é pa probechá plenamente di tur e humedad disponibel for di awaceru of sneu cu dirti. Ademas, e ta crece na troshi cu ta uni nan forsa pa haña un gara firme riba nan apoyo di baranca. Dor di saca rais den gleufnan, e tin algu di proteccion contra e weer, maske tal bes tin tiki tera. Cu otro palabra, e ta bona dor di saca lo máximo di circunstancianan difícil.

Papiando den sentido spiritual, nos por haña nos mes den circunstancianan cu ta pone na prueba e calidad di nos awante. Kico lo yuda nos wanta bou di prueba? Mescos cu e mata biba-pa-semper, nos por acumulá e awa dunador di bida dje Palabra di Dios i asociá estrechamente cu cristiannan berdadero pa apoyo i proteccion. Mas cu tur cos, mescos cu e flor alpino, nos mester pega tenasmente na nos “baranca,” Jehova, i tambe na su Palabra i su organisacion.—2 Samuel 22:3.

Berdaderamente, e mata biba-pa-semper ta un recordatorio atractivo cu, asta den un ambiente severo, nos por perseverá si nos probechá dje provisionnan disponibel. Jehova ta sigurá nos cu tal awante lo hiba nos na ‘heredá e promesanan,’ cu literalmente lo kier men biba pa semper.—Hebreonan 6:12; Mateo 25:46.