Un Ex-hues Ta Pidi Dispensa—Despues di 45 Aña

DEN un sala di corte na Berlin, na augustus 1995, un ex-hues di Corte Supremo a expresá su remordimentu na un Testigo di Jehova pa un eror cu el a cometé 45 aña promé.

Na october 1950, e Corte Supremo dje República Democrático di Alemania (RDA) a declará nuebe Testigo di Jehova culpabel di agitacion anti-estado i spionahe. Dos a haña sentencia di bida largu i e otro shetenan—incluyendo Lothar Hörnig di 22 aña, riba e potret e di cuater acusado for di man drechi—a ser duná castigunan largu di prizon.

Cuarenta aña despues, e RDA a bira parti di e República Federal di Alemania. Despues dje union, funcionarionan a investigá algun dje inhusticianan cometé den ex-RDA i a trata na hiba esnan responsabel dilanti tribunal. Un dje inhusticianan aki tabata e huicio dje Testigonan den Corte Supremo na 1950.

A. T., cu awor tin 80 aña, tabata un dje tres huesnan cu a pronunciá sentencia ora a trece e nuebe Testigonan na huicio. Awor cu el a ser acusá di a pervertí husticia, el a aparecé dilanti e Corte Regional na Berlin pa splica su decision.

Den su declaracion n’e corte, e ex-hues a admití cu el a vota pa un veredicto di culpabel 45 aña promé, aunke el a preferá castigunan ménos severo. Pero e huicio recien a hacié pensa atrobe. Di con? E nazinan a persiguí Testigonan di Jehova durante e di dos guera mundial pa motibu cu nan a nenga di apoyá Hitler. Despues dje guera atrobe e Testigonan a ser persiguí, e biaha aki dor dje régimen comunista. Esaki a pone e hues bira “profundamente afligí” aya na 1950.

Lothar Hörnig a conta e corte cu el a pasa cincu aña i mei den encarcelamentu solitario i no a ser sacá for dje prizon di Brandenburg te cu 1959. Ora el a tende Hörnig bisa esei, e ex-hues a basha na yoramentu. “Ta duel mi masha hopi mes,” el a snik. “Por fabor, pordoná mi.” Hörnig a aceptá e disculpa.—Compará cu Lucas 23:34.

[Rekonosementu pa Potrèt na página 32]

Neue Berliner Illustrierte