Bo Por Tin “e Curason dje Leon”

BIJBEL tin biaha ta usa e leon como un símbolo di curashi i confiansa. Hombernan balente of cu curashi ta ser describí como si fuera nan tin “e curason dje leon,” i Bijbel ta bisa dje hustunan cu nan ta “manera un leon hóben cu tin confiansa.” (2 Samuel 17:10; Proverbionan 28:1) Specialmente ora e ser desafiá, e leon ta mustra cu e ta merecé su reputacion como “esun mas poderoso entre e bestianan.”—Proverbionan 30:30.

Ta cu e leon su cualidad intrépido Jehova Dios ta compará su determinacion pa protehá su pueblo. Isaías 31:4, 5 ta declará: “Mescos cu e leon, sí, e leon hóben cu klina, ta gruña riba su prooi, ora yama contra dje un cantidad completo di wardador, i apesar di nan bos lo e no spanta i apesar di nan bochincha lo e no sak abou; den e mésun manera Jehova di ehércitonan lo baha bini pa haci guera riba Ceru di Síon . . . Ora e defend’é, e siguramente lo libr’é tambe. Ora e pordon’é, lo e tin cu lagu’e scapa tambe.” Asina Jehova ta sigurá su siguidornan di su interes activo particularmente ora nan topa cu contratempu.

Bijbel ta compará humanidad su adversario principal, Satanas e Diabel, cu un leon cu ta gruña i ta hambrá. Pa evitá di bira su prooi, e Scritura ta bisa nos: “Mantené boso huicio, sea vigilante.” (1 Pedro 5:8) Un manera pa haci esaki ta dor di evitá cabishamentu spiritual fatal. Relacioná cu esaki Jesus a bisa: “Presta atencion na boso mes pa boso curason nunca bira cargá debí na comementu di mas i bebementu di mas i ansiedadnan di bida.” (Lucas 21:34-36) Sí, siendo spiritualmente lantá den e “último dianan” aki por duna nos “e curason dje leon,” un curason cu ta ‘firme, confiando riba Jehova.’—2 Timoteo 3:1; Salmo 112:7, 8.