Un Bishita n’e Tera Primintí

SUPONE un amigu bisá bo cu el a cumpra pa bo—como regalo—un cas nobis-nobis den un ambiente bunita i ketu. ‘Con lo e ta?’ lo bo puntra bo mes. Sin duda lo bo ta ansioso pa mira e cas aki pa bo mes, pa cana den dje i inspeccioná cada cuarto. Al fin i al cabo, esaki ta bo cas nobo!

Na 1473 P.E.C., Jehova a duna e nacion di Israel di antigwedad un cas nobo—e Tera Primintí, un pida teritorio cu tabata midi rond di 500 kilometer for di nort te zuid i 55 kilometer hanchu, como promedio.a Situá den loke a ser yamá e Creciente Fértil, e Tera Primintí tabata un lugá deleitabel pa biba aden, bendicioná cu su propio característicanan único.

Pero pakico awe bo mester ta interesá den un “cas” cu a ser duná na un otro hende, specialmente un persona cu a biba hopi tempu pasá? Pa motibu cu un conocimentu dje tera histórico aki por aumentá bo comprendimentu di relatonan bíblico. “Den e tera di Bijbel,” defuntu profesor Yohanan Aharoni a skirbi, “geografia i historia ta asina profundamente vinculá cu otro cu bo no por comprendé ningun di nan dos bon sin yudansa dje otro.” Ademas, den su mihó tempunan e Tera Primintí a percurá un ehempel na escala chikitu di loke Paradijs bou dje Reino di Dios lo nificá pronto pa humanidad rond mundu!—Isaías 11:9.

Durante su ministerio terenal, Jesucristo a haci uso di bistanan comun den e Tera Primintí pa siña lesnan práctico. (Mateo 13: 24-32; 25:31-46; Lucas 13:6-9) Nos tambe por siña hopi den un manera práctico for di un consideracion di cierto rasgonan di Palestina di antigwedad. Pues laga nos cana dor di algun di su cuartonan, na moda di papia, inspeccionando algun característica distintivo dje tera aki cu a sirbi como hogar p’e pueblo di Dios pa hopi siglo. Manera nos lo mira, tin hopi cos cu nos por siña for dje Tera Primintí.

[Nota]

[Rekonosementu pa Potrèt na página 3]

Garo Nalbandian