“Nos Tur Ta Pertenecé na e Mésun Famia”

DEN añanan recien prehuicio religioso i racismo a plama rond e tera. Diferencianan étnico a incitá matamentu, tortura i otro atrocidadnan bergonsoso. Segun un informe di Amnesty International, violacionnan di derechonan humano a forsa mas cu 23 miyon hende mundialmente pa hui di nan cas na 1994.

Na Ruanda so, rond di 500.000 hende a ser masacrá i mas cu 2.000.000 otronan a bira refugiado despues cu violencia a estayá entre tutsi i hutu. E corant belga Le Soir ta informá cu “Testigonan di Jehova a ser specialmente persiguí pa motibu cu nan ta nenga di carga arma.” Testigonan di Jehova no ta participá den conflictonan armá. No obstante, cientos di nan a ser matá den e violencia. Esaki ta recordá nos dje palabranan di Jesus na su disipelnan: “Dor cu boso no ta parti dje mundu, . . . e mundu ta odia boso.”—Juan 15:19.

Un famia Testigo—Eugène Ntabana, su esposa i dos yunan—tabata biba den e capital, Kigali. Ora di splica neutralidad cristian na su bisiñanan, Eugène hopi bes tabata papia dje trinitaria, un mata cu ta rama subi bai haltu i cu ta bona den climanan cayente.—Mateo 22:21.

“Aki na Kigali,” Eugène tabatin custumber di splica, “trinitaria ta saca flornan corá, ros, i tin biaha blancu. Sin embargo, nan tur ta pertenecé na e mésun famia. Ta mescos cu hende. Aunke nos por ta di diferente rasa, color of antecedente étnico, nos tur ta pertenecé na e mésun famia, e famia di humanidad.”

Trágicamente, apesar di nan naturalesa pacífico i posicion neutral, e famia Ntabana a ser asesiná pa un multitud cu sed di sanger. Sin embargo, nan a muri fiel. Nos por ta sigur cu Jehova Dios lo cumpli cu su promesa na personanan asina, i nan lo ser resucitá pa heredá un mundu caminda prehuicio lo no existí mas. (Echonan 24:15) E ora ei, famia Ntabana, huntu cu otronan, lo “haña nan deleite exkisito den e abundancia di pas.”—Salmo 37:11.