E di 101 Klas di Galad—Celoso pa Obranan Excelente

NOS Creador, Jehova Dios, ta celoso pa obranan excelente, i tambe su Yu, Jesucristo. Como nos modelo, Jesus a demostrá celo dor di cumpli cu e asignacion cu Dios a dun’é, cua a incluí duna “su mes pa nos p’e por . . . limpia pa su mes un pueblo specialmente di dje, celoso pa obranan excelente.” (Tito 2:14) E 48 miembronan dje di 101 klas dje Scol Bíblico di Galad di Watchtower siguramente a demostrá nan celo pa obranan excelente. E programa di graduacion p’e misioneronan aki a ser tené dia 7 di september, 1996, n’e Centro Educacional di Watchtower na Patterson, New York.

Conseho Práctico pa Permanecé Celoso

E presidente dje programa di graduacion tabata Carey Barber, miembro dje Cuerpo Gobernante, kende tin mas cu 70 aña den e ministerio di tempu completo. Den su comentarionan di introduccion, Ruman Barber a hala atencion n’e actividad di predicá i di siña di Jesus, kende tabata “e lus dje mundu.” (Juan 8:12) El a mustra cu Jesus no a tene e papel onorabel ei pa su mes sino a urgi su disipelnan pa nan tambe laga nan lus briya. (Mateo 5:14-16) E privilegio di sirbishi aki ta duna mas propósito n’e bida di un cristian i ta pone un responsabilidad pisá riba scouder di tur esnan cu ta ‘canando como yunan di lus.’—Efesionan 5:8.

Despues dje comentarionan di apertura ei, Don Adams dje Oficinanan Ehecutivo n’e sede na Brooklyn a ser introducí. El a papia riba e tema “Moviendo Padilanti, No Patras.” Ruman Adams a enfocá riba e Scol di Galad mes i su propósito—pa extendé e predicacion dje bon nobo na paisnan stranhero. El a papia dje adelanto dje organisacion di Dios, cu a publicá literatura bíblico na tur parti di mundu den mas cu 300 idioma. E buki Conocimentu cu Ta Hiba na Bida Eterno, publicá na 1995, a ser hací disponibel den 111 idioma i ta den preparacion pa ser imprimí den mas idioma ainda. Ya caba el a sirbi como un medio principal pa yuda disipelnan nobo di Jesus alcansá e punto di dedicacion i bautismo den solamente un par di luna. Pues e misioneronan nobo lo tin lo último den yudansa pa studio di Bijbel disponibel pa nan trabou.

Siguientemente, Lyman Swingle, miembro dje Cuerpo Gobernante, a papia riba e tema “Sigui Rindi Jehova Bo Sirbishi Sagrado,” basá riba Revelacion 7:15. Siendo cu Jehova mes ta un Dios felis, sirbiend’e continuamente ta loke ta haci un persona felis. (1 Timoteo 1:11) Como resultado dje sirbishi gososo aki, un multitud grandi di individuonan for di tur parti dje tera a bini ta ador’é. Den transcurso di añanan, esnan cu a ser entrená den Scol di Galad a contribuí pa yuda hopi di esakinan yega na un conocimentu exacto dje berdad. P’esei, nos tin tur motibu pa kere cu Jehova lo sigui bendicioná esnan cu awor ta ser mandá pa estranheria pa recogé mas miembro dje multitud grandi cu ta expandiendo.

“Reflehando e Goso di Jehova” tabata e tema cu Daniel Sydlik, miembro tambe dje Cuerpo Gobernante, a resaltá. El a mustra cu tur sirbidor di Dios, incluyendo e misioneronan nobo, tin e privilegio di siña hende e caminda di bida eterno i e caminda pa saca lo mihó di bida awor. “Siñamentu,” Ruman Sydlik a declará, “ta un profesion cu tin su propio recompensa. E ta ser reflehá riba cara dje hendenan cu ta siña otronan i riba cara dje hendenan cu ta ser siñá.” (Salmo 16:8-11) El a cita un misionero na Estonia cu a bisa, “Nos tin e mensahe di mas importante riba cara dje tera, i ta nos cara ta refleh’é.” Nos expresion di cara por habri hopi porta i lanta interes. Hende kier sa kico ta haci Jehova su sirbidornan felis. “Pues presta atencion na boso cara,” Ruman Sydlik a consehá. “Hende ta gusta mira hende felis.”

Ulysses Glass, kende a sirbi como instructor na studiantenan di Galad desde e di 12 klas na 1949, a papia cu e auditorio riba e tema “Cu Pacenshi, Warda Boso Alma.” Kico ta pacenshi? E ta transmití e idea di spera cu calmu riba algu, manifestando pacenshi ora bo ta ser provocá of ta bou di tension. E persona paciente ta keda calmu; esun impaciente ta bira anshá i krepchi. “Hopi hende ta kere cu pacenshi ta indicá debilidad of indecision,” Ruman Glass a remarcá, pero “pa Jehova e ta carga e insignia di fortalesa i propósito.” (Proverbionan 16:32) Kico ta e dividendonan cu pacenshi ta paga? “Pacenshi den un momento di rabia lo spar bo di shen dia di angustia,” un proverbio chines ta bisa. “Pacenshi ta duna realce na bo personalidad,” Ruman Glass a comentá. “De facto, e ta cubri otro cualidadnan excelente cu un vernis di permanencia. E ta haci fe deseabel, pas duradero, i amor insagudibel.”

“Ta un privilegio pa ricibí un asignacion for di Jehova Dios mediante su organisacion,” segun Mark Noumair, kende a sirbi como misionero na Kenya pa 11 aña i awor ta un instructor di Galad. Segun cu Ruman Noumair a desaroyá e tema “Aménos cu Boso Tin Fe, Boso Lo No Dura Mashá,” el a hala atencion n’e ehempel di Rey Acas di Huda. Isaías a garantisá e rey cu lo e ricibí Jehova su apoyo den su asignacion, pero tog Acas no a confia den Dje. (Isaías 7:2-9) E ora ei Ruman Noumair a mustra cu misioneronan—en realidad, nos tur—tin mester di fe den Jehova afin di por dura largu den nan asignacion teocrático. E desafionan particular di un asignacion di misionero ta exigí fe fuerte. “Semper tene na mente cu no tin ningun situacion perfecto den e sistema di cosnan aki,” Ruman Noumair a declará.

Experencianan cu Ta Animá Actividad Celoso

Durante e curso di nan entrenamentu di Galad, e studiantenan a dedicá tempu tur fin di siman den e ministerio público, locual lo ta tambe e interes principal den nan asignacion di misionero. Wallace Liverance, miembro dje facultad di Galad, a entrevistá 15 studiante, kendenan a relatá nan experencianan. Despues Leon Weaver dje Comité di Departamento di Sirbishi i Lon Schilling dje Comité di Funcionamentu di Betel a entrevistá miembronan di comiténan di sucursal di Africa i Latinoamérica, kendenan a relatá experencianan for dje campo di misionero i kendenan a duna algun conseho excelente p’e misioneronan cu a gradua. A sali na cla cu na Sierra Leona, rond di 90 porciento di esnan bautisá durante e aña di sirbishi di 1995 a ser yudá dor dje misioneronan. Esta un registro excelente di actividad celoso!

Finalmente, Milton Henschel, presidente dje Sociedad, a dirigí su mes n’e auditorio di 2.734 persona riba e tema “Jehova Su Organisacion Visibel Ta Unico.” Kico ta haci e organisacion di Dios algu sin igual? No ta ni su tamaño ni su poder sino e echo cu e ta ser guiá dor di Dios su reglamentunan i decisionnan hudicial hustu. Den tempu antiguo tabata Jehova su pueblo, e nacion di Israel, cu a ser confiá cu Jehova su pronunciacionnan sagrado, locual a haci e nacion ei único. (Romanonan 3:1, 2) Awe, Jehova su organisacion ta uní segun cu e ta funcioná bou dje guia di Jesucristo. (Mateo 28:19, 20) E ta prosperando, creciendo. Tin un otro organisacion riba tera kende su Cuerpo Gobernante ta consultá e Palabra di Dios, Bijbel, promé cu nan tuma decisionnan importante? Den e maneranan aki i den otronan, Jehova su organisacion visibel ta berdaderamente único.

Un programa deleitabel a concluí cu e presentacion dje diplomanan i e lesamentu di un carta di parti dje klas cu a expresá aprecio p’e entrenamentu special.

[Kuadro na página 22]

Stadísticanan dje Klas

Cantidad di pais representá: 9

Cantidad di pais na cua nan a ser asigná: 12

Cantidad di studiante: 48

Edad promedio: 31,7

Promedio di aña den e berdad: 13,8

Promedio di aña den e ministerio di tempu completo: 9,8

[Plachi na página 23]

E di 101 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá for di dilanti bai patras, i e nombernan di robes pa drechi den cada rij.

(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.