Librá dor dje Berdad

NA MERCA, mas cu un miyon hende ta cerá den prizon. Di esakinan, casi tres mil a ser sentenciá na morto. Imaginá bo mes den e situacion ei. Con lo bo sintí bo? E idea di un prospecto asina en berdad ta desalentador. Tog, den un sentido, tur hende ta den un circunstancia similar. Bijbel ta bisa: “Tur a peca i no ta alcansá e gloria di Dios.” (Romanonan 3:23) Sí, como desendiente di Adam, nos ta “encarcelá” den un estado pecaminoso. (Romanonan 5:12) Nos ta sinti e efectonan di nos encarcelacion tur dia, mescos cu e apostel cristian Pablo a sinti, kende a skirbi: “Mi ta contemplá den mi miembronan un otro ley cu ta haci guera contra e ley di mi mente i ta hibá mi catibu n’e ley di picá cu ta den mi miembronan.”—Romanonan 7:23.

Como resultado di nos naturalesa imperfecto, cada un di nos ta bou di un sentencia di morto, na moda di papia, pasobra Bijbel ta declará: “Pago cu picá ta paga ta morto.” (Romanonan 6:23) E salmista Moises a describí nos situacion aptamente: “E dianan di nos bida ta setenta aña, of pa motibu di forsa, ochenta aña; sinembargo nan orguyo ta molester i pena, pasobra un djis el a pasa i nos ta bula bai.”—Salmo 90:10, E Testament Bieu di Editorial Evangélica; compará cu Santiago 4:14.

Tabata cu humanidad su sclabitud na picá i morto na mente cu Jesus a bisa su siguidornan: “E berdad lo haci boso liber.” (Juan 8:32) Cu e palabranan ei, Jesus tabata extendiendo na su sirbidornan e speransa di algu muchu mas grandi cu libertad for di dominacion romano—e tabata ofreciendo nan un pordon for di picá i un liberacion for di morto! Con esaki lo a ser otorgá na nan? “Si e Yu libra boso,” Jesus a bisa nan, “boso lo ta realmente liber.” (Juan 8:36) Sí, dor di entregá su bida, “e Yu,” Jesus, a sirbi como un sacrificio di reconciliacion p’e cumpra bek loke Adam a perde. (1 Juan 4:10) Esaki a habri e caminda pa henter humanidad obediente ser librá for di sclabitud na picá i morto. E Yu unigénito di Dios a muri “pa tur cu ehercé fe den dje no sea destruí sino haña bida eterno.”—Juan 3:16.

Pues, e berdad cu por haci nos liber ta drei rond di Jesucristo. Esnan cu ta bira su siguidornan tin e speransa di ser librá for di picá i morto ora e Reino di Dios tuma mando completo di asuntunan riba tera. Asta awor, esnan cu ta aceptá e berdad dje Palabra di Dios ta experenciá berdadero libertad. Den ki maneranan?

Librá for di Miedu dje Mortonan

Miyones di hende awe ta biba den miedu dje mortonan. Pakico? Pasobra nan religion a siña nan cu un alma ta bandoná e curpa ora e hende muri i ta pasa pa un region di spiritu. P’e motibu ei ta un custumber den algun pais p’e parientenan dje defuntu tene un belorio cu ta dura vários dia i anochi. Esaki hopi biaha ta bai compañá cu cantamentu na bos haltu i batimentu di tambú. E hendenan na luto ta kere cu esaki lo agradá e persona morto i prevení su spiritu di bini bek pa molestiá e bibunan. Cristiandad su siñansanan falsu tocante e mortonan a sirbi solamente pa laga e tradicion aki continuá.

Sin embargo, Bijbel ta revelá e berdad tocante e condicion dje mortonan. E ta describí claramente cu bo alma ta abo, no un of otro parti misterioso di bo cu ta sigui biba despues di morto. (Génesis 2:7; Ezekiel 18:4) Ademas, e mortonan no ta ser tormentá den un fiernu di candela, ni nan no ta parti di un region di spiritu cu por afectá e bibunan. “En cuanto e mortonan,” Bijbel ta bisa, “nan no ta conciente di nada en absoluto . . . No tin trabou ni formacion di proyecto ni conocimentu ni sabiduria den Sheol [e graf], e lugá unda bo ta bayendo.”—Eclesiástes 9:5, 10.

E berdadnan di Bijbel aki a libra hopi hende for di miedu dje mortonan. Nan no ta ofrecé sacrificionan costoso mas pa calma nan antepasadonan, ni nan no ta preocupá cu nan stimánan ta ser tormentá sin misericordia pa nan picánan. Nan a siña cu Bijbel ta ofrecé un speransa maraviyoso pa esnan cu a muri, pasobra e ta bisa nos cu n’e debido tempu di Dios, lo tin “un resureccion di tantu e hustunan como e inhustunan.” (Echonan 24:15; Juan 5:28, 29) Pues, awor e mortonan ta simplemente sosegando, como si fuera den un soño profundo.—Compará cu Juan 11:11-14.

E berdad tocante e condicion dje mortonan i e speransa di un resureccion por libra nos for dje desesperacion cu morto por trece cuné. Un speransa asina a sostené un pareha casá di Merca ora nan yu homber di cuater aña a muri den un accidente. “Tin un bashí den nos bida cu no por ser yená te ora nos mira nos yu atrobe mediante e resureccion,” su mama ta admití. “Pero nos sa cu nos dolor ta solamente temporal, ya cu Jehova ta primintí di seca tur nos lágrimanan di tristesa.”—Revelacion 21:3, 4.

Librá for di Miedu di Futuro

Kico e futuro ta encerá? Nos tera lo ser kimá den un holocausto nuclear? Ruinamentu di medio ambiente dje tera lo haci nos planeta inhabitabel? Degeneracion moral lo hiba na anarkia i cáos? Esakinan ta miedunan real pa hopi hende awe.

Sin embargo, Bijbel ta ofrecé libertad for di tal miedu spantoso. E ta sigurá nos cu “e tera ta permanecé asta pa tempu indefiní.” (Eclesiástes 1:4) Jehova no a crea nos planeta simplemente pa mir’é ser destruí dor di hende iresponsabel. (Isaías 45:18) Mas bien, Jehova a crea e tera pa sirbi como un hogar paradísico pa un famia humano uní. (Génesis 1:27, 28) Su propósito no a cambia. Bijbel ta bisa nos cu Dios lo “causa e ruina di esnan cu ta ruinando e tera.” (Revelacion 11:18) Despues di esei, “e mansunan mes lo poseé e tera,” Bijbel ta bisa, “i nan berdaderamente lo haña nan deleite exkisito den e abundancia di pas.”—Salmo 37:11.

E promesa aki ta confiabel, pasobra Dios no ta gaña. Jehova a declará mediante su profeta Isaías: “Mi palabra cu ta sali for di mi boca lo . . . no bolbe na mi sin resultado, sino cu siguramente lo e haci loke mi tin deleite aden, i lo e tin éxito sigur pa locual mi a mand’é.” (Isaías 55:11; Tito 1:2) P’esei, nos por spera cu confiansa riba e cumplimentu dje promesa di Dios registrá den Bijbel na 2 Pedro 3:13: “Tin shelu nobo i un tera nobo cu nos ta spera segun su promesa, i den esakinan husticia lo tin cu biba.”

Librá for di Miedu di Hende

Bijbel ta duna nos ehempelnan sobresaliente di homber i muhernan cu a desplegá balentia den nan debocion na Dios. Entre esakinan tabatin Gídeon, Barak, Débora, Daniel, Ester, Jeremías, Abigail i Jael—pa mencioná djis un par. E homber i muhernan fiel aki a desplegá e actitud dje salmista kende a skirbi: “Den Dios mi a pone mi confiansa. Lo mi no tin miedu. Kico hende terenal por hací mi?”—Salmo 56:11.

Den e promé siglo, e apostelnan Pedro i Juan a desplegá un curashi similar ora autoridadnan seglar a manda nan pa stop di predicá. “En cuanto nos,” nan a contestá, “nos no por stop di papia tocante loke nos a mira i a tende.” Como resultado di nan posicion firme, Pedro i Juan a ser encarcelá mas tardi. Despues di nan liberacion milagroso, nan a reanudá nan actividad i a sigui “papia e palabra di Dios cu frankesa.” Pronto Pedro i e otro apostelnan a ser trecé dilanti e Sanedrin hudiu. “Nos a ordená boso positivamente pa no sigui siña riba base dje nomber aki,” e sumo sacerdote a bisa nan, “i tog, mira! boso a yena Jerusalem cu boso siñansa.” Pedro i e otro apostelnan a contestá: “Nos tin cu obedecé Dios como gobernante mas bien cu hende.”—Echonan 4:16, 17, 19, 20, 31; 5:18-20, 27-29.

Den nan trabou di predicá e bon nobo dje Reino di Dios, Testigonan di Jehova awe ta haci esfuerso pa imitá e celo dje cristiannan di promé siglo. Asta e hóbennan entre nan hopi biaha ta duna prueba di nan curashi dor di papia cu determinacion cu otronan tocante nan fe. Considerá algun ehempel.

Stacie, un tiener, ta tímido di naturalesa. Como resultado, na cuminsamentu tabata un desafio p’e papia cu otronan tocante su fe. Kico el a haci pa vence su timides? “Mi a studia Bijbel i a haci sigur cu mi a comprendé loke mi tabata papia di dje,” e ta bisa. “Esei a hacié mas fácil, i mi tabatin mas confiansa den mi mes.” E corant local tabatin un informe tocante Stacie su reputacion excelente. E artículo, skirbí dor di un maestra di su scol, a comentá: “[Stacie] su fe ta parce di a dun’é e fortalesa p’e lucha cu e presionnan cu mayoria tiener ta sinti. . . . E ta sinti cu sirbishi na Dios mester ta e cos principal den su mente.”

Tommy a cuminsá siña tocante Bijbel for di su mayornan ora e tabatin solamente cincu aña di edad. Asta na un edad yong, el a tuma un posicion yen di curashi pa adoracion berdadero. Miéntras cu su compañeronan yong di klas tabata pinta esenanan di dianan di fiesta, Tommy tabata pinta esenanan di Dios su Paradijs primintí. Como tiener, Tommy a ripará cu hopi dje alumnonan tabata confundí tocante e creencianan di Testigonan di Jehova. En bes di keda ketu debí na miedu dje alumnonan, el a pidi un di su maestronan si e por a dirigí un sesion di pregunta-i-contesta cu su klas di manera cu e por a contestá tur nan preguntanan den un tiru. El a haña e oportunidad aki, i el a duna un excelente testimonio.

Ora Markietta tabatin 17 aña di edad, el a haña un oportunidad excelente pa papia cu otronan den su klas tocante su religion. “Nos a haña un asignacion pa traha un spreekbeurt,” e ta bisa. “Mi a scoge mi tópico for dje buki Loke hovenan sa puntra—Contesta práctica.a Mi a selectá cincu capítulo for dje buki i a skirbi e títulonan riba borchi. Mi a pidi e klas pa pone nan den e órden di importancia pa nan.” A sigui un discusion cu participacion dje klas. “Mi a mustra e klas e buki,” Markietta ta concluí, “i un cantidad di alumno a pidi pa un ehemplar. Asta mi maestra a bisa cu e tabata kier unu.”

Bo Por Ser Librá dor dje Berdad

Manera nos a mira, e berdad cu Bijbel ta contené tin un efecto libertador riba hende di tur edad cu ta studi’é i cu ta tuma su mensahe na pechu. E ta libra nan for di miedu dje mortonan, miedu di futuro i miedu di hende. Por último, e rescate di Jesus lo libra humanidad obediente for di picá i morto. Lo ta ki un goso pa biba pa semper den un paradijs riba tera, sin ta encarcelá mas dor di nos condicion heredá pecaminoso!—Salmo 37:29.

Abo lo kier siña mas tocante e bendicionnan cu Dios a primintí? Si ta asina, kico bo mester haci? Jesus a bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun ken bo a manda, Jesucristo.” (Juan 17:3) P’esei si bo kier experenciá e libertad cu Jesus a primintí na su disipelnan, bo tin cu siña tocante Jehova Dios i su Yu. Bo mester sa kico ta e boluntad di Dios anto hacié, pasobra Bijbel ta bisa: “E mundu ta pasa bai i tambe su deseo, pero esun cu ta haci e boluntad di Dios ta permanecé pa semper.”—1 Juan 2:17.

[Nota]

[Plachi na página 7]

Bou dje Reino di Dios, humanidad finalmente lo ser librá for di picá i morto