Un Matrimonio di 403 Aña Ta den Problema

NA Suecia, Iglesia i Estado a disfrutá di un relacion íntimo pa mas cu 400 aña. Awor e matrimonio entre religion i gobiernu ta debilitando.

Luteranismo a ser establecé como religion di Estado na 1593, i tur sueco mester tabata miembro bautisá. Hopi tempu despues, durante añanan di 1850, a haci un ahuste. No tabata necesario mas pa sueconan ser bautisá; no obstante, ainda nan a ser considerá como miembro dje Iglesia Luterano. Como tal, tabata rekerí di nan pa paga 1 porciento di nan entrada total despues di kita belasting pa mantené e iglesia i pa paga pa cierto servicionan civil cu e iglesia tabata rindi. Mas recientemente un otro cambio a tuma lugá. Cuminsando na 1952, sueconan por a kita legalmente for di iglesia i asina ser dispensá di paga un gran parti dje impuesto di iglesia.

Den añanan recien e Iglesia Luterano a sigui perde su gara na Suecia. Esaki tabata inevitabel, ya cu 10 porciento dje habitantenan di Suecia ta imigrantenan no-luterano, incluyendo hudiu, católico i moslimnan. Asina, na principio di 1996, solamente 86 porciento di sueco tabata pertenecé na e Iglesia Luterano, i e cantidad ta sigui mengua.

E creciente apatia ta causando un kiebro entre Iglesia i Estado. Ya caba, a ser declará cu e rey no mester ta luterano, i muchanan cu nace di mayornan luterano no ta ser considerá automáticamente miembro dje Iglesia Luterano Estatal. Ademas, segun The Dallas Morning News, pa aña 2000, “parokianan local i e estado mester evaluá i dividí cantidadnan enorme di propiedad cu awor ta di iglesia. E iglesia mester reducí su presupuesto anual di 1.680 miyon dollar mericano, di cua mayor parti e Estado ta colectá via belasting.” Despues di aña 2000, e iglesia mes lo nombra su obispunan.

Miéntras cu apatia i menguamentu di membresia ta plaga cristiandad, Testigonan di Jehova na Suecia ta sigui florecé. E Anuario de los testigos de Jehová para 1997 ta informá cu tin 24.487 publicador dje Reino di Dios den e pais ei, i casi 10 porciento ta predicando como ministernan pionero di tempu completo. Hopi di esakinan ta purba alcansá mayor privilegionan di sirbishi. Por ehempel, durante e congresonan di distrito di Testigonan di Jehova na 1995, 20 pareha casá a entregá solicitud pa entrenamentu como misionero na e Scol Bíblico di Galad di Watchtower. N’e tempu ei, tabatin rond di 75 graduado sueco di klasnan anterior di Galad kendenan ta sirbiendo den sirbishi di misionero den diferente parti di mundu. Sin duda, nan ehempel excelente i cartanan i bishitanan animador na Suecia tin un efecto stimulante riba esnan cu awor ta pensando riba e privilegio magnífico aki.

Pues, miéntras cu miyones di hende di cristiandad ta sufriendo di kebranto di spiritu, Testigonan di Jehova ta “sclama cu goso debí n’e bon condicion di curason.”—Isaías 65:13, 14.

[Mapa na página 30]

(Pa e teksto den su formato kompleto, wak e publikashon)

Suecia