Casamentunan Cu Ta Onra Jehova

E siguiente artículo tocante casamentunan cristian a ser prepará originalmente na Etiopia pa percurá guia útil den e idioma amárico pa hopi hende den e pais ei cu recientemente a bira Testigo di Jehova. E ta trata cu algun custumber i práctica local cu tal bes ta diferente for di esnan caminda abo ta biba. Probablemente lo bo haña e contraste basta interesante. Na mésun tempu, e artículo ta presentá conseho bíblico balansá cu lo bo mira ta aplicabel asta si custumbernan di casamentu ta diferente den bo localidad.

“CASAMENTUNAN Cristian cu Ta Resultá den Goso” tabata e título di un excelente artículo di studio den La Atalaya di 15 di april, 1984. E siguiente artículo den e edicion ei tabata titulá “Haña Disfrute Balansá den Fiestanan di Casamentu.” (Pa cualkier persona cu ta pensando pa casa, tin mas conseho sabí den e bukinan Logrando felicidad den bida di famía, capítulo 2, i Bo hubentud—sacando mayor probecho foi dje, capítulo 19 i 20.)a Hopi hende a bira Testigo di Jehova desde cu e artículonan ei a sali, p’esei nos kier repasá algun punto cu ta particularmente aplicabel na nos área, i tambe algun otro punto apropiado cu lo yuda nos haci casamentunan ocasionnan cu ta onra Jehova, e Originador di matrimonio.

Un pregunta cu kisas por considerá promé ta, Na ki tempu un casamentu mester tuma lugá? Mester laga fechanan dje temporada tradicional di casamentu dicta e fecha cu abo ta pone? Creencia local ta cu cualkier matrimonio cu tuma lugá na cualkier otro tempu di aña lo no tin éxito. Esaki ta un supersticion sin base, pasobra hopi pareha casá cu felismente i unidamente ta sirbiendo Jehova no a casa durante e temporada tradicional. Nos no ta kere den bon of mala suerte. (Isaías 65:11; Colosensenan 2:8) Nos lo no yuda famianan no-creyente mira e diferencia entre berdad i falsedad si nos fiha un fecha di casamentu segun nan supersticion. Echo ta cu cristiannan por casa den cualkier luna.

Ora haci areglo pa un discurso di matrimonio despues dje ceremonia civil necesario, lo ta sabí pa no tin un periodo di tempu di hopi dia entre e dos eventonan. Si e pareha lo kier tin un discurso di matrimonio den e Salon di Reino, nan mester acercá e ancianonan di congregacion hopi tempu di antemano pa pidi pa usa e salon. E ancianonan local lo confirmá si e areglonan pa e ceremonia lo laga nan cu concenshi limpi. Mester pone e ora dje discurso di tal manera cu lo e no stroba ningun actividad di congregacion. E ruman homber scogí pa duna e discurso di matrimonio lo reuní di antemano cu e prospectivo bruidegom i bruid pa ofrecé conseho útil i pa haci sigur cu no tin ningun strobansa moral of legal pa cu e matrimonio i cu e mes ta di acuerdo cu e plannan pa cualkier reunion social cu lo sigui despues. E discurso di matrimonio lo mester ta rond di mei ora largu i presentá den un manera dignificá, enfatisando e aspecto spiritual. E discurso di matrimonio definitivamente ta mas importante cu cualkier recepsi cu lo por tin despues.

Un casamentu cristian ta un bon oportunidad pa mustra cu nos “no ta parti di mundu.” (Juan 17:14; Santiago 1:27) Nos manera ordená mester resaltá. Esaki lo nificá cu nos lo ta na tempu en bes di laga hende warda riba nos, posiblemente interfiriendo cu actividadnan di congregacion. Esaki ta specialmente algu pa e bruid ta conciente di dje, ya cu famianan mundano kisas ta inst’é pa ta lat—como si fuera pa resaltá su importancia. Dor di ta puntual un ruman muher cristian maduro por demostrá cu cualidadnan spiritual, manera humildad i consideracion, ta importante p’e! Tambe, ora invitá un fotógrafo pa saca potret dje ocasion, ta importante pa ser ordená. Lo ta bon pa rekerí dje fotógrafo p’e bin bistí formalmente na bachi cu dashi i pa e no interferí cu e discurso ora di saca potret. No mester saca potret durante e oracion. Nos manera ordená lo onra Jehova i duna un testimonio excelente. No ta necesario pa purba conformá na custumbernan mundano di casamentu cu lo tapa e berdadero nificacion dje evento.

Recepsi no ta un rekisito pa un casamentu exitoso, pero no tin ningun obhecion bíblico contra un ocasion felis asina. Sin embargo, un reunimentu asina pa cristiannan berdadero mester ta distinto for di recepsinan mundano marcá pa extravagancia, bebementu pisá, demasiado comementu, música loco-loco, bailamentu sugestivo i asta peleanan. Bijbel ta clasificá “paranda” huntu cu e obranan di carni. (Galationan 5:21) Ta mas fácil pa tin bon control ora no tin muchu hopi hende. No ta necesario pa pone un tent djis pa satisfacé custumber popular. Si algun dicidí di usa un tent pa motibu di espacio of weer, esaki ta un asuntu personal.

Experencia a mustra cu un bon manera pa limitá e cantidad di invitado ta dor di usa invitacionnan specífico por escrito. Ta mas sabí pa invitá personanan individual cu congregacionnan completo, i como cristiannan ordená, nos mester respetá e limitacion dje cantidad di invitado. Invitacionnan skirbí tambe ta yuda nos evitá e bergwensa di cu un persona scomulgá ta presentá n’e recepsi, pasobra si esei sosodé, hopi ruman kisas ta scoge pa bai. (1 Corintionan 5:9-11) Si un pareha invitá famia of conocínan nocreyente, sin duda esakinan lo ta limitá na cantidad, dunando mas importancia na esnan “relacioná cu nos den e fe.” (Galationan 6:10) Algun ruman a scoge pa invitá conocínan mundano i famianan no-creyente na e discurso di matrimonio en bes di na e recepsi. Pakico? Wel, tabatin casonan caminda famianan mundano a crea un situacion asina bergonsoso na un recepsi di casamentu cu hopi ruman a sinti cu nan no por a keda. Algun pareha a haci areglo pa tin solamente un comementu chikitu cu miembronan íntimo di famia i amigunan cristian íntimo.

Na armonia cu Juan 2:8, 9, ta práctico pa scoge un “director dje fiesta.” E bruidegom mester scoge un cristian di confiansa cu lo soru pa cosnan bai ordená i segun normanan haltu. Caminda invitadonan ta trece regalo, mester haci esaki sin “exhibicion grandioso.” (1 Juan 2:16) Música por ta dushi sin ta manchá cu letranan cuestionabel, demasiado desordu of ritmo salbahe. Hopi pareha a haña cu ta mihó pa laga un anciano scucha di antemano na e música cu lo ser tocá. Bailamentu lo por trece trampanan, ya cu hopi baile tradicional ta derivá di bailenan di fertilidad i ta presentá sensualidad inapropiado. E “momento di corta bolo i bebe shampaña” tin biaha tabata e señal pa hende mundano los tur frena. De echo, hopi pareha cristian a dicidí di no tin nada di alcohol na recepsinan di casamentu, evitando problema asina.

Ya cu nos kier onra Jehova, nos lo evitá exhibicion grandioso pa atraé demasiado atencion na nos mes. Asta publicacionnan seglar a papia contra dje tendencia popular di ta extravagante. Ki imprudente lo ta pa un pareha bai den debe pa motibu di un casamentu hopi luhoso i despues pasa necesidad pa añanan afin di paga e gastunan di esun dia ei! Naturalmente, cualkier bistí pa e ocasion ei mester ta modesto i bon areglá, manera ta pas pa un persona cu ta profesá di ta adorá Dios. (1 Timoteo 2:9, 10) E artículo “Casamentunan Cristian Mester Reflehá Razonabilidad” (La Atalaya di 15 di juni, 1969 [na ingles 15 di januari, 1969]) a duna e comentarionan interesante aki tocante bistimentu:

“Bo casamentu ta un ocasion special, pues normalmente atencion ta ser duná pa mustra contentu i atractivo. Sin embargo, esaki no kier men cu bo mester bisti un cierto tipo di trahe of flus. Bo ta haci bon di tuma na cuenta estilonan local, gastu i gustu personal. . . . Sin embargo, lo ta razonabel pa cumpra un trahe asina caru te cu e ta causa un carga financiero pa e pareha mes of pa otronan? . . . Algun bruid a disfrutá di usa e trahe di un amiga of famia stimá. Otronan a ricibí gran satisfaccion den cose nan propio bistí di bruid, posiblemente pa asina nan por tin un paña cu lo por ser usá na otro ocasionnan den futuro. I ta perfectamente apropiado pa un pareha casa den nan pañanan normal di mas nechi . . . Otronan cu tal bes por aford di tene un casamentu elaborá por dicidí personalmente di tin un ‘casamentu ketu’ debí n’e tempu crítico.”

Di igual manera, e participantenan den e casamentu (e amigunan dje bruidegom i e compañeranan dje bruid) no mester ta hopi. Nan tambe lo no kier hala indebido atencion na nan mes dor di nan bistí i accionnan. Aunke por permití un persona scomulgá asistí n’e discurso na Salon di Reino, La Atalaya di 15 di april, 1984, a bisa: “Lo ta inapropiado pa tin entre e participantenan dje casamentu hende cu ta scomulgá of kende nan estilo di bida escandaloso ta gravemente na conflicto cu principionan bíblico.”

Maske Jesus a asistí na un casamentu, nos no por imaginá cu lo el a aprobá dje custumber popular di tin un procesion di auto core dor di stad haciendo hopi desordu; polis asta a yega di boet shofernan pa pitamentu di auto den un procesion di casamentu. (Mira Mateo 22:21.) Den poco palabra, en bes di copia e exhibicion grandioso of accionnan típico dje hendenan dje nacionnan, cristiannan mester manifestá e sabiduria cu ta pertenecé na hende modesto.—Proverbionan 11:2.

Pero kico di asistí na casamentunan di bisiña, compañeronan di trabou mundano of famianan djaleu i conocínan? Cada cristian mester dicidí personalmente riba esaki. Ta bon pa tene na mente cu nos tempu ta precioso, ya cu nos tin mester di tempu pa nos ministerio, studio personal i otro actividadnan di famia i di congregacion. (Efesionan 5:15, 16) Den fin di siman, nos tin reunionnan i sirbishi di veld cu nos no kier perde. (Hebreonan 10:24, 25) E ora di hopi casamentu ta cai net ora cu tin asambleanan of actividadnan special di sirbishi cu ta conectá cu e Cena di Señor. Nos no mester laga cosnan kita nos di haci e mésun esfuersonan special cu nos rumannan rond parti mundu ta haciendo pa asistí na e Cena di Señor. Promé cu nos a haña un conocimentu dje berdad, nos a pasa hopi tempu cu hende di mundu, kisas den circunstancianan cu a desonrá Dios. (1 Pedro 4:3, 4) Awor nos prioridadnan ta distinto. Semper ta posibel pa felicitá un pareha di mundu dor di manda un karchi of dor di haci un bishita breve riba un otro dia. Algun a usa ocasionnan asina pa duna un testimonio, compartiendo algun texto bíblico cu ta apropiado pa hende recien casá.

Un casamentu caminda e aspectonan spiritual ta dominá riba e maneranan dje mundu berdaderamente lo onra Jehova. Dor di haci sigur cu nan ta keda separá for dje mundu cu su supersticionnan i cosnan exagerá, dor di no lagu’é interferí cu actividadnan teocrático, i dor di manifestá modestia en bes di exhibicion grandioso, cristiannan lo disfrutá dje ocasion. Ademas, nan lo por wak bek n’e evento cu un bon concenshi i recuerdonan grato. Desplegando sabiduria i razonabilidad, laga tur nos casamentunan cristian duna un testimonio na observadornan di curason sincero.

[Nota]

[Plachi na página 24, 25]

Cristiannan no ta sinti nan obligá pa sigui delaster un custumber local di casamentu