Dokternan, Huesnan i Testigonan di Jehova

AYA na mart 1995, Testigonan di Jehova a patrociná dos seminario na Brazil. E propósito? Pa busca cooperacion di personal médico i hurídico pa ora un pashent di hospital ta un Testigo di Jehova i no por aceptá un transfusion di sanger.—Echonan 15:29.

Lamentablemente, den algun caso dokternan a ignorá deseonan di pashentnan Testigo i a busca pa obtené decisionnan di corte pa forsa duna un transfusion di sanger. Den situacionnan asina e Testigonan a usa tur medio legal disponibel pa protehá nan mes. No obstante, nan a preferá cooperacion en bes di confrontacion. P’esei e seminarionan a enfatisá cu tin hopi alternativa pa terapia di transfusion di sanger homólogo i cu Testigonan di Jehova ta aceptá esakinan gustosamente.a

Un reunion dje Conseho Regional di Medicina di São Paulo ya caba a sostené e posicion dje Testigonan. Na januari 1995 el a dicidí cu si tin obhecion contra e tratamentu cu un dokter ta recomendá, e pashent tin derecho di nengu’é i scoge un otro dokter.

Ta di encomendá cu awor tin cientos di specialista den e comunidad médico di Brazil cu ta dispuesto pa duna tratamentu sin usa sanger na nan pashentnan cu pidi esei. Desde e seminarionan di mart 1995, e cooperacion entre dokternan, huesnan i Testigonan di Jehova na Brazil a mehorá remarcablemente. Na 1997 e revista médico brazileño Âmbito Hospitalar a publicá un artículo cu a insistí riba e derecho cu Testigonan di Jehova tin pa otronan respetá nan posicion riba e cuestion di sanger. Ta ampliamente reconocí awor cu, manera e Consehonan Regional di Medicina pa e estadonan di Rio de Janeiro i São Paulo a declará, “e deber dje dokter pa protehá e bida di su pashent no mester surpasá su deber pa defendé e pashent su derecho di scoge tratamentu.”

[Nota]