Informe di Proclamadonan di Reino

“Bo Pueblo Lo Ofrecé Su Mes di Buena Gana”

E PODEROSO hefe di ehército sirio, Naman, tin lepra. Si no trat’é, e malesa repugnante aki por desfigurá un hende su curpa i hiba na su morto. Kico Naman tin cu haci? Entre Naman su famia di cas tin un mucha muher chikitu, “cautivo dje tera di Israel.” E ta papia cu curashi i ta identificá profeta Eliseo como esun cu por sana Naman.—2 Reynan 5:1-3.

Debí n’e mucha muher su posicion intrépido, Naman ta busca Eliseo i ta ser saná. Ademas, Naman ta bira adoradó di Jehova! E experencia aki, registrá den Bijbel, a tuma lugá den siglo dies P.E.C. (2 Reynan 5:4-15) Awe, hopi hóben ta mustra curashi similar papiando na fabor di interesnan di Reino. E siguiente experencia di Mozambique ta confirmá esaki.

Nuno di seis aña di edad ta un publicadó no-bautisá dje bon nobo. Asta promé cu el a bira un publicadó no-bautisá, Nuno tabata reuní e muchanan den su becindario, haci oracion, i siña nan di Bijbel, usando e publicacion Mi buki di relato bíblico.

Hopi biaha Nuno ta lanta diasabra mainta trempan i recordá su famia: “Awe nos ta sali den sirbishi di veld.” E ta manifestá su celo p’e ministerio den otro maneranan tambe. Ora e ta compañá su mayornan den e ministerio riba caya na Maputo, hopi biaha Nuno ta acercá hende su so. Na un dje ocasionnan ei, un comerciante a yega cerca dje i a puntr’é: “Pakico bo ta bende e revistanan aki?” Nuno a bisa: “Mi no ta bende revista, pero sí mi ta aceptá contribucion pa yuda financiá e obra di predicacion.” E comerciante a respondé: “Aunke mi no ta interesá, bo actitud i abilidad a impresioná mi. Lo mi kier haci un contribucion p’e trabou aki.”

Na un otro ocasion, Nuno a acercá un homber riba caya i a ofrecé e buki Berdadero paz i siguridad—Con bo por hayé? E homber a puntr’é: “No ta e scol ei bo ta bai?” Nuno a contestá: “Sí, mi ta bai e scol ei, pero awe mi ta presentando un mensahe importante for dje buki aki. E ta mustra cu meneer por biba den e mundu nobo cu Dios lo trece, manera e plachi den e buki aki ta mustra.” Nuno no tabata sa mes cu e homber cu el a papia cuné tabata un maestro di su scol. E maestro no solamente a aceptá e buki, pero awor e ta ricibí tambe e revistanan Toren di Vigilancia i Spierta! regularmente for di Nuno.

Ora puntra Nuno pakico e ta gusta participá den e trabou di predicá, e ta bisa: “Mi kier papia cu hende i siña nan tocante Jehova i su Yu, Jesucristo.” E ta agregá: “I si e hendenan no kier scucha, no tin nodi rabia.”

Mundialmente, miles di hóben manera Nuno ‘ta ofrecé nan mes di buena gana’ pa siña otronan i predicá tocante e Reino di Dios. (Salmo 110:3) Pero esaki no ta sosodé pa casualidad. Mayornan cu ta siña nan yunan tocante Jehova for di infancia, cu ta duna un bon ehempel den e ministerio i cu ta pone interesnan di Reino celosamente na promé lugá, lo ser recompensá ricamente.