Kico Lo Para di Nos Tera?

World Military and Social Expenditures 1996 ta declará: “Ningun otro siglo ta igualá siglo 20 den violencia civil salbahe, cantidad di conflictonan bringá, multitudnan di refugiado, miyones di hende matá den gueranan i den e enorme gastunan pa ‘defensa.’” E situacion aki lo cambia un dia?

Apostel Pedro a recordá cristiannan di promé siglo dje promesa cu Dios a haci siglonan promé: “Tin shelu nobo i un tera nobo cu nos ta spera segun [Dios] su promesa, i den esakinan husticia lo tin cu biba.” (2 Pedro 3:13) Originalmente e palabranan ei tabata parti dje profecia di Isaías. (Isaías 65:17; 66:22) Israel di antigwedad a experenciá un cumplimentu inicial ora e nacion a ser restorá den su tera primintí, despues di tabata den cautiverio na Babilonia pa 70 aña. Dor di ripití e promesa di “shelu nobo i un tera nobo,” Pedro a mustra cu ainda e profecia lo haña un cumplimentu na un escala asta mas grandi—un escala mundial!

Dios su boluntad ta pa establecé condicionnan hustu riba henter e tera, i lo e ser cumplí dor di su Reino celestial cu Cristo como Rey. “Nacion lo no hisa spada contra nacion, ni nan lo no siña mas di guera.” (Isaías 2:4) Un pas i siguridad completo asina riba tera, ta loke Jesus a siña su siguidónan pa spera i resa p’e den loke comunmente ta ser yamá e Oracion di Nos Tata, cu ta bisa: “Laga bo reino bini. Laga bo boluntad sosodé, mescos cu den shelu, tambe riba tera.”—Mateo 6:9, 10.

Lo bo tin gana di biba den un mundu cu ta mes hustu cu shelu? Ta esei ta e speransa cu Bijbel ta ofrecé tur hende cu sinceramente ta busca pa conocé Dios i biba di acuerdo cu su camindanan hustu.