Cuidou cu Simonia!

SIMON di Samaria tabata masha respetá den su comunidad. El a biba den e promé siglo E.C., i e hendenan tabata asina cautivá cu su artenan di magia cu nan tabata bisa di dje: “E homber aki ta e Poder di Dios, cu por ta yamá Grandi.”—Echonan 8:9-11.

Sin embargo, despues cu Simon a bira un cristian bautisá, el a tuma nota di un poder muchu mas grandi di loke e tabata desplegá anteriormente. Esei tabata e poder cu a ser otorgá n’e apostelnan di Jesus, i cu a capacitá nan pa duna otro hende e donnan milagroso di spiritu santu. Simon a keda asina impresioná cu el a ofrecé e apostelnan placa i a pidi: “Duná mi e autoridad aki tambe, pa cualkier hende riba ken mi pone mi man por ricibí spiritu santu.”—Echonan 8:13-19.

Apostel Pedro a scual Simon, bisando: “Laga bo plata perecé cu bo, pasobra bo a pensa cu bo por haña den bo poder e don grátis di Dios mediante placa. Bo no tin arte ni parti den e asuntu aki, pasobra bo curason no ta recto den bista di Dios.”—Echonan 8:20, 21.

E palabra “simonia” ta bini dje relato bíblico aki. E ta ser definí como “e picá di cumpra of bende posicion of promocion den iglesia.” New Catholic Encyclopedia ta reconocé cu foral entre siglo 9 pa siglo 11 “simonia tabata prevalente den e monasterionan, e clase inferior di clero, e episcopado i asta e pontificado.” E di nuebe edicion di The Encyclopædia Britannica (1878) ta observá: “Un estudio dje historia dje conclavenan papal ta convencé e studiante cu hamas tabatin un eleccion hací den iglesia cu no tabata manchá cu simonia, miéntras cu den un gran cantidad di caso e simonia cu a ser practicá den e conclave tabata dje clase mas flagrante, mas descará i mas bisto.”

Cristiannan berdadero awe tin cu tene cuidou cu simonia. Por ehempel, algun cristian lo por inundá ruman cu por duna nan privilegionan adicional cu yen di elogio of cu regalo generoso. I vise versa, esnan cu por duna privilegionan asina por mustra faboritismo na esnan cu tin e moda—i hopi bes ta deseoso—pa inundá nan cu regalo. Tur dos situacion ta simonia, i e Scritura claramente ta condená un curso asina. Pedro a urgi Simon: “Pues, repentí, di bo maldad, i suplicá Jehova pa, si ta posibel, bo por haña pordon p’e invento di bo curason [“p’e complot aki di bo,” segun New Jerusalem Bible]; pasobra mi ta mira cu bo ta un gal venenoso i un cadena di inhusticia.”—Echonan 8:22, 23.

Felismente, Simon a mira e seriedad di su mal deseo. El a roga e apostelnan: “Boso haci súplica pa mi na Jehova pa ningun dje cosnan cu boso a bisa bini riba mi.” (Echonan 8:24) Dor di haci caso dje les importante den e relato aki, cristiannan berdadero ta haci esfuerso pa evitá cualkier mancha di simonia.