Amor Mas Grandi cu Esun di un Mama

MAMANAN ta bandonando nan babynan recien nací na stacionnan di trein, den w.c. público of riba cayanan druk. Tin asta biaha cu trahadónan riba truck di sushi a yega di haña baby chikititu den barí di sushi, morto cansá di yora pa nan mama. Segun O Estado de S. Paulo, “casonan di baby bandoná riba caya ta aumentando.” Claro cu e hóben mama lo por bin lamentá su decision mas despues. Tog e ta dal bai, maske esei por costa bida di su yu.

Bo por ta puntra: ‘Ta con un mama por pensa mes di bandoná su yu pa su cuenta asina?’ Bijbel ta usa tal asuntu tristu como un metáfora pa resaltá con contrali e ta na loke nos Creador ta sinti pa su hendenan: “Un esposa por lubidá su yu di pechu di manera cu lo e no sinti duele dje yu di su barica? Asta e muhernan aki por lubidá, tog ami mes lo no lubidá bo.”—Isaías 49:15.

Berdad, Dios ta sinti un amor mas profundo pa nos, i e ta sinti mas pa nos necesidadnan, cu cualkier mama humano. Sea bo ta hóben of adulto, i ni maske cua problema bo ta enfrentá, bo no ta bo so. Bo Creador kier yudá bo, i e ta interesá den bo bienestar. Un salmista a expres’é asina: “Den caso cu mi mes tata i mi mes mama bandoná mi, asta Jehova mes lo ricibí mi.”—Salmo 27:10.

Ta publicá e revistanan Toren di Vigilancia i Spierta! rond mundu, pa ofrecé conocimentu di “e único Dios berdadero,” Jehova, i di su yu Jesucristo. Un conocimentu cu por nificá bida eterno pa esnan cu acept’é cu aprecio.—Juan 17:3.